៩សីហា ១៩៤៥៖ អាមេរិក ទម្លាក់គ្រាប់បែកបរិមាណូលើកទី២ ធ្វើឱ្យជប៉ុន បង្ខំចិត្តចុះចាញ់សង្គ្រាម

2018-08-09 06:15:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កាលពី៧៣ឆ្នាំមុន ពោលគឺនៅថ្ងៃទី៩សីហា ១៩៤៥ យន្តហោះអាមេរិក បានទម្លាក់គ្រាប់បែកបរិមាណូ ឈ្មោះ "Fat Man" មកលើក្រុងណាហ្គាសាគី ប្រទេសជប៉ុន បណ្តាលឱ្យមនុស្សប្រមាណពី ៦ម៉ឺន ទៅ ៨ម៉ឺននាក់បានបាត់បង់ជីវិត។ នេះជាការទម្លាក់គ្រាប់បែកបរិមាណូលើកទី២ បន្ទាប់ពីលើកទី១ យន្តហោះអាមេរិក បានទម្លាក់គ្រាប់បែកឈ្មោះ "Little Boy" លើក្រុងហ៊ីរ៉ូស៊ីម៉ា កាលពីថ្ងៃទី៦សីហា ១៩៤៥ បណ្តាលឱ្យមនុស្សប្រមាណ ១៤ម៉ឺននាក់បាត់បង់ជីវិត។

គ្រាប់បែក "Fat Man" ដែលមានម្សៅ TNT ២២០០០តោន ត្រូវបានទម្លាក់ទៅលើក្រុងណាហ្គាសាគី កាលពីថ្ងៃទី៩សីហា ១៩៤៥។

ការទម្លាក់គ្រាប់បែកបរិមាណូលើកទី២នេះ បានធ្វើឱ្យជប៉ុន ត្រូវបង្ខំចិត្តចុះចាញ់សង្គ្រាមលោកលើកទី២ ដោយគ្មានលក្ខខណ្ឌនាប៉ុន្មានថ្ងៃក្រោយមក។ អធិរាជជប៉ុន Hirohito បានប្រកាសចុះចាញ់សង្គ្រាមនៅថ្ងៃទី១៥សីហា ១៩៤៥ ដោយមានបន្ទូលថា៖ «**ការបន្តសង្គ្រាម អាចត្រឹមតែទទួលបានលទ្ធផលនៃការវិនាសសាបសូន្យរបស់ប្រជាជនជប៉ុនតែប៉ុណ្ណោះ**...»។

គួររំលឹកថា តាមរយៈសេចក្តីប្រកាសផតស្តាម (Potsdam Declaration) ចុះថ្ងៃទី២៦កក្កដា ១៩៤៥ អង់គ្លេស ចិន និងអាមេរិក បានទាមទារឱ្យកងទ័ពជប៉ុន ចុះចាញ់ដោយគ្មានលក្ខខណ្ឌ ពោលគឺឱ្យកងទ័ពជប៉ុន បោះបង់អាវុធទាំងស្រុង រួចអនុញ្ញាតឱ្យត្រឡប់ទៅផ្ទះរបស់ពួកគេវិញ រស់នៅដោយភាពសុខសាន្ត។ ប៉ុន្តែជប៉ុន មិនយល់ព្រមឡើយ ជាហេតុធ្វើឱ្យអាមេរិក ត្រូវបង្ខំចិត្តប្រើធម៌ក្តៅ ដោយមានការទម្លាក់គ្រាប់បែកបរិមាណូ ដល់ទៅ២ដងបែបនេះ ហើយក៏នឹងអាចមានការទម្លាក់គ្រាប់បែកបន្ថែមទៀតផងដែរ ប្រសិនបើជប៉ុន នៅតែចចែសមិនព្រមចុះចាញ់សង្គ្រាមទេនោះ។

នៅថ្ងៃទី២ ខែកញ្ញា ឆ្នាំ១៩៤៥ ជប៉ុន បានចុះកិច្ចព្រមព្រៀងចុះចាញ់សង្គ្រាមជាផ្លូវការ ដែលធ្វើឱ្យពិភពលោកទាំងមូល បានបញ្ចប់សង្គ្រាមលោកលើកទី២ទាំងស្រុង ចាប់ពីពេលនោះមក៕

អត្ថបទទាក់ទង៖ ជប៉ុន រំលឹកខួប៧៣ឆ្នាំ នៃការទម្លាក់គ្រាប់បែកបរិមាណូរបស់អាមេរិក លើក្រុងហ៊ីរ៉ូស៊ីម៉ា

ប្រភព៖ History ប្រែសម្រួល៖ សំភី