អាមេរិក ស្កាត់ជាប់យន្តហោះទម្លាក់គ្រាប់បែករុស្ស៊ី២គ្រឿង នៅក្បែររដ្ឋ Alaska

2018-09-13 02:23:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យន្តហោះចម្បាំងអាមេរិកចំនួន២គ្រឿងម៉ាក F-22 បានហោះស្កាត់យន្តហោះទម្លាក់គ្រាប់បែករុស្ស៊ី២គ្រឿងម៉ាក TU-95 កាលពីថ្ងៃទី១១ ខែកញ្ញា ឆ្នាំ២០១៨។ នេះបើយោងតាមបញ្ជាការដ្ឋានការពារដែនអាកាសអាមេរិកខាងជើង។

យន្តហោះទម្លាក់គ្រាប់បែករុស្ស៊ី TU-95 (រូបភាព៖ក្រសួងការពារជាតិរុស្ស៊ី)

បើតាមប្រភពដដែល បញ្ជាក់ថា ការហោះស្កាត់នេះ ធ្វើឡើងក្រោយពីយន្តហោះទម្លាក់គ្រាប់បែករុស្ស៊ីបានចូលដល់តំបន់អត្តសញ្ញាណការពារដែនអាកាសអាមេរិក ដែលស្ថិតនៅចម្ងាយប្រមាណជា ៣២០គីឡូម៉ែត្រពីឆ្នេរសមុទ្រភាគខាងលិចរដ្ឋ Alaska។ យន្តហោះទម្លាក់គ្រាប់បែករុស្ស៊ី ដែលមកក្បែររដ្ឋ Alaska ត្រូវហោះអមដំណើរដោយយន្តហោះចម្បាំងរុស្ស៊ី SU-35 ចំនួន ២គ្រឿងផងដែរ។ យ៉ាងណាមិញ យន្តហោះចម្បាំងនោះស្ថិតនៅក្នុងដែនអាកាសអន្តរជាតិ ដោយមិនបានចូលដល់ដែនអាកាសអាមេរិក ឬកាណាដានោះទេ គឺហោះចូលតែយន្តហោះទម្លាក់គ្រាប់បែក២គ្រឿង។

សូមជម្រាបថា នេះជាលើកទី២ហើយដែលយន្តហោះចម្បាំងអាមេរិក F-22 បានស្កាត់ជាប់យន្តហោះទម្លាក់គ្រាប់បែករុស្ស៊ីពីឆ្នេរសមុទ្ររដ្ឋ Alaska គិតនៅក្នុងខែកញ្ញា ឆ្នាំ២០១៨។ កាលពីថ្ងៃទី១ កញ្ញា អាមេរិកបានស្កាត់យន្តហោះទម្លាក់គ្រាប់បែក Tu-95s របស់រុស្ស៊ី ប៉ុន្តែកាលនោះមិនមានការអមដំណើរដោយយន្តហោះចម្បាំងដូចលើកនេះឡើយ៕

ប្រភព៖ CNN ប្រែសម្រួល៖ ឈាង.