៩ខែ ឆ្នាំ២០១៨ ទុនវិនិយោគវិស័យសំណង់មានជិត៥ពាន់លានដុល្លារ

2018-10-17 07:05:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងរយៈពេល៩ខែ ឆ្នាំ២០១៨នេះ អាជ្ញាធរថ្នាក់ជាតិ និងរាជធានីខេត្ត បានផ្ដល់លិខិតអនុញ្ញាត សាងសង់ សរុប ២៥៤១គម្រោង មានផ្ទៃក្រឡាសរុបជាង ១០លានម៉ែត្រការ៉េ ហើយមានតម្លៃប៉ាន់ស្មានទុនវិនិយោគក្នុងវិស័យសំណង់ប្រមាណ ៤៨២០លានដុល្លារ។ ការវិវឌ្ឍវិស័យសំណង់រយៈពេល ៩ខែកន្លងមកនេះ បានចូលរួមចំណែកយ៉ាងសំខាន់ក្នុងការទ្រទ្រង់កំណើនសេដ្ឋកិច្ចជាតិ បន្ទាប់ពីវិស័យឧស្សាហកម្ម កសិកម្ម ទេសចរណ៍។ នេះបើតាមការបញ្ជាក់របស់លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅក្នុងសន្និសីទកាសែតកាលពីម៉ោងជាង១១ព្រឹក ថ្ងៃទី១៧ ខែតុលា នៅទីស្ដីការក្រសួង។

លោកបន្តថា នៅក្នុងរយៈពេល ៩ខែនេះដែរ ក៏មានការវិនិយោគរបស់វិស័យឯកជនមកពី បរទេសចំនួន ៣៣គម្រោង ផ្ទៃក្រឡាសំណង់ជាង ១លានម៉ែត្រការ៉េ និងមានតម្លៃប៉ាន់ស្មានទុនវិនិយោគជាង ៤៨៤លានដុល្លារ។ ហើយក្នុងរយៈពេល៩ខែ ក្រសួងរៀបចំដែនដី នគរូបនីយកម្ម និងសំណង់ បានចុះបញ្ជីក្រុមហ៊ុនសិក្សាគម្រោងប្លង់ និងសាងសង់ នៅមានសុពលភាព ១០៧០ក្រុមហ៊ុន ក្នុងនោះក្រុមហ៊ុនសិក្សាគម្រោងប្លង់ មាន៤២ក្រុមហ៊ុន , ក្រុមហ៊ុនសាងសង់មាន១០២៨ក្រុមហ៊ុន។ ក្នុងនោះក៏មានក្រុមហ៊ុនសិក្សាគម្រោងប្លង់ មកពីបរទេសដែលនៅមានសុពលភាពនៅឡើយ មានចំនួន៣៦៦ក្រុមហ៊ុន។ ក្រសួងក៏បានចុះបញ្ជីរូបវន្តបុគ្គលសិក្សាគម្រោងប្លង់ស្ថាបត្យកម្ម ក៏ដូចជាប្លង់គ្រឿងផ្គុំសំណង់ ដែលមានចំនួន១៤០នាក់។ នៅក្នុងនោះមានស្ថាបត្យករចំនួន៨៦រូប ក្នុងនោះមានជនបរទេស ៣រូប និងមានវិស្វករ ៤៦រូប និងមានបរទេស១រូប។

លោក ឡៅ ទិព្វសីហា បានបញ្ជាក់ថា គិតចាប់ពីឆ្នាំ២០១៤ រហូតមកដល់៩ខែ ឆ្នាំ២០១៨នេះ គណៈស្ថាបត្យករកម្ពុជា បានចុះបញ្ជីសវនករបានចំនួន៧១៣រូប។ ដោយឡែករយៈពេល៩ខែ ឆ្នាំ២០១៨នេះ គណៈស្ថាបត្យករកម្ពុជា បានដំណើរការចុះបញ្ជីបាន៥៧រូប និងមានបរទេសចំនួន២រូប។

លោកបន្តថា ចំពោះសំណង់បុរីលំនៅឋាន និងសំណង់អគារខ្ពស់ៗ ក្នុងរយៈពេល៩ខែនេះ គឺមានបុរីលំនៅឋាន ចំនួនសរុប៤១ទីតាំង។ ហើយគិតរហូតមកដល់ពេលបច្ចុប្បន្ននេះ គឺមានបុរីលំនៅឋាន ឬក៏លំនៅឋានលក្ខណៈបុរី មានចំនួន២២៨ទីតាំង និងមានអ្នកស្នាក់នៅពី ៦៥ ទៅ៧៥% ដែលបានស្នាក់នៅក្នុងបុរីលំនៅឋាន។ ចំពោះអគារខ្ពស់ៗចាប់ពី៥ជាន់ មាន៩២អគារ។ ហើយគិតចាប់ពីឆ្នាំ២០០៥មកដល់ពេលច្ចុប្បន្ននេះ នៅរាជធានីភ្នំពេញ មានអគារខ្ពស់ពី៥ជាន់ឡើងទៅមានចំនួន ១០៨៤អគារ។

លោក ឡៅ ទិព្វសីហា បានអះអាងថា ក្នុងរយៈពេល៩ខែ ឆ្នាំ២០១៨ វិស័យសំណង់ និងអចលនទ្រព្យមានការរីកចម្រើនយ៉ាងខ្លាំង និងបានរួមចំណែកយ៉ាងសំខាន់ក្នុងការអភិវឌ្ឍវិស័យសេដ្ឋកិច្ចជាតិ៕

អត្ថបទ៖ សោភា