ក្រសួងធនធានទឹក ធ្វើអន្តរាគមន៍ទប់ស្កាត់ទឹកជំនន់ មិនឱ្យហូរចូលរាជធានីភ្នំពេញ
- 2018-07-20 12:11:39
- ចំនួនមតិ 0 | ចំនួនចែករំលែក 0
ក្រសួងធនធានទឹក ធ្វើអន្តរាគមន៍ទប់ស្កាត់ទឹកជំនន់ មិនឱ្យហូរចូលរាជធានីភ្នំពេញ
ចន្លោះមិនឃើញ
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាក់នៅថ្ងៃទី២០កក្កដានេះថា បើទោះបីជាទឹកជំនន់នៅក្នុងខេត្តកំពង់ស្ពឺ បានធូរស្រាលបន្តិចក្តី ប៉ុន្តែពេលនេះ ទឹកកំពុងហូរធ្លាក់យ៉ាងគំហុកទៅកាន់ផ្នែកខាងក្រោម តាមស្ទឹងព្រែកត្នោត និងកំពុងគំរាមកំហែងរាជធានីភ្នំពេញ និងខេត្តកណ្តាល។ ចំពោះមុខបញ្ហានេះ លោកបានដឹកនាំកម្លាំងផ្ទាល់ ចុះទប់ទល់ជាមួយនឹងទឹកជំនន់នៅតាមទំនប់សណ្តរស្ទឹងព្រែកត្នោត ដើម្បីការពារកុំឱ្យមានការហូរច្រោះ លិចចូលតំបន់ទំនាបក្នុងភូមិសាស្ត្ររាជធានី-ខេត្តទាំង២។
ក្រសួងធនធានទឹក បានឲ្យដឹងថា គិតត្រឹមរសៀលថ្ងៃទី២០កក្កដា លោក លឹម គានហោ បានបញ្ជាឲ្យក្រុមការងារទម្លាក់ទ្វារទឹករលាំងជ្រៃ ចំនួន ០២ទ្វារ ចុះបន្ថែមចំនួន ១ម៉ែត្រទៀត។ ដូចនេះ ទ្វារទឹករលាំងជ្រៃ ចំនួន ០២ទ្វារ ត្រូវបានទម្លាក់ចុះបាន ចំនួន ០៣ម៉ែត្រ បន្ទាប់ពីស្ថានភាពទឹកជំនន់នៅផ្នែកខាងលើ មានសភាពកាន់តែធូរស្រាល។ សូមជម្រាបថា ទ្វារទឹករលាំងជ្រៃ មានសរុបចំនួន ៥ទ្វារ ដោយទ្វារនីមួយៗមានទទឹង ១២ម៉ែត្រ និងកម្ពស់ ០៧ម៉ែត្រ។
ទោះជាយ៉ាងណា ជំនន់ទឹកភ្លៀងដែលហូរពីតំបន់ខាងលើនៅខេត្តកំពង់ស្ពឺ បានធ្វើឱ្យខណ្ឌពោធិ៍សែនជ័យ និងខណ្ឌដង្កោ ដែលស្ថិតនៅតាមបណ្តោយដងស្ទឹងព្រែកត្នោត បានជន់លិចហើយនៅថ្ងៃនេះ៕