ក្រសួងទេសចរណ៍ ចេញផែនការដើម្បីពន្យារការស្នាក់នៅរបស់ភ្ញៀវ

2018-11-29 03:23:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងទេសចរណ៍ កំពុងរៀបចំសេចក្ដីព្រាងអនុក្រឹត្យ ស្ដីពីការបង្កើត និងគ្រប់គ្រង់តំបន់ទេសចរណ៍ពិសេស ដើម្បីទាក់ទាញនិងពន្យារការស្នាក់នៅរបស់ភ្ញៀវទេសចរ។ នេះបើយោងតាមការបញ្ជាក់ពីលោក ទិត្យ ចន្ថា រដ្ឋលេខាធិការក្រសួង ក្នុងសិក្ខាសាលាពិគ្រោះយោបល់លើសេចក្ដីព្រាងអនុក្រឹត្យនេះ កាលពីថ្ងៃទី២៨ ខែវិច្ឆិកា ឆ្នាំ២០១៨។

ទេសចរ ២នាក់ កំពុងជិះទូកកាយ៉ាក់

លោក ទិត ចន្ថា បានបង្ហាញពី គោលដៅនៃការបង្កើតតំបន់ទេសចរណ៍ពិសេសនេះ គឺដើម្បីធ្វើពិពិធកម្មផលិតផលទេសចរណ៍ថ្មីៗ ក្នុងការទាក់ទាញទេសចរជាតិ-អន្តរជាតិ និងផ្តល់ឱកាសការងារបង្កើតឱកាសមុខរបរ ប្រាក់ចំណូល ពង្រឹងគុណភាពផលិតផល និងសេវាកម្មទេសចរណ៍ ការពន្យារពេលស្នាក់នៅរបស់ទេសចរ ទាក់ទាញវិនិយោគ ជាពិសេសវិនិយោគលើវិស័យទេសចរណ៍។

លោកបន្តថា តំបន់នេះ គឺផ្តោតជាសំខាន់លើការជំរុញកិច្ចអភិវឌ្ឍប្រកបដោយបរិយាប័ន្ន ក្នុងក្របខណ្ឌសេដ្ឋកិច្ច-សង្គមទាំងមូល ហើយក៏ដើម្បីប្រែក្លាយតំបន់ដែលមានសក្ដានុពលទេសចរណ៍ ទៅជាតំបន់វេសនដ្ឋានទេសចរណ៍ ឬតំបន់ទេសចរណ៍ពិសេស ដែលជាបណ្តុំផលិតផលសម្បទា សេវាកម្មទេសចរណ៍ និងសេវាកម្មគាំទ្រទេសចរណ៍ដទៃទៀត។

លោកអះអាងទៀតថា កម្ពុជាបច្ចុប្បន្នវិស័យទេសចរណ៍ពឹងផ្អែកភាគច្រើនលើសក្ដានុពលវប្បធម៌ ទោះបីជាវិស័យទេសចរណ៍កំពុងស្ថិតក្នុងកំណើនជាង ១០% ក្នុងមួយឆ្នាំៗ ដែលជាមោទនភាពសម្រាប់កម្ពុជាក៏ដោយ ប៉ុន្តែវិស័យនេះ អាចនឹងថយចុះមកវិញ ប្រសិនបើកម្ពុជាមិនបានបង្កើតនូវផលិតផលទេសចរណ៍ថ្មីៗបន្ថែមទៀត ទេនោះ។

លោកថា ទស្សនវិស័យរបស់រាជរដ្ឋាភិបាល គឺទាក់ទាញភ្ញៀវទេសចរឲ្យបានប្រមាណ ៣០លាននាក់ ទាំងភ្ញៀវជាតិ និងអន្តរជាតិ នៅអំឡុងឆ្នាំ២០៣០។ ដូច្នេះ កម្ពុជាមិនអាចពឹងផ្អែកទាំងស្រុងលើទេសចរណ៍វប្បធម៌ និងធម្មជាតិដូចសព្វថ្ងៃនោះទេ ប៉ុន្តែត្រូវខិតខំរៀបចំបង្កើតឲ្យមានផលិតជំនាញទេសចរណ៍ថ្មីៗ គឺទេសចរណ៍កែច្នៃ ដើម្បីបំពេញបន្ថែមលើសក្ដានុពលទេសចរណ៍វប្បធម៌ និងធម្មជាតិ។

លោក ទិត្យ ចន្ថា រដ្ឋលេខាធិការក្រសួងទេសចរណ៍ ដឹកនាំសិក្ខាសាលាពិគ្រោះយោបល់លើសេចក្ដីព្រាងអនុក្រឹត្យនេះ កាលពីថ្ងៃទី២៨ ខែវិច្ឆិកា ឆ្នាំ២០១៨ (រូប៖ ក្រសួងទេសចរណ៍)

គួរជម្រាបថា រយៈពេល១០ខែ ឆ្នាំ២០១៨ កម្ពុជាទទួលបានភ្ញៀវទេសចរអន្តរជាតិជាង ៤,៩លាន ក្នុងកំណើនប្រមាណ ១១% បើប្រៀបធៀបរយៈពេលដូចគ្នានៃឆ្នាំមុន។ ទន្ទឹមនោះ ក៏មានការរំពឹងថា ពេញមួយឆ្នាំ២០១៨នេះ កម្ពុជានឹងទទួលបានភ្ញៀវទេសចរអន្តរជាតិប្រមាណ ៦លាននាក់ ហើយទេសចរជាតិប្រមាណ ១០លាននាក់ ក្នុងកំណើនជាង ១០% បើប្រៀបធៀបឆ្នាំមុនផងដែរ៕

អត្ថបទ៖ លាភ.