ចិន ផ្តល់កម្ចីជិត ២៦០លានដុល្លារឱ្យកម្ពុជា សម្រាប់សាងសង់ផ្លូវក្រវាត់ក្រុងទី៣

2018-07-20 04:43:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសេដ្ឋកិច្ច និងហិរញ្ញវត្ថុ និងធនាគារនីហ័រណ-អាហរ័ណចិន កាលពីថ្ងៃទី១០ ខែកក្កដា ឆ្នាំ២០១៨ បានចុះហត្ថលេខាលើកិច្ចព្រមព្រៀងឥណទានសម្បទាននូវទឹកប្រាក់ចំនួន ២៥៩លានដុល្លារ សម្រាប់ហិរញ្ញប្បទានដល់គម្រោងសាងសង់ផ្លូវក្រវាត់ក្រុងទី៣។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច កាលពីថ្ងៃទី១៧ ខែកក្កដា ឆ្នាំ២០១៨។

គម្រោងសាងសង់ផ្លូវក្រវាត់ក្រុងទី៣នេះ មានប្រវែងសរុប ៤៧,៦ គីឡូម៉ែត្រ និងមានទទឹងតួផ្លូវសរុប ២៥ម៉ែត្រ។ ក្នុងនោះ ផ្លូវរថយន្តមាន ៤គន្លង (២ទៅ ២មក) មានទទឹង ៣,៥០ ម៉ែត្រក្នុងមួយគន្លង និងផ្លូវទោចក្រយានយន្ត ២គន្លង (១ទៅ ១មក) មានទទឹង ២,២៥ម៉ែត្រក្នុងមួយគន្លង។

រូបគំរូនៃផ្លូវក្រវាត់ក្រុងទី៣ (រូបថត៖ ក្រសួងសេដ្ឋកិច្ច និងហិរញ្ញវត្ថុ)

គម្រោងនេះ គឺត្រូវសាងសង់ចាប់ពីផ្លូវជាតិលេខ ៤ ម្តុំអូរដឹម ត្រង់គីឡូម៉ែត្រលេខ ១៤+១០៥ ទៅចំណុចបញ្ចប់ភ្ជាប់នឹងផ្លូវជាតិលេខ១ ត្រង់គីឡូម៉ែត្រលេខ ២៤+៨៤០ ដោយភ្ជាប់ទៅនឹងកំពង់ផែភ្នំពេញថ្មី។ ផ្លូវនេះ ឆ្លងកាត់ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១ ព្រមទាំងមានផ្លូវខ្នែងប្រវែង ៥,៣៧៥ គីឡូម៉ែត្រផងដែរ។ ចំណែកកំណាត់ផ្លូវដែលភ្ជាប់ពីផ្លូវជាតិលេខ៥ (ចំណុចស្ពានព្រែកព្នៅ) ទៅផ្លូវជាតិលេខ៤ នៃផ្លូវក្រវាត់ក្រុងទី៣នេះ ត្រូវបានសាងសង់រួចរាល់ហើយ ដោយសាលារាជធានីភ្នំពេញ។

ក្រសួងសាធារណការ និងដឹកជញ្ជូន ក្នុងនាមរាជរដ្ឋាភិបាលកម្ពុជា បានចុះកិច្ចសន្យាសាងសង់ជាមួយក្រុមហ៊ុនសំណង់សៀងហៃចិន ក្នុងការអនុវត្តការងារសាងសង់ផ្លូវក្រវាត់ក្រុងទី៣នេះ ដែលនឹងមានការត្រួតពិនិត្យបច្ចកទេសដោយក្រុមហ៊ុនក្វាងចូវវ៉ាន់អាន មកពីប្រទេសចិនផងដែរ។

សេចក្តីប្រកាសព័ត៌មានដដែលបានបញ្ជាក់ថា ផ្លូវនេះ នឹងដើរតួនាទីយ៉ាងសំខាន់ក្នុងការរួមចំណែកដល់ការជួយសម្រួលចរាចរណ៍ក្នុងរាជធានីភ្នំពេញផង និងការអនុវត្តគោលនយោបាយអភិវឌ្ឍន៍ឧស្សាហកម្មរបស់ប្រទេសកម្ពុជា និងជាខ្សែផ្លូវថ្មីមួយទៀតបន្ទាប់ពីផ្លូវក្រវាត់ក្រុងទី២ ដែលកំពុងដំណើរការសាងសង់ផង៕