ពិធីផ្ទេរតំណែងដល់លោក សៅ សុខា និងលោក ហ៊ុន ម៉ាណែត ត្រូវបានប្រកាសជាផ្លូវការនៅព្រឹកនេះ

2018-06-30 01:48:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ពិធីផ្ទេរ និងប្រគល់តំណែងថ្នាក់ដឹកនាំក្រសួងការពារជាតិ និងថ្នាក់ដឹកនាំអគ្គបញ្ជាការដ្ឋានកងទ័ពជើងគោក ដូចជា នាយឧត្តមសេនីយ៍ ប៉ុល សារឿល នាយឧត្តមសេនីយ៍ គន់ គីម នាយឧត្តមសេនីយ៍ មាស សុភា នាយឧត្តមសេននីយ៍ សៅ សុខា និងលោកឧត្តមសេនីយ៍ឯក ហ៊ុន ម៉ាណែត ត្រូវបានប្រកាសជាផ្លូវការនៅព្រឹកថ្ងៃសៅរ៍ ទី៣០ ខែមិថុនា ឆ្នាំ២០១៨ នៅសាលប្រជុំទីស្តីការគណៈរដ្ឋមន្រ្តី ក្រោមអធិបតីភាពសម្តេច ទៀ បាញ់ រដ្ឋមន្រ្តីក្រសួងការពារជាតិ។

សម្តេច ទៀ បាញ់ រដ្ឋមន្រ្តីក្រសួងការពារជាតិ ថ្លែងក្នុងពិធីផ្ទេរ និងប្រគល់តំណែងថ្នាក់ដឹកនាំក្រសួងការពារជាតិ និងថ្នាក់ដឹកនាំអគ្គបញ្ជាការដ្ឋានកងទ័ពជើងគោក នៅព្រឹកថ្ងៃសៅរ៍ ទី៣០ ខែមិថុនា ឆ្នាំ២០១៨ នៅសាលប្រជុំទីស្តីការគណៈរដ្ឋមន្រ្តី។

សម្តេច ទៀ បាញ់ បានមានប្រសាសន៍ថា ការផ្ទេរប្រគល់តំណែងជូននាយឧត្តមសេនីយ៍ សៅ សុខា និងលោកឧត្តមសេនីយ៍ឯក ហ៊ុន ម៉ាណែត គឺធ្វើឡើងអនុវត្តត្រឹមត្រូវ តាមនីតិវិធី ច្បាប់តម្រូវ។ ហើយដោយសារតម្រូវការមួយចំនួន គឺមានអ្នកដឹកនាំខ្លះត្រូវទទួលភារកិច្ចតាមច្បាប់តម្រូវឈរឈ្មោះជាតំណាងរាស្ត្រ និងជិតដល់ពេលឃោសនាបោះឆ្នោត ដូច្នេះត្រូវសុំច្បាប់ពិសេសមុនមួយសប្តាហ៍។ នៅពេលដែលចេញទៅត្រូវតែមានអ្នកមកជំនួស។

សម្តេច ទៀ បាញ់ បានបញ្ជាក់ថា នៅពេលមិនទាន់ប្រកាសនិងផ្ទេរតំណែង គឺមានការរំជើបរំជួលខ្លាំង និងមានការបកស្រាយផ្សេងៗ ប៉ុន្តែវាអនុវត្តត្រឹមត្រូវ តាមនីតិវិធី។

សូមជម្រាបថា នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ត្រូវបានប្រគល់ភារកិច្ចធ្វើជាអគ្គមេបញ្ជាការស្ដីទី នៃកងយោធពលខេមរភូមិន្ទ បន្ថែមលើមុខងារបច្ចុប្បន្ន ពីនាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ។ ការប្រគល់ភារកិច្ចនេះ គឺក្រោយពីនាយឧត្តមសេនីយ៍ ប៉ុល សារឿន ឈរឈ្មោះជាបេក្ខជនតំណាងរាស្រ្ដ សម្រាប់ការបោះឆ្នោតជ្រើសតាំងតំណាងរាស្រ្ដ នីតិកាលទី៦ ខាងមុខនេះ។ ការឈរឈ្មោះជាបេក្ខជនតំណាងរាស្រ្ដ គឺតម្រូវឱ្យនាយឧត្តមសេនីយ៍ ប៉ុល សារឿន ត្រូវព្យួរតំណែងសិន ព្រោះច្បាប់បានកំណត់ថា យោធា ត្រូវតែព្យួរឈ្មោះ ឬតំណែងជាមុនសិន មុនឈរឈ្មោះបោះឆ្នោត។

ការប្រគល់ភារកិច្ចជាអគ្គមេបញ្ជាការស្ដីទី នៃកងយោធពលខេមរភូមិន្ទ បន្ថែមលើមុខងារបច្ចុប្បន្ន ជូននាយឧត្តមសេនីយ៍ សៅ សុខា

រីឯលោកឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះ និងជាមេបញ្ជាការរងកងទ័ពជើងគោក ទទួលភារកិច្ចជានាយសេនាធិការចម្រុះស្ដីទី និងជាមេបញ្ជាការកងទ័ពជើងគោកស្តីទី ពីលោកនាយឧត្តមសេនីយ៍ គន់ គីម អគ្គមេបញ្ជាការរង និងនាយសេនាធិការចម្រុះ និងលោកនាយឧត្តមសេនីយ៍ មាស សុភា អគ្គមេបញ្ជាការរង មេបញ្ជាការកងទ័ពជើងគោក។ ការប្រគល់ភារកិច្ចនេះ គឺក្រោយពេលលោក គន់ គីម និងលោក មាស សុភា បានឈរឈ្មោះជាបេក្ខជនតំណាងរាស្រ្ត នៅក្នុងការបោះឆ្នោតខាងមុខនេះផងដែរ៕