ពន្ធដាររកចំណូលបានជិត ២ពាន់លានដុល្លារ ក្នុងរយៈពេល ១០ខែ

2018-11-08 02:40:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងរយៈពេល ១០ខែ នៃឆ្នាំ២០១៨នេះ អគ្គនាយកដ្ឋានពន្ធដារ ទទួលបានចំណូលពន្ធ-អាករគ្រប់ប្រភេទ ដែលប្រមូលបាន (តាមប្រព័ន្ធអនឡាញ) មានចំនួន ៧៤៩៤,៨៥ពាន់លានរៀល (ជាង ១,៨៧ពាន់លានដុល្លារ) ស្មើនឹង ៩៧,៤២% នៃផែនការ។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ កាលពីថ្ងៃទី៧ ខែវិច្ឆិកា ឆ្នាំ២០១៨។

លោក គង់ វិបុល អគ្គនាយកនៃអគ្គនាយកដ្ឋានពន្ធដារ ក្នុងកិច្ចប្រជុុំបូកសរុបលទ្ធផលការប្រមូលពន្ធ-អាករ ប្រចាំខែតុលា ឆ្នាំ២០១៨ កាលពីថ្ងៃទី៧វិច្ឆិកា។ រូបថត៖ FB អគ្គនាយកដ្ឋានពន្ធដារ

ប្រសិនបើប្រៀបធៀបនឹងរយៈពេលដូចគ្នា កាលពីឆ្នាំ២០១៧ ការប្រមូលពន្ធ-អាករ ឆ្នាំនេះ មានការកើនឡើងចំនួន ១១៨៨,៨៤ពាន់លានរៀល (ជាង ២៩៦លានដុល្លារ) ស្មើនឹង ១៨,៨៣%។ អគ្គនាយកដ្ឋានពន្ធដាររំពឹងថា ចំណូលពន្ធ-អាករគ្រប់ប្រភេទសម្រាប់ឆ្នាំ២០១៨ នឹងអាចប្រមូលបានគ្រប់ផែនការកំណត់ដោយច្បាប់។

គិតក្នុងខែតុលា ឆ្នាំ២០១៨ អគ្គនាយកដ្ឋានពន្ធដារប្រមូលពន្ធ-អាករ បានចំនួន ៧២៨,៤៨ពាន់លានរៀល (ជាង ១៨២លានដុល្លារ) ស្មើនឹង ៩,៤៧% នៃផែនការច្បាប់៕

អត្ថបទ៖ សំភី