ត្រាំ បើកភ្លើងខៀវឲ្យយកពន្ធលើទំនិញចិន ២០០ពាន់លានដុល្លារបន្ថែមទៀត

2018-09-15 06:22:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ដូណាល់ ត្រាំ ប្រធានាធិបតីអាមេរិក កាលពីថ្ងៃទី១៤កញ្ញាថា បានសម្រេចយកពន្ធលើទំនិញចិន ចំនួន ២០០ពាន់លានដុល្លារបន្ថែមទៀត។ នេះបើយោងតាមការចុះផ្សាយរបស់សារព័ត៌មាន Bloomberg, Fox News និង Reuters។

កំពង់ផែមួយ នៅចិន (រូបថត៖ Reuters)

ការសម្រេចរបស់លោក ត្រាំ ត្រូវបានធ្វើឡើងបន្ទាប់ពីលោកជួបជាមួយ លោក Steven Mnuchin រដ្ឋមន្ត្រីរតនាគារអាមេរិក លោក Wilbur Ross រដ្ឋមន្ត្រីក្រសួងពាណិជ្ជកម្ម និងលោក Robert Lighthizer តំណាំងពាណិជ្ជកម្មអាមេរិក។

បញ្ជារបស់លោក ត្រាំ គឺបន្ទាប់ពីលោក Mnuchin មានគម្រោងចរចាជាមួយភាគីចិន ដើម្បីដោះស្រាយសង្គ្រាមពាណិជ្ជកម្ម។ កន្លងមក អាមេរិកបានដំឡើងពន្ធ ២៥% លើទំនិញចិន ដែលស្មើនឹង ៥០ពាន់លានដុល្លារអាមេរិករួចទៅហើយ។

លោក ត្រាំ ប្រកាសថា នឹងអនុវត្តការទណ្ឌកម្មលើទំនិញចិន ២០០ពាន់លានដុល្លារក្នុងពេលដ៏ខ្លីខាងមុខ តែមិនបានបញ្ជាក់ពីកាលបរិច្ឆេទជាក់លាក់នោះទេ។

សូមរំឭកថា អាមេរិក បាននាំចូលទំនិញពីប្រទេសចិន ប្រមាណជា ៥០៥ពាន់លានដុល្លារ កាលពីឆ្នាំ២០១៧។ ចាប់ពីដើមឆ្នាំ រហូតដល់ខែកក្កដា ឆ្នាំ២០១៨ អាមេរិកនាំចូលទំនិញចិន កើនឡើង ៩% បើធៀបនឹងរយៈពេលដូចគ្នាកាលពីឆ្នាំមុន៕

ប្រភព៖ Channelnewsasia | RT ប្រែសម្រួល៖ លាភ.