កម្ពុជា ខកចិត្តចំពោះការសម្រេចរបស់ EU ជុំវិញដំណើរការដកការអនុគ្រោះពន្ធ

2018-10-11 03:24:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រាជរដ្ឋាភិបាលកម្ពុជា បានសម្តែងនូវការខកចិត្ត ចំពោះការសម្រេចចិត្តរបស់សហភាពអឺរ៉ុប EU ក្នុងការដាក់ចេញនូវដំណើរការនីតិវិធីជាផ្លូវការសម្រាប់ការដកជាបណ្តោះអាសន្ននូវការផ្តល់ភាពអនុគ្រោះពន្ធក្រោមកម្មវិធី "គ្រប់មុខទំនិញលើកលែងសព្វាវុធ (EBA)"។ នេះបើតាមសេចក្តីថ្លែងការណ៍របស់ក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី១០ ខែតុលា និងចេញផ្សាយជាសាធារណៈនៅថ្ងៃទី១១តុលា ២០១៨នេះ។

រាជរដ្ឋាភិបាលកម្ពុជា បានចាត់ទុកការសម្រេចចិត្តនេះថាជាភាពអយុត្តិធម៌បំផុត ដោយលើកឡើងថា សហភាពអឺរ៉ុប បានបដិសេធដោយចំហរអំពីវឌ្ឍនភាពគួរឱ្យកត់សម្គាល់ដែលប្រទេសកម្ពុជាសម្រេចបាន។

សេចក្តីថ្លែងការណ៍ដដែលនេះ បន្តថា «រាជរដ្ឋាភិបាលសោកស្តាយយ៉ាងខ្លាំង ចំពោះការចោទប្រកាន់យ៉ាងធ្ងន់ធ្ងរប្រឆាំងនឹងរាជរដ្ឋាភិបាល ដោយឈរលើមូលដ្ឋាននៃរបាយការណ៍បេសកកម្មរបស់សហភាពអឺរ៉ុប កាលពីខែកក្កដាកន្លងទៅ។ រាជរដ្ឋាភិបាលមានការខកចិត្តចំពោះកង្វះតម្លាភាពរបស់សហភាពអឺរ៉ុប ដែលមិនបានបង្ហាញនូវខ្លឹមសារនៃរបាយការណ៍នោះ ដែលសហភាពអឺរ៉ុបបានយកធ្វើជាមូលដ្ឋាននៃសេចក្តីសម្រេចចិត្តលំអៀងរបស់ខ្លួន»។

ប្រតិកម្មនេះ ធ្វើឡើងក្រោយពេលដែលលោកស្រី Federica Morgherini តំណាងជាន់ខ្ពស់នៃសហភាពអឺរ៉ុប ទទួលបន្ទុកគោលនយោបាយការបរទេស និងសន្តិសុខ និងលោកស្រី Celcillia Malmstrom ស្នងការអឺរ៉ុបសម្រាប់ពាណិជ្ជកម្ម បានធ្វើលិខិតរួមគ្នាអំពីការសម្រេចខាងលើនេះ ផ្ញើជូនរដ្ឋមន្រ្តីក្រសួងពាណិជ្ជកម្មកម្ពុជា កាលពីថ្ងៃទី៤តុលា ២០១៨។

សហភាពអឺរ៉ុបគូសបញ្ជាក់ថា ចំណាត់ការនេះ គឺដោយសារតែពុំមានការកែប្រែស្ថានភាពវិបត្តិប្រជាធិបតេយ្យ និងការរំលោភសិទ្ធិមនុស្សនៅកម្ពុជា ក្នុងរយៈកាលកន្លងមកនេះ។

ផ្អែកតាមបទបទបញ្ញត្តិ របស់សភា និងក្រុមប្រឹក្សាអឺរ៉ុប ក្រោយស្នងការអឺរ៉ុប ជូនដំណឹងទៅប្រទេសទទួលបានអត្ថប្រយោជន៍ពីប្រព័ន្ធអនុគ្រោះពន្ធ EBA អំពីការអនុវត្តនីតិវិធីលុបចោលប្រព័ន្ធអនុគ្រោះពន្ធនេះ ស្នងការអឺរ៉ុបនឹងធ្វើការតាមដាន និងវាយតម្លៃស្ថានភាពក្នុងប្រទេសទទួលអត្ថប្រយោជន៍រយៈពេល ៦ខែទៀត ចាប់ពីពេលជូនដំណឹងនេះ។ ក្នុងរយៈពេល ៦ខែបន្ទាប់ពីចប់រយៈពេលខាងដើមនេះ ស្នងការអឺរ៉ុប នឹងធ្វើសេចក្ដីសម្រេចចិត្ត ថាតើគួរបញ្ឈប់នីតិវិធីលុបចោលប្រព័ន្ធអនុគ្រោះពន្ធជាបណ្ដោះអាសន្ននេះ ឬ ធ្វើការលុបចោលប្រព័ន្ធអនុគ្រោះពន្ធជាបណ្ដោះអាសន្ន នេះតែម្ដង៕

អត្ថបទ៖ សំភី