វៀតណាមទាមទារឲ្យ Facebook កែប្រែកំហុសពាក់ព័ន្ធនឹងផែនទីទឹកដី

2018-07-03 00:27:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលវៀតណាម បានប្រកាសទាមទារឲ្យក្រុមហ៊ុនបណ្ដាញសង្គម Facebook ចាត់វិធានការភ្លាមៗ ដើម្បីកែតម្រូវផែនទីនៃប្រទេសរបស់ខ្លួន ដែលមិនបានរួមបញ្ចូលប្រជុំកោះ Paracel (វៀតណាមហៅថា Hoang Sa) និងប្រជុំកោះ Spratly (Truong Sa)។ នេះបើតាមការឲ្យដឹងពីក្រសួងព័ត៌មាន និងគមនាគមន៍វៀតណាម ដែលបានផ្ញើសារទៅកាន់ Facebook កាលពីថ្ងៃទី១ កក្កដា ២០១៨។

នៅលើផែនទីរបស់ Facebook បង្ហាញថា ប្រជុំកោះទាំង២ដែលនៅក្នុងដែនជម្លោះសមុទ្រចិនខាងត្បូង គឺជាទឹកដីរបស់ប្រទេសចិន ដោយវាមិនមែនត្រូវបានកាន់កាប់ដោយវៀតណាមនោះឡើយ។ ផែនទីនេះបានបង្កជាក្ដីក្ដៅក្រហាយយ៉ាងខ្លាំងចំពោះប្រជាពលរដ្ឋវៀតណាម ជាពិសេសនោះគឺអ្នកប្រើប្រាស់បណ្ដាញសង្គម Facebook ផ្ទាល់តែម្ដង។

ជាការឆ្លើយតបនឹងបញ្ហានេះ តំណាងរបស់ Facebook បានបកស្រាយថា វាគឺជាភាន់ច្រឡំ ដែលបណ្ដាលមកពីកំហុសបច្ចេកទេស ហើយវាមិនជាប់ពាក់ព័ន្ធនឹងគោលបំណងនយោបាយណាមួយទេ។ Facebook នឹងស៊ើបអង្កេតពីបញ្ហាដែលកើតឡើង ដើម្បីស្វែងរកដំណោះស្រាយឲ្យបានឆាប់។

សូមបញ្ជាក់ថា ជារឿយៗ វៀតណាមតែងប្រកាសដល់អន្តរជាតិថា ប្រជុំកោះ Paracel និង Spratly ជាអធិបតេយ្យភាពរបស់ខ្លួន ដោយផ្អែកទៅលើមូលដ្ឋានច្បាប់ពេញលេញ និងភស្ដុតាងជាប្រវត្តិសាស្ត្រ។ រាល់សកម្មភាពដែលបំពានលើអធិបតេយ្យភាពនេះ ត្រូវវៀតណាមចាត់ទុកជាការប្រឆាំងទៅនឹងច្បាប់អន្តរជាតិ ដែលក្នុងនោះរាប់បញ្ចូលទាំងអនុសញ្ញាអង្គការសហប្រជាជាតិលើច្បាប់សមុទ្រឆ្នាំ១៩៨២ (UNCLOS) ផងដែរ៕

ប្រភព៖ vnexpress ប្រែសម្រួល៖ ឈាង.