ភ្លើងស្តុបថ្មីក្នុងរាជធានីភ្នំពេញ ត្រូវបានដំឡើងជិតគ្រប់ចំនួនហើយ

2018-09-23 06:59:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងនៅព្រឹកថ្ងៃទី២៣ កញ្ញាថា ភ្លើងស្តុបថ្មីចំនួន ១១៥ ដែលជាជំនួយរបស់ទីភ្នាក់ងារសហប្រតិបត្តិការអន្តរជាតិជប៉ុន JICA នោះ ពេលនេះ ត្រូវបានដំឡើង និងដាក់ឲ្យដំណើរការបានចំនួន ១០៥ហើយ។ ចំណែកនៅសល់ចំនួន ១០ស្តុបទៀត ត្រូវបានដំឡើងបង្គោល និងលាបគំនូសចរាចរណ៍រួចរាល់ហើយដែរ នៅសល់តែការតភ្ជាប់ និងដាក់ឲ្យដំណើរការក្នុងពេលឆាប់ៗនេះ។ នេះបើតាមការចុះផ្សាយរបស់វិបសាយក្រសួងព័ត៌មាន។

លោកបន្តថា កាលពីចុងសប្តាហ៍កន្លងទៅ ក្រុមការងារ បានដំឡើង និងដាក់ឲ្យដំណើរការភ្លើងស្តុបថ្មីដែលមានបំពាក់កាមេរ៉ានេះ ចំនួន៤ទីតាំង គឺទី១. ចំណុចប្រសព្វរវាងមហាវិថីព្រះសីហនុ និងមហាវិថីសុធារស ទី២. ចំណុច ប្រសព្វរវាងផ្លូវលេខ ៣៣៧ និងផ្លូវលេខ ៥៦៦ ទី៣. ចំណុចប្រសព្វរវាងផ្លូវលេខ ២៧១ និងផ្លូវលេខ ២០០២ និងទី៤. ចំណុចប្រសព្វរវាងផ្លូវជាតិលេខ៤ និងផ្លូវរោងចក្រ QMI។

ភ្លើងស្តុបមួយកន្លែង នៅក្នុងរាជធានីភ្នំពេញ

បច្ចុប្បន្នរាជធានីភ្នំពេញ មានភ្លើងស្តុបសរុបចំនួន ១៦០ទីតាំង ដែលកំពុងដំណើរការរាល់ថ្ងៃ ដើម្បីជួយសម្រួលដល់ការធ្វើចរាចរណ៍របស់ប្រជាពលរដ្ឋ ជាពិសេសកាត់បន្ថយបានច្រើននូវបញ្ហាកកស្ទះចរាចរណ៍។ ចំពោះការដាក់ឲ្យដំណើរការភ្លើងស្តុបប្រភេទថ្មីនេះ មន្ទីរសាធារណការរាជធានីភ្នំពេញ ក៏គ្រោងផលិតស្ពតវីឌីអូ ដើម្បីពន្យល់ពីរបៀបប្រើប្រាស់ផងដែរ ព្រោះភ្លើងស្តុបថ្មីនេះ មានលក្ខណៈទំនើបពិសេស ខុសប្លែកពីភ្លើងស្តុបចាស់។ លោក សាំ ពិសិដ្ឋ បញ្ជាក់បន្ថែម។

លោកប្រធានមន្ទីរ ឲ្យដឹងទៀតថា នៅសប្តាហ៍ក្រោយ រដ្ឋបាលរាជធានីភ្នំពេញ នឹងដាក់ឲ្យដំណើរការភ្លើងស្តុបចំនួន ៣ទីតាំង នៅកំណាត់ផ្លូវជាតិលេខ១ ក្នុងភូមិសាស្ត្ររាជធានីភ្នំពេញ ក្នុងចំណោមគម្រោងចំនួន៦ ដែលត្រូវដាក់បន្តបន្ទាប់គ្នា ខណៈបច្ចុប្បន្ន កំណាត់ផ្លូវនេះ មានតែភ្លើងស្តុបមួយប៉ុណ្ណោះ៕

អត្ថបទ៖ សំភី