ជប៉ុនគ្រោងកែច្នៃសំរាមនៅស្វាយរៀងឲ្យក្លាយជាគ្រឿងសំណង់ និងសង្ហារិម

2018-09-24 08:49:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនជប៉ុន មានគម្រោងសាងសង់រោងចក្រកែច្នៃសំរាមទៅជាគ្រឿងសំណង់ និងសង្ហារិមក្នុងទឹកដីខេត្តស្វាយរៀង នៃប្រទេសកម្ពុជា។ នេះបើយោងតាមកិច្ចពិភាក្សាការងារកាលពីពេលថ្មីៗកន្លងទៅរវាងលោក ម៉ែន វិបុល អភិបាលខេត្តស្វាយរៀង ជាមួយលោក YUSUKE OKUMUR នាយកក្រុមហ៊ុន GOMI RECYCLE 110 CO.,LTD របស់ជប៉ុន និងលោក YASUHARA តំណាងអង្គការ JICA។

គួរជម្រាបថា សព្វថ្ងៃនេះ សំរាមនៅក្រុងបាវិត មានការកើនឡើងជាលំដាប់ប្រមាណពី ១២០ ទៅ ១៧០តោនក្នុង១ថ្ងៃៗ ខណៈដែលពីមុនមានត្រឹមតែ ៧០ ទៅ ៩០តោនប៉ុណ្ណោះ។ នេះបើយោងតាមរបាយការណ៍ពីក្រុមហ៊ុនហាយប្រីដ ដែលកំពុងប្រតិបត្តិការប្រមូលសំរាមនៅទីប្រជុំជនក្រុងបាវិត ខេត្តស្វាយរៀង។

តំណាងក្រុមហ៊ុនហាយប្រីដមួយរូប បានបញ្ជាក់ថា បច្ចុប្បន្នក្រុមហ៊ុនលោកមានរថយន្តដឹកសំរាមចំនួន ១៩គ្រឿង និងកម្មករជិត ៥០នាក់។ លោកបន្តថា បើមានក្រុមហ៊ុនកែច្នៃសំរាមមកវិនិយោគនោះ ក្រុមហ៊ុនលោកនឹងស្វាគមន៍ជានិច្ច ព្រោះរាល់ថ្ងៃខណៈដែលដឹកសំរាមដល់ទីលានចាក់សំរាម ក្រុមហ៊ុនលោកត្រូវចំណាយថវិកាជួលកម្មករឲ្យដុតសំរាមចោលថែមទៀត៕

ប្រភព៖ រស្មីកម្ពុជា ប្រែសម្រួល៖ ឈាង.