CNN ប្ដឹងរដ្ឋបាល ដូណាល់ ត្រាំ ជុំវិញបញ្ហាអ្នកកាសែត

2018-11-14 03:55:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សារព័ត៌មាន CNN បានដាក់ពាក្យបណ្ដឹងទៅកាន់តុលាការក្រុងវ៉ាស៊ីនតោនឌីស៊ី ពាក់ព័ន្ធនឹងលោកប្រធានាធិបតីអាមេរិក ដូណាល់ ត្រាំ និងជំនួយការរបស់លោកមួយចំនួនទៀតដែលបានដកហូតកាតសារព័ត៌មានពីអ្នកកាសែតប្រចាំសេតវិមានលោក Jim Acosta ។

លោក Jim Acosta អ្នកសារព័ត៌មាន CNN និងលោកប្រធានាធិបតី ដូណាល់ ត្រាំ (រូបថត៖ Business Insider)

ក្នុងសេចក្ដីថ្លែងការណ៍របស់ CNN កាលពីថ្ងៃទី១៣ ខែវិច្ឆិកា ឆ្នាំ២០១៨ បានឲ្យដឹងថា រដ្ឋបាលលោក ដូណាល់ ត្រាំ បានរំលោភសិទ្ធិសេរីភាពសារព័ត៌មាន។ ក្រៅពីលោក ត្រាំ CNN បានប្ដឹងប្រធានការិយាល័យប្រធានាធិបតីលោក John F. Kelly, អនុប្រធានរងទំនាក់ទំនងលោក William Shine, អ្នកនាំពាក្យសេតវិមានលោកស្រី Sarah Huckabee Sanders, ប្រធានទីភ្នាក់ងារសម្ងាត់អាមេរិកលោក Randolph Alles និងភ្នាក់ងារសម្ងាត់លោក John Doe ដែលបានដកហូតកាតសារព័ត៌មានពីលោក Acosta ។

ជុំវិញពាក្យបណ្ដឹងនេះ សេតវិមាននៅថ្ងៃដដែលបានចេញសេចក្ដីថ្លែងការណ៍មួយ ដោយអះអាងថា CNN ធ្វើដើម្បីទាក់ទាញចំណាប់អារម្មណ៍ ហើយសេតវិមាន បានព្យាយាមការពារសិទ្ធិចូលយកព័ត៌មាន ក៏ប៉ុន្តែសកម្មភាពរបស់លោក Acosta បានធ្វើឲ្យរារាំងដំណើរការសនិ្ធសីទសារព័ត៌មាន កាលពីថ្មីៗកន្លងទៅ។ សេចក្ដីថ្លែងការណ៍បន្តថា ការសម្រេចដកហូតកាតសារព័ត៌មាននេះដែរ គឺដើម្បីត្រួតពិនិត្យលើទង្វើរបស់អ្នកសារព័ត៌មានរបស់ CNN ។

សូមជម្រាបថា ការសម្រេចរបស់សេតវិមាន ធ្វើឡើងបន្ទាប់ពីការប៉ះទង្គិចពាក្យសម្ដីរវាងលោក Acosta និងលោក ត្រាំ ក្នុងសន្និសីទសារព័ត៌មានមួយ កាលពីសប្ដាហ៍មុន។ អំឡុងសន្និសីទនោះ បុគ្គលិកសេតវិមានម្នាក់ បានព្យាយាមឆក់យកមីក្រូហ្វូនពីដៃលោក Acosta ដែលបានសួរ ត្រាំ ជុំវិញបញ្ហាជនអន្តោប្រវេសន៍ ដែលព្យាយាមឆ្លងចូលទៅកាន់ទឹកដីអាមេរិក។