នាយឧត្តមសេនីយ៍ មាស សុភា លាលែងពីបេក្ខជនតំណាងរាស្ត្រមណ្ឌលខេត្តព្រះវិហារ

2018-08-20 03:02:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក មាស សុភា បេក្ខជនពេញសិទ្ធិនៅមណ្ឌលខេត្តព្រះវិហារ នៃគណបក្សប្រជាជនកម្ពុជា បានដាក់ពាក្យលាលែងជាបេក្ខជនតំណាងរាស្ត្រទៅគណៈកម្មាធិការជាតិរៀបចំការបោះឆ្នោត (គ.ជ.ប)។ ចំណែកលោក សួស យ៉ារ៉ា ដែលជាបេក្ខជនបម្រុងលេខរៀងទី១ នៅមណ្ឌលខេត្តព្រះវិហារ ត្រូវបានជំនួសលោក មាស សុភា។

លោក មាស សុភា

លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត បានបញ្ជាក់ប្រាប់ **[ខ្លីៗ]** នៅព្រឹកថ្ងៃទី២០ ខែសីហា នេះថា លោក មាស សុភា បានដាក់ពាក្យលាលែងពីបេក្ខជនតំណាងរាស្ត្រមណ្ឌលខេត្តព្រះវិហារ តាំងពី គ.ជ.ប មិនទាន់ធ្វើការបែងចែកអាសនៈ ពោលនៅពេលដែល គ.ជ.ប កំពុងតែរៀបចំលទ្ធផលបោះឆ្នោត គឺគាត់បានដាក់ពាក្យសុំលាលែង។ ហើយនៅពេលដែលប្រកាសបេក្ខជនជាប់ឆ្នោត ឈ្មោះរំកិលបន្ទាប់ពីគាត់ គឺលោក សួស យ៉ារ៉ា។

លោក សួស យ៉ារ៉ា

ចំណែកលោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិបានឲ្យដឹងថា ការលាលែងពីបេក្ខជនតំណាងរាស្ត្ររបស់លោកនាយឧត្តមសេនីយ៍ មាស សុភា គឺនៅមិនទាន់ដឹងថា គាត់នឹងត្រូវមកកាន់តួនាទីអ្វីនៅឡើយទេ គឺជាក់ស្តែងរង់ចាំការប្រកាសរដ្ឋាភិបាលថ្មី។

រីឯលោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងប្រាប់ [ខ្លីៗ] ថា "នៅពេលដែលជាប់ជាតំណាងរាស្ត្រហើយ បើគាត់ទៅធ្វើការនៅកន្លែងផ្សេង គឺត្រូវលាលាលែងហើយ និងអ្នកតំណាងរាស្ត្រដែលមានបញ្ជីឈ្មោះបន្ទាប់ ត្រូវឡើងមកជំនួស នេះជាលក្ខខណ្ឌការងារដែលមានចែងនៅក្នុងច្បាប់"។

អ្នកនាំពាក្យបានបញ្ជាក់ថា នឹងមានតំណាងរាស្ត្ររបស់គណបក្សប្រជាជនកម្ពុជា មួយចំនួនទៀតនឹងត្រូវលាលែង ពីព្រោះសមាសភាពគណៈរដ្ឋមន្ត្រីត្រូវយកចេញពីតំណាងរាស្ត្រជាប់ឆ្នោត ហើយនៅពេលដែលអ្នកណាដែលមានឈ្មោះជាសមាជិករាជរដ្ឋាភិបាល គឺត្រូវលាលែងហើយ។ លោកបន្ថែមថា ដោយសារមិនទាន់ចេញសមាសភាពគណៈរដ្ឋមន្ត្រី គឺនៅមិនទាន់ដឹងថា អ្នកណាខ្លះដែលត្រូវលាលែងទេ៕

អត្ថបទទាក់ទង៖ មេទ័ព ២រូប ជាប់ជាតំណាងរាស្រ្ដ អាណត្តិថ្មីនេះ

អត្ថបទ៖ សោភា