ធារី នឹងជួយឲ្យ Terengganu ឈ្នះពាន Malaysia Cup ដើម្បីមនុស្ស២នាក់

2018-10-25 03:21:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ខ្សែបម្រើការពាររបស់ក្រុមជម្រើសជាតិកម្ពុជា និងក្លឹបបាល់ទាត់ Terengganu ធារី ចន្ថាប៊ីន បានប្ដេជ្ញាជួយឲ្យក្លឹបឈ្នះពានរង្វាន់ Malaysia Cup ក្នុងការប្រកួតវគ្គផ្តាច់ព្រ័ត្រ ទល់នឹងក្លឹប Perak នាថ្ងៃសៅរ៍ ទី២៧ ខែតុលា ឆ្នាំ២០១៨ វេលាម៉ោង ៩យប់នៅកីឡដ្ឋាន Shah Alam ប្រទេសម៉ាឡេស៊ី ត្រូវនឹងម៉ោង ៨យប់នៅកម្ពុជា។

ធារី និងមិត្តរួមក្រុម Terengganu (រូបថត៖ Terengganu)

យោងតាមការចុះផ្សាយរបស់វេបសាយ News Straits Times កាលពីថ្ងៃទី២៣ ខែតុលា ឆ្នាំ២០១៨ ខ្សែបម្រើកូនខ្មែរកាត់បារាំងខាងលើ បាននិយាយថា ការឈ្នះពានរង្វាន់ Malaysia Cup គឺដើម្បីភរិយា និងកូនរបស់គេដែលកំពុងស្ថិតនៅក្នុងផ្ទៃ។

«ខ្ញុំនឹងខិតខំខ្លាំងបន្ថែមទៀតនៅថ្ងៃសៅរ៍ខាងមុខនេះ ព្រោះខ្ញុំចង់ធ្វើវា (ឈ្នះពាន) ដើម្បីភរិយារបស់ខ្លុំ គឺ Kate Sutherland ដែលបានលះបង់ជាច្រើន ជាពិសេសប្ដូរពីប្រទេសកាណាដា មករួមរស់ជាមួយខ្ញុំ និងកូនទីមួយរបស់ពួកយើងដែលនឹងកើតនៅខែមេសា ខាងមុខ»។ នេះជាសម្ដីរបស់ ធារី។

ធារី និងភរិយា Kate Sutherland (រូបថត៖ ទំព័រហ្វេសប៊ុកផ្លូវការរបស់ ធារី ចន្ថាប៊ីន)

កីឡាករដែលគេតែងតែស្គាល់ពីសមត្ថភាពក្នុងតួនាទី (Dirty Work) សម្រាប់ក្លឹប Terengganu បានបន្ថែមថា ការឈ្នះក្លឹប Johor Darul Ta'Zim (JDT) ជាការបោះជំហានដ៏វែងមួយដើម្បីក្លាយជាជើងឯក Malaysia Cup ជាលើកទី២ (Terengganu ឈ្នះពាន Malaysia Cup លើកទី១ កាលពីឆ្នាំ២០០១)។ «ពួកយើងបានយកឈ្នះ JDT ដែលជាក្រុមខ្លាំងបំផុតនៅក្នុងប្រទេស ដូច្នេះខ្ញុំជឿជាក់ថា វានឹងជួយជំរុញលើកទឹកចិត្តពួកយើងកាន់តែខ្លាំងឡើងនៅវគ្គផ្តាច់ព្រ័ត្រ»។

គួររំឭកថា Terengganu បានទម្លាក់ JDT ត្រឹមវគ្គពាក់កណ្ដាលផ្តាច់ព្រ័ត្រ ដោយលទ្ធផល ៣-២ (ជើងទីមួយ ដោយលទ្ធផល ១-០ និងជើងទីពីរ ២-២) ៕

អត្ថបទ៖ លាភ.