កម្ពុជា គ្រោងចំណាយជាង ២០០លានដុល្លារ ដើម្បីសង់ចំណតផែទឹកជ្រៅថ្មី១ទៀត

2018-06-25 12:28:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា កំពង់ផែស្វយ័តក្រុងព្រះសីហនុ គ្រោងនឹងពង្រីកសមត្ថភាពរបស់កំពង់ផែបន្ថែមទៀត តាមរយៈការកសាងចំណតផែកុងតឺន័រថ្មីមួយទៀត ដែលមានជម្រៅទឹក ១៤,៥ម៉ែត្រ ប្រវែង ៣៥០ម៉ែត្រ ដើម្បីឆ្លើយតបទៅនឹងការកើនឡើងនៃបរិមាណកុងតឺន័រ ឆ្លងកាត់កំពង់ផែនាពេលបច្ចុប្បន្ន និងនៅពេលអនាគត។ លោកបានថ្លែងដូច្នេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការ ចំណតផែពហុបំណង នៃកំពង់ផែស្វយ័តក្រុងព្រះសីហនុ កាលពីព្រឹកថ្ងៃទី២៥ ខែមិថុនា ឆ្នាំ២០១៨។

ចំណតផែពហុបំណងនៃកំពង់ផែស្វយ័តក្រុងព្រះសីហនុ ដែលត្រូវបានដាក់ឱ្យដំណើរការនៅព្រឹកថ្ងៃទី២៥ ខែមិថុនា ឆ្នាំ២០១៨។ រូបថត៖ ក្រសួងសាធារណការ និងដឹកជញ្ជូន

លោករដ្ឋមន្រ្តី បានបញ្ជាក់ថា នៅក្នុងអំឡុងដំណើរទស្សនកិច្ច របស់សម្តេច ហ៊ុន សែន កាលពីខែសីហា ឆ្នាំ២០១៧ នៅប្រទេសជប៉ុន កំពង់ផែស្វយ័តក្រុងព្រះសីហនុ បានចុះហត្ថលេខាលើពិធីប្តូរសារ និងកិច្ចព្រមព្រៀងប្រាក់កម្ចីសម្បទាន រវាងរដ្ឋាភិបាលកម្ពុជា និងជប៉ុន លើគម្រោងសាងសង់ចំណតផែកុងតឺន័រទឹកជ្រៅនេះ ដោយគ្រោងនឹងសាងសង់ នៅឆ្នាំ២០១៩ ហើយគ្រោងនឹងបញ្ចប់នៅចុងឆ្នាំ២០២២ ឬដើមឆ្នាំ២០២៣ ដែលមានទឹកប្រាក់សរុប ប្រមាណ ២០៣លានដុល្លារ។

លោក ស៊ុន ចាន់ថុល ក៏បានឱ្យដឹងដែរថា កំពង់ផែទឹកជ្រៅនេះ នឹងធានាដល់ការចូលចត នាវាកុងតឺន័រខ្នាតធំ ចំណុះ៦ម៉ឺនតោន រហូតដល់៩៣% នៃចំនួននាវាប្រចាំតំបន់អាស៊ី-ប៉ាស៊ីហ្វិក នៅដើមឆ្នាំ២០២៣។ ជាងនេះទៅទៀត កំពង់ផែស្វយ័តក្រុងព្រះសីហនុ នឹងក្លាយជា កំពង់ផែលំដាប់ថ្នាក់កម្រិតមធ្យម ដោយបរិមាណកុងតឺន័រឆ្លងកាត់ នឹងមានបរិមាណលើសពី១លានTEUs ក្នុងមួយឆ្នាំ រីឯតម្លៃដឹកជញ្ជូន តាមផ្លូវសមុទ្រ ទៅមកកម្ពុជា នឹងកាន់តែចុះទាបប្រហាក់ប្រហែល នឹងថ្លៃដឹកជញ្ជូន តាមសមុទ្រនៃប្រទេសជិតខាងដែរ៕

អត្ថបទទាក់ទង៖ លម្អិតអំពីចំណតផែពហុបំណង ដែលត្រូវបានដាក់ឱ្យប្រើប្រាស់ជាផ្លូវការ កាលពីព្រឹកមិញ

ប្រភព៖ AKP ប្រែសម្រួល៖ សំភី