ខេត្តព្រះសីហនុ នឹងមានអគារពាណិជ្ជកម្មពហុមុខងារនៅជាប់មាត់សមុទ្រ

2018-08-02 09:07:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រមហ៊ុនចិន Prince Real Estate Group បានបោះទុនវិនិយោគរាប់រយលានដុល្លារ ដើម្បីសាងសង់អគារពាណិជ្ជកម្មពហុមុខងារនៅលើឆ្នេរជ័យជម្នះ ក្នុងខេត្តព្រះសីហនុ។ ការវិនិយោគនេះ គឺដើម្បីឆ្លើយតបទៅនឹងកំណើនតម្រូវការរបស់ភ្ញៀវទេសជាតិ និងអន្តរជាតិ ពិសេសគឺភ្ញៀវទេសចរចិននៅកម្ពុជា ដែលនឹងអាចកើនឡើងដល់ ២លាននាក់នៅឆ្នាំ២០២០ ខាងមុខ។ នេះបើតាមការចេញផ្សាយរបស់ទីភ្នាក់ងារសារព័ត៌មានកម្ពុជា។

រូបភាព៖ AKP

ក្នុងពិធីសម្ពោធបើកការដ្ឋានសាងសង់ជាផ្លូវការនូវអគារពាណិជ្ជកម្មពហុមុខងារ ព្រីនស៍ ធាន ស៊ី វ៉ាន កាលពីថ្ងៃទី០១ ខែសីហា ឆ្នាំ២០១៨ លោក ឈីវ គួរស៊ីញ ប្រធានប្រតិបត្តិក្រុមប្រឹក្សាភិបាលក្រុមហ៊ុន ព្រីនស៍ រៀល អ៊ីស្ទេត (ខេមបូឌា) គ្រុប និងលោក Li Min អគ្គនាយកក្រុមហ៊ុន បានបញ្ជាក់ថា គម្រោងព្រីនស៍ ធាន ស៊ី វ៉ាន មានទំហំសរុបជាង ៣០ម៉ឺនម៉ែត្រការ៉េ រចនាដោយក្រុមហ៊ុនអន្តរជាតិលំដាប់កំពូល។ គម្រោងពហុមុខងារនេះរួមមាន សណ្ឋាគារលំដាប់ផ្កាយ៥-៦ សណ្ឋាគារប៊ូទិក អាផាតមេន និងមជ្ឈមណ្ឌលពាណិជ្ជកម្មជាដើម ដែលនឹងផ្តល់ជូននូវសេវាកម្មលំនៅឋាន និងពាណិជ្ជកម្មលំដាប់អន្តរជាតិ។

លោកបានបន្ថែមទៀតថា គម្រោងនេះក៏មានរួមបញ្ចូលនូវផ្សារទំនើប សាលពិព័រណ៍ សាលសន្និសីទអន្តរជាតិ លំនៅឋាន សេវាកម្ម ពាណិជ្ជកម្ម ភោជនីយដ្ឋាន អាងហែលទឹកទំនើប ក្លិបទូកល្បឿនលឿន ជាពិសេសគម្រោងក៏មាននូវចំណតរថយន្តដ៏ទំនើប និងធំទូលាយ ២៥០០០ម៉ែត្រការ៉េផងដែរ។

សូមបញ្ជាក់ថា គម្រោង ព្រីនស៍ ធាន ស៊ី វ៉ាន មានទីតាំងស្ថិតនៅលើឆ្នេរជ័យជម្នះ ខាងកើតក្បែរសួនច្បារស្តូបមិត្តភាពកម្ពុជា-វៀតណាម ជាប់នឹងឆ្នេរហាវ៉ៃ។ រីឯខាងត្បូងជាប់ទីតាំងគម្រោងអភិវឌ្ឍន៍រមណីយដ្ឋាន Emario ។ គម្រោងនេះ នឹងបញ្ចប់ការសាងសង់ជាផ្លូវការនៅកណ្ដាលឆ្នាំ២០២២៕