លោក រ៉ុង ឈុន ស្នើឱ្យពិនិត្យ "ច្បាប់ការងារថ្មី" ឡើងវិញ មុនព្រឹទ្ធសភាអនុម័ត

2018-06-13 03:52:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានសហជីពការងារកម្ពុជា លោក រ៉ុង ឈុន កាលពីថ្ងៃទី១២ ខែមិថុនា ឆ្នាំ២០១៨ បានស្នើឱ្យព្រឹទ្ធសភាបញ្ជូនសេចក្ដីព្រាងច្បាប់ស្ដីពីវិសោធនកម្មច្បាប់ការងារ ទៅឱ្យរដ្ឋាភិបាលពិនិត្យមើលឡើងវិញ ព្រោះលោកយល់ថា មាត្រាមួយចំនួននៃសេចក្ដីព្រាងច្បាប់នេះនឹងធ្វើឱ្យកម្មករនិយោជិត ខាតបង់ផលប្រយោជន៍ និងប៉ះពាល់ដល់សិទ្ធិសេរីភាពរបស់សហជីព។

លោក រ៉ុង ឈុន ក្នុងពិធីជួបជុំ១ នៅរាជធានីភ្នំពេញ ក្រោយពេលលាលែងពីសមាជិក គ.ជ.ប

លោក រ៉ុង ឈុន យល់ឃើញថា ការស្នើឱ្យមានវិសោធនកម្មច្បាប់ស្ដីពីការងាររបស់រាជរដ្ឋាភិបាល ដោយគ្មានការពិគ្រោះយោបល់ជាមួយសហជីពនេះ គ្រាន់តែជាការធ្វើតាមការចង់បានរបស់និយោជក និងបើកឱកាសឱ្យពួកគេបានរួចផុតពីកាតព្វកិច្ច នៅពេលរោងចក្របិទទ្វារតែប៉ុណ្ណោះ។

លោកក៏បានស្នើឱ្យរាជរដ្ឋាភិបាល ពិនិត្យមើលឡើងវិញ និងបញ្ចូលចំណុចសំខាន់ៗមួយចំនួនទៅក្នុងសេចក្ដីព្រាងច្បាប់នេះ។ ចំណុចទាំងនោះ រួមមាន៖

និយោជកត្រូវតម្កល់ប្រាក់ក្នុងរតនាគារជាតិ ទុកបើកជូនកម្មករនិយោជិត ក្នុងករណីរោងចក្របិទទ្វារ
ការរក្សាទុកមាត្រា ៨៧ចាស់ និងប្រាក់បំណាច់បណ្ដេញចេញ
ហើយការទូទាត់ប្រាក់បំណាច់អតីតភាពជូនកម្មករ និយោជកត្រូវធ្វើឡើងរៀងរាល់ ៣ ឆ្នាំម្ដង។

ឆ្លើយតបនឹងការលើកឡើងខាងលើនេះ អ្នកនាំពាក្យព្រឹទ្ធសភា លោក ម៉ម ប៊ុននាង បានបញ្ជាក់ថា ព្រឹទ្ធសភាមិនចាប់អារម្មណ៍នឹងការស្នើពីសំណាក់សហភាពសហជីពកម្ពុជានោះទេ ព្រោះស្ថាប័នកំពូលមួយនេះជឿជាក់ថា សេចក្ដីព្រាងច្បាប់ដែលបានស្នើមកនេះ ជារឿងត្រឹមត្រូវ និងផ្ដល់ផលប្រយោជន៍ច្រើនដល់កម្មករ។

លោកបាននិយាយយ៉ាងដូច្នេះថា៖ «ច្បាប់ដែលគេបង្កើតថ្មីនេះ គឺគេគិតអំពីផលប្រយោជន៍របស់កម្មករ-កម្មការិនីពិតប្រាកដណាស់។ គាត់ (លោក រ៉ុង ឈុន) អត់មានបានអ្វី ចេះតែលើកពីហេតុផលមក។ ឥឡូវ ខុសកន្លែងណា ប្រការណា មាត្រាទីប៉ុន្មានដែលខុសហ្នឹងឱ្យគាត់លើកយកមកនិយាយមក វាអត់មានទេ។»

លោកបានថ្លែងឱ្យដឹងថា គណៈកម្មាធិការអចិន្ត្រៃយ៍ព្រឹទ្ធសភានឹងបើកកិច្ចប្រជុំពិភាក្សាលើសេចក្ដីព្រាងច្បាប់នេះ នៅទី១៤ មិថុនា ឆ្នាំ២០១៨។

គួររំលឹកថា កាលពីថ្ងៃទី៧ ខែមិថុនា ឆ្នាំ២០១៨ រដ្ឋសភា បានអនុម័តសេចក្តីព្រាងច្បាប់ស្តីពីវិសោធនកម្មមាត្រា៨៧ ចំណងជើងចំណុច “គ” ផ្នែកទី៣ នៃជំពូកទី៤ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២២ នៃច្បាប់ស្តីពីការងារ។

លោក អ៊ីត សំហេង រដ្ឋមន្រ្តីក្រសួងការងារ ឡើងថ្លែងការពារសេចក្តីព្រាងច្បាប់ស្ដីពីវិសោធនកម្មច្បាប់ការងារ នៅក្នុងសម័យប្រជុំរដ្ឋសភា កាលពីថ្ងៃទី៧ ខែមិថុនា ឆ្នាំ២០១៨។ រូបថត៖ រដ្ឋសភា

មាត្រា៨៧ នៃច្បាប់ស្តីពីការងារ បានចែងថា «ការបញ្ឈប់សកម្មភាពសហគ្រាស មិនបើកឱកាសឱ្យនិយោជក បានរួចអំពីកាតព្វកិច្ច ដែលមានចែងក្នុងផ្នែកទី៣ នេះទេ វៀរលែងតែក្នុងករណីប្រធានស័ក្តិ។ ធនក្ស័យ និងការជំរះបញ្ជីជាផ្លូវតុលាការ មិនត្រូវចាត់ទុកជាករណីប្រធានស័ក្តិទេ។»

សូមបញ្ជាក់ថា គិតត្រឹមរយៈពេល ៥ខែ នៃឆ្នាំ២០១៨នេះ រាជរដ្ឋាភិបាល បានផ្ដល់ថវិកាបុរេប្រទានចំនួនជាង ៦ លាន ២ សែនដុល្លារអាមេរិក សម្រាប់បើកជូនកម្មករជិត ៦ពាន់នាក់ នៃរោងចក្រចំនួន១២ ដែលត្រូវបានថៅកែបិទទ្វាររត់ចោល៕

ប្រភព៖ Radio Free Asia ប្រែសម្រួល៖ សំភី