ករណីឆេះផ្សាររ៉ុងក្លឿ៖ ឆក់ខ្សែភ្លើង ២នាក់ និងបំផ្លាញតូបអស់៨

2018-08-19 01:09:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មនុស្ស២នាក់បានសន្លប់ ដោយឆក់ខ្សែភ្លើង និងតូបចំនួន៨ (ក្នុងជួរអគារ B និង C) ត្រូវបានអគ្គិភ័យលេបត្របាក់ទាំងស្រុង ក្នុងហេតុការណ៍ឆេះផ្សាររ៉ុងក្លឿ ស្ថិតក្នុងស្រុកអារញ្ញ ខេត្តស្រះកែវ ប្រទេសថៃ ជាប់ព្រំដែនកម្ពុជា-ថៃ កាលពីថ្ងៃទី១៨សីហាម្សិលមិញ។ នេះបើតាមការឱ្យដឹងពីលោក សេម មករា នាយរងប៉ុស្តិ៍នគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត។ ប៉ុន្តែលោកមិនបានបញ្ជាក់ពីអត្តសញ្ញាណជនរងគ្រោះទាំង២នាក់នេះឡើយ។

លោកបន្តថា តូបទាំងនោះមានលក់ទំនិញដូចជា ហ្គីតា បាស់ ចាន ស្រោមពូកខ្នើយ ខ្សែក្រវាត់ គ្រឿងស្ពាន់ គ្រឿងឡាន ស្បែកជើង និងស្រោមជើងជាដើម។

ហេតុការណ៍ឆេះផ្សាររ៉ុងក្លឿ កាលពីថ្ងៃទី១៨សីហា ២០១៨។ រូបថត៖ អគ្គស្នងការដ្ឋាននគរបាលជាតិ

អគ្គិភ័យនេះ បានកើតឡើងនៅម៉ោង ៦ល្ងាច ហើយត្រូវបានរថយន្តពន្លត់អគ្គិភ័យរបស់សមត្ថកិច្ចថៃ និងកាស៊ីណូនៅក្រុងប៉ោយប៉ែត ខេត្តបន្ទាយមានជ័យ ធ្វើអន្តរាគមន៍បាញ់ពន្លត់រហូតដល់ម៉ោង ៧ និង៤០នាទីយប់ ទើបរលត់ទាំងស្រុង។

បើតាមការចេញផ្សាយរបស់អគ្គស្នងការដ្ឋាននគរបាលជាតិ ក្នុងចំណោមតូបទាំង៨ ដែលរងការឆាបឆេះនោះ ភាគច្រើនគឺជាតូបដែលអាជីវករខ្មែរលក់មានដូចជា ពូក កម្រាលពូក ផាហ៊ុម ម៉ុង និងភួយ។ តូបដែលអាជីវករខ្មែរជួលនេះ មានតម្លៃពី១ម៉ឺនទៅ២ម៉ឺនបាតក្នុង១ខែ៕

ប្រភព៖ ដើមអម្ពិល ប្រែសម្រួល៖ សំភី