ដូណាល់ ត្រាំ ចាញ់ក្ដីបណ្ដឹងពាក់ព័ន្ធនឹងអ្នកសារព័ត៌មាន CNN

2018-11-17 06:22:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តុលាការក្រុងវ៉ាស៊ីនតោន បានសម្រេចឲ្យរដ្ឋបាលលោក ដូណាល់ ត្រាំ ចាញ់ក្ដី និងត្រូវផ្ដល់សិទ្ធិសម្រាប់អ្នកសារព័ត៌មានរបស់ CNN ដើម្បីចូលយកព័ត៌មានក្នុងសេតវិមានសាជាថ្មី ក្រោយពីសវនាការ ពាក់ព័ន្ធនឹងបណ្ដឹងរបស់សារព័ត៌មាននេះ កាលពីសុក្រ ទី១៦ ខែវិច្ឆិកា ឆ្នាំ២០១៨។

លោក Jim Acosta ត្រូវបានដកហូតកាតអ្នកសារព័ត៌មាន ក្នុងសេតវិមាន កាលពីសប្ដាហ៍មុន (រូបថត៖ The New York Times)

លោកប្រធានាធិបតីអាមេរិក ដូណាល់ ត្រាំ និងបុគ្គលិកការិយាល័យរបស់លោកមួយចំនួន ត្រូវបានរកឃើញថា បានបង្ហាញឥរិយាបថមិនសមរម្យ ចំពោះការដកហូតកាតអ្នកសារព័ត៌មានពីលោក Jim Acosta របស់ CNN ក្រោយសន្និសីទសារព័ត៌មានមួយនៅសេតវិមានកាលពីសប្ដាហ៍មុន។ លើលពីនេះ រដ្ឋបាលលោក ត្រាំ បានរំលោភសិទ្ធិសេរីភាពសារព័ត៌មាន ក្នុងការចូលយកព័ត៌មាន។

ជាការឆ្លើយតប លោក ត្រាំ បានថ្លែងក្នុងកិច្ចសម្ភាសជាមួយសារព័ត៌មាន Fox News ថា សេតវិមាននឹងរឹតបន្តឹងវិន័យសម្រាប់អ្នកសារព័ត៌មានអនុវត្ត។ ជាមួយគ្នានេះ លោកប្រធានាធិបតី បានព្រលានបណ្ដេញលោក Jim Acosta ចេញពីសន្និសីទនៅពេលក្រោយៗទៀត ប្រសិនបើគាត់បង្ហាញឥរិយាបថដូចពីលើកមុន។

សូមជម្រាបថា កាលពីសប្ដាហ៍មុន រដ្ឋបាលលោក ត្រាំ បានដកហូតកាតអ្នកសារព័ត៌មានពីលោក Jim ក្រោយការប៉ះទង្គិចពាក្យសម្ដីក្នុងសន្និសីទសារព័ត៌មាន ដែលឈានដល់ការបញ្ជាឲ្យដកយកមីក្រូហ្វូនពីក្នុងដៃរបស់លោក Jim ដែលកំពុងសួរសំណួរជុំវិញបញ្ហាជនអន្តោប្រវេសន៍មកពីតំបន់អាមេរិកកណ្ដាល។

ការសម្រេចរបស់លោក ត្រាំ ត្រូវបាន CNN ដាក់ពាក្យប្ដឹងទៅកាន់តុលាការក្រុងវ៉ាស៊ីនតោន កាលពីថ្ងៃទី១៣ ខែវិច្ឆិកា ឆ្នាំ២០១៨៕

អត្ថបទទាក់ទង

ប្រភព៖ nytimes ប្រែសម្រួល៖ លាភ.