គម្រោងរថភ្លើងល្បឿនលឿនរបស់វៀតណាម ជួបឧបសគ្គ

2018-11-14 07:52:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមប្រឹក្សាដែលទទួលបន្ទុកសិក្សាគម្រោងរថភ្លើងល្បឿនលឿន ដែលតភ្ជាប់ពីក្រុងហាណូយ ទៅកាន់ក្រុងហូជីមិញ បានបង្ហើបកាលពីពេលថ្មីៗនេះថា បញ្ហាតម្លៃ និងផលត្រឡប់យឺតយ៉ាវពីការវិនិយោគ (រួចដើម) គឺជាផលលំបាកក្នុងការទាក់ទាញអ្នកវិនិយោគ។ នេះបើយោងតាមវេបសាយ Viet Nam Express ចុះផ្សាយនាថ្ងៃទី១៤ ខែវិច្ឆិកា ឆ្នាំ២០១៨នេះ។

រថភ្លើងវៀតណាម ដែលបច្ចុប្បន្នមានល្បឿនត្រឹមតែ ៧០គីឡូម៉ែត្រក្នុង១ម៉ោង។ រូបថត៖ Vietnam News Agency

គម្រោងនេះ ត្រូវបានរំពឹងថា នឹងចំណាយអស់ទឹកប្រាក់ប្រមាណជាង ៥៨ពាន់លានដុល្លារអាមេរិក។

ក្រុមប្រឹក្សាដែលមានសមាជិកពីក្រុមហ៊ុនសាងសង់ក្នុងស្រុកចំនួន៣ បានលើកឡើងពីជម្រើសចំនួន ៣៖ ទី១- រដ្ឋាភិបាលវៀតណាម ត្រូវចំណាយទាំងស្រុងលើគម្រោងនេះ។ ទី២- រដ្ឋ ត្រូវចំណាយ បូករួមទាំងកម្ចីជំនួយអភិវឌ្ឍន៍ (ODA) និងទី៣- រដ្ឋត្រូវចំណាយ ៨០% ហើយ ២០% ទៀតនៃគម្រោង ត្រូវស្វែងរកពីអ្នកវិនិយោគផ្សេងៗ។

យោងតាមក្រសួងដឹកជញ្ជូនវៀតណាម គម្រោងរថភ្លើងល្បឿនលឿន ហាណូយ-ហូជីមិញ ត្រូវការថវិកាបន្ថែមទៀត សម្រាប់ប្រតិបត្តិការរយៈពេល ១០ឆ្នាំដំបូង។ ប្រភពបន្តថា អ្នកវិនិយោគក្នុងស្រុក គ្មានលទ្ធភាពរ៉ាប់រងតម្លៃសាងសង់នោះទេ ខណៈអ្នកវិនិយោគបរទេស មានការស្ទាក់ស្ទើរ ដោយសារតែពួកគេត្រូវការរយៈពេលវែង ទម្រាំអាចរួចថ្លៃដើមវិនិយោគ។

របាយការណ៍ស្ដីពីការសិក្សាគម្រោងរថភ្លើងល្បឿនលឿនរបស់ក្រុមប្រឹក្សានេះ នឹងត្រូវដាក់ជូនរដ្ឋសភាវៀតណាម សម្រេចនៅក្នុងខែតុលា ឆ្នាំ២០១៩ខាងមុខនេះ។ បើជោគជ័យ ការសាងសង់នឹងចាប់ផ្ដើមនៅក្នុងឆ្នាំ២០២៤ ហើយសាកល្បងនៅឆ្នាំ២០២៨ និងដាក់ឲ្យដំណើរការជាផ្លូវការ នៅក្នុងឆ្នាំ២០៣០។

ផ្លូវដែកនេះ ចែកជា ៣កំណាត់ គឺកំណាត់ទី១ ផ្លូវដែកដែលរត់ពីក្រុងហាណូយ ទៅក្រុង Vinh ក្នុងខេត្ត Nghe An ប្រវែង ២៨៥គីឡូម៉ែត្រ និងកំណាត់ទី២ ពីក្រុង Nha Trang ទៅក្រុងហូជីមិញ ប្រវែង ៣៦៤គីឡូម៉ែត្រ គ្រោងនឹងចំណាយថវិកាជាង ២៤ពាន់លានដុល្លារ។ ការសាងសង់កំណាត់ផ្លូវដែកទាំង២នេះ មានរយៈពេល ១០ឆ្នាំ ពីឆ្នាំ ២០២០ ដល់ ២០៣០។ ចំណែកកំណាត់ទី៣ ជាផ្លូវដែកដែលវែងជាងគេចាប់ពីក្រុង Vinh ទៅក្រុង Nha Trang ប្រវែង ៨៩៦គីឡូម៉ែត្រ។ កាលបរិច្ឆេទនៃការសាងសង់កំណាត់ផ្លូវដែកនេះ មិនទាន់ត្រូវបានកំណត់ឡើយ។

ក្រុមហ៊ុនវៀតណាមដដែលនេះ អះអាងថា រថភ្លើងល្បឿនលឿននេះ នឹងទាក់ទាញអ្នកដំណើរខ្លាំងបំផុត ប្រសិនបើរថភ្លើងអាចរត់ក្នុងល្បឿន ៣៥០គីឡូម៉ែត្រក្នុង១ម៉ោង (ស្មើនឹងរថភ្លើងជប៉ុន)។ ល្បឿននេះ អាចជួយកាត់បន្ថយពេលវេលាធ្វើដំណើរពីក្រុងហាណូយ ទៅហូជីមិញ បានយ៉ាងច្រើន ពោលគឺកាត់បន្ថយពី ៣០ម៉ោងនាពេលបច្ចុប្បន្ន មកនៅត្រឹម ៤,៥ម៉ោងតែប៉ុណ្ណោះ។ បើធ្វើដំណើរតាមយន្តហោះគឺចំណាយពេល ១ម៉ោង ៤០នាទី៕

អត្ថបទ៖ លាភ.