Google ត្រូវបានបង្កើតឡើងដោយសារការប្រកបឈ្មោះច្រឡំ
- 2018-09-04 07:05:01
- ចំនួនមតិ 0 | ចំនួនចែករំលែក 0
Google ត្រូវបានបង្កើតឡើងដោយសារការប្រកបឈ្មោះច្រឡំ
ចន្លោះមិនឃើញ
ប្រវត្តិរបស់ Google ចាប់ផ្ដើមឡើងនៅខែមករា ឆ្នាំ១៩៩៦ ដែលគ្រានោះវាជាគម្រោងស្រាវជ្រាវមួយបង្កើតឡើងដោយនិស្សិតថ្នាក់បណ្ឌិត២រូបគឺលោក Larry Page និងលោក Sergey Brin នៃសកលវិទ្យាល័យ Stanford ក្នុងរដ្ឋ California សហរដ្ឋអាមេរិក។
អ្នកស្រាវជ្រាវទាំង២ បានហៅបច្ចេកវិទ្យាដែលខ្លួនបង្កើតនេះថា "PageRank" ដែលជាប្រភេទ search engine ថ្មី អាចកំណត់ឃើញនូវវិបសាយជាប់ពាក់ព័ន្ធក្នុង page ជាច្រើនទំព័រ ដែលអ្នកប្រើប្រាស់អ៊ីនធឺណិតបានស្វែងរក។
ឈ្មោះដំបូងរបស់ Google ដែលលោក Page និងលោក Brin ដាក់ឲ្យគឺ "BackRub"។ យ៉ាងណាមិញ ឈ្មោះនេះប្រើមិនបានប៉ុន្មាន ក៏ត្រូវស្ថាបនិកទាំង២ប្ដូរទៅជា "Google" វិញ។ ឈ្មោះ "Google" នេះទៀតសោតគឺមិនមែនលោក Page និងលោក Brin ចង់សរសេរបែបនេះឡើយ ពោលគឺឈ្មោះនេះបង្កើតឡើងដោយសារការប្រកបអក្សរខុសរបស់អ្នកទាំង២។ ឈ្មោះដែលអ្នកទាំង២ចង់ប្រើនោះគឺ "Googol" ដែលសំដៅទៅលើចំនួនលេខ ១ ដែលមានលេខសូន្យ (0) ចំនួន ១០០នៅពីក្រោយ។
ស្ថិតក្នុងដំណាក់កាលទី១ Google បានជ្រកនៅក្រោម domain ផ្លូវការរបស់សកលវិទ្យាល័យ Stanford។ Domain របស់ Google ពេលនោះ មានចំនួន ២ គឺ google.stanford.edu និង z.standford.edu។
លុះមកដល់ថ្ងៃទី១៥ ខែកញ្ញា ឆ្នាំ១៩៩៧ Google ក៏បានចុះឈ្មោះប្រើ domain ផ្ទាល់ខ្លួនមួយ។ ចំណែកឯក្រុមហ៊ុនផ្លូវការ Google ចាប់ផ្ដើមដំណើរការលើកដំបូងនៅថ្ងៃទី៤ ខែកញ្ញា ឆ្នាំ១៩៩៨ ដែលមានទីតាំងស្ថិតនៅក្នុងហ្គារាសមួយកន្លែងរបស់លោកស្រី Susan Wojcicki ដែលជាមិត្តភ័ក្ដិលោក Page និងលោក Brin៕