អាជ្ញាធររាជធានី​ភ្នំពេញ គ្រោងនឹងសាងសង់ចំណតរថយន្ត​ក្រោមដី នៅក្រោម​សួនច្បារ មិត្តភាព កម្ពុជា-ថៃ ដែលស្ថិត​នៅមុខស្ថានទូត​អាមេរិក ខាងលិច​វត្តភ្នំ។ គម្រោង​សាងសង់​ចំណត​រថយន្ត​ក្រោមដី​នេះ ត្រូវ​បានប្រកាស​ក្នុងជំនួបសម្តែងការគួរសម រវាងលោក ឃួង ស្រេង អភិបាល​រាជធានី​ភ្នំពេញ និងលោក ប៉ានីយ៉ារ៉ាក់ ពូលធុប ឯកអគ្គរាជទូត​ថៃ ប្រចាំកម្ពុជា នាព្រឹក​ថ្ងៃទី២៨ ខែមិថុនា ឆ្នាំ២០១៨ នៅសាលា​រាជធានីភ្នំពេញ។

លោក ឃួង ស្រេង អភិបាលរាជធានីភ្នំពេញ បានលើកឡើងថា ក្រោយការស្ថាបនា​ចំណតរថយន្តក្រោមដីថ្មីនេះ អាជ្ញាធររាជធានីភ្នំពេញ សហការ​ជាមួយ​ស្ថានទូត​ថៃ នឹងស្ថាបនា​សួនច្បារ​ឡើងវិញ ដោយរក្សា​ទ្រង់ទ្រាយដើម ហើយមាន​ការមើលថែ​ពីក្រុមអ្នកបច្ចេកទេស​មកពីប្រទេស​ថៃ។

លោកអភិបាលរាជធានីភ្នំពេញ បញ្ជាក់​ទៀត​ថា គម្រោងសាងសង់​ចំណត​រថយន្តក្រោម​ដី មិន​ប៉ះពាល់ដល់​ដើមឈើ ដែល​ប្រមុខរាជរដ្ឋាភិបាល​កម្ពុជា និងថៃ ដាំរួមគ្នា​នោះទេ ដោយសារ​តែដើមឈើ​ទាំងនោះ ស្ថិត​នៅលើ​សួនច្បារ​ប៉ែកខាងលិច រីឯចំណតក្រោម​ដី នឹងត្រូវធ្វើ​នៅប៉ែក​ខាងកើត ទល់មុខ​​ស្ថានទូត​អាមេរិក ប្រចាំកម្ពុជា។

លោក ប៉ានីយ៉ារ៉ាក់ ពូលធុប ឯកអគ្គរាជទូតថៃ ប្រចាំកម្ពុជា បានបញ្ជាក់​ថា ដោយសារ​តែតម្រូវការជាក់ស្តែង​របស់រាជធានី​ភ្នំពេញ ដែលខ្វះ​ចំណត​រថយន្ត ភាគីថៃ​មិនមានអ្វី​ជំទាស់នឹង​គម្រោង​សាងសង់ចំណត​រថយន្តក្រោម​ដីនោះ​ឡើយ។ លោក បានស្នើ​ឲ្យ​អ្នកជំនាញ រួមគ្នាសិក្សា​​ឲ្យ​បានល្អិនល្អន់ ដើម្បីរក្សាបាននូវទ្រង់ទ្រាយដើមរបស់សួនមិត្តភាពកម្ពុជា-ថៃ។

សួនច្បារមិត្តភាព កម្ពុជា-ថៃ ត្រូវបានសម្ពោធជាផ្លូវ កាលពីថ្ងៃទី៧ ខែកញ្ញា ឆ្នាំ២០១៧ ដោយមានវត្តមានសម្តេចតេជោ ហ៊ុនសែន និងនាយករដ្ឋមន្ត្រីថៃ លោក ប្រាយុទ្ធ ច័ន្ទអូឆា។ សួនច្បារនេះ ស្ថិតនៅខាងលិចវត្តភ្នំ មានប្រវែងជាង ៤៥០ ម៉ែត្រ ទទឹង ៣១ម៉ែត្រ លាតសន្ធឹងពីមុខស្ថានទូតអាមេរិក ដល់មុខសាកលវិទ្យាល័យជាតិគ្រប់គ្រង ផ្លូវព្រះមុនីវង្ស ក្នុងសង្កាត់ វត្តភ្នំ ខណ្ឌដូនពេញ រាជធានីភ្នំពេញ។

អាជ្ញាធររាជធានីភ្នំពេញ ទើបតែសាងសង់រួចរាល់នូវចំណតក្រោមដី ស្ថិតនៅក្រោមសួនច្បារផ្សារចាស់ ដែលនៅមុខស្ថានីយរថភ្លើង ចន្លោះពីអគារខ្ពស់វឌ្ឍនៈ និងអគារកាណាឌីយ៉ា។ ចំណតរថយន្តក្រោមដីនោះ មិនទាន់សម្ពោធបើកឲ្យដំណើរការជាផ្លូវការនៅឡើយទេ៕​