រដ្ឋមន្រ្តីការបរទេសកម្ពុជា នឹងទៅបំពេញទស្សនកិច្ចផ្លូវការនៅប្រទេសអឺរ៉ុបចំនួន២

2018-12-09 01:21:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ នឹងអញ្ជើញទៅបំពេញទស្សនកិច្ចផ្លូវការដាច់ដោយឡែកពីគ្នា នៅប្រទេសហុងគ្រី និងរ៉ូម៉ានី ពីថ្ងៃទី១១ ដល់ ១៣ ខែធ្នូ ឆ្នាំ២០១៨។ នេះបើតាមសេចក្តីប្រកាសព័ត៌មានរបស់ក្រសួងការបរទេស កាលពីថ្ងៃទី៨ ខែធ្នូ ឆ្នាំ២០១៨។

ក្នុងអំឡុងពេលស្នាក់នៅប្រទេសហុងគ្រី លោក ប្រាក់ សុខុន នឹងជួបប្រជុំទ្វេភាគីជាមួយលោក ភីធ័រ ហ្ស៊ីចារតូ រដ្ឋមន្រ្តីការបរទេស និងពាណិជ្ជកម្មហុងគ្រី ដើម្បីពិភាក្សា និងស្វែងរកលទ្ធផលដើម្បីពង្រឹងកិច្ចសហប្រតិបត្តិការនយោបាយ និងសេដ្ឋកិច្ច រួមទាំងស្តាឡើងវិញនូវវិស័យសក្តានុពលមួយចំនួនសម្រាប់ផលប្រយោជន៍ទៅវិញទៅមកនៃប្រទេសទាំង២។ រដ្ឋមន្រ្តីទាំង២ នឹងផ្លាស់ប្តូរទស្សនៈគ្នាផងដែរទាក់ទងនឹងបញ្ហាតំបន់ និងអន្តរជាតិ ដែលជាកង្វល់រួម។

នៅឯចុងបញ្ចប់នៃកិច្ចប្រជុំ នឹងមានពិធីចុះហត្ថលេខាលើឯកសារកិច្ចសហប្រតិបត្តិការមួយចំនួន និងបញ្ចប់ដោយការធ្វើសន្និសីទសារព័ត៌មាន។

លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ

បន្ទាប់មកនៅថ្ងៃទី១២ ខែធ្នូ លោកឧបនាយករដ្ឋមន្រ្តី នឹងធ្វើដំណើរឆ្ពោះទៅកាន់ប្រទេសរ៉ូម៉ានី សម្រាប់កិច្ចពិភាក្សាទ្វេភាគីជាមួយលោក តេអូឌ័រ ម៉េឡិស្កានូ រដ្ឋមន្រ្តីការបរទេសរ៉ូម៉ានី ដែលក្នុងអំឡុងពេលនោះ រដ្ឋមន្រ្តីទាំង២ នឹងពិភាក្សាពីផលប្រយោជន៍ដែលកើនឡើង និងកិច្ចសហប្រតិបត្តិការប្រកបដោយផ្លែផ្កា រវាងប្រជាជាតិទាំង២ ដោយផ្អែកទៅលើផលប្រយោជន៍រួម និងការគោរពគ្នាទៅវិញទៅមក។

នៅចុងបញ្ចប់នៃកិច្ចពិភាក្សានេះ រដ្ឋមន្រ្តីការបរទេសកម្ពុជា-រ៉ូម៉ានី នឹងចុះហត្ថលេខាលើឯកសារមួយចំនួន ដែលទាក់ទងនឹងកិច្ចសហប្រតិបត្តិការនៃប្រទេសទាំង២ និងបញ្ចប់ដោយការធ្វើសេចក្តីប្រកាសព័ត៌មាន។

ក្រសួងការបរទេសឱ្យដឹងបន្ថែមថា ដំណើរទស្សនកិច្ចរបស់លោក ប្រាក់ សុខុន ទៅកាន់ប្រទេសអឺរ៉ុបទាំង២នេះ ត្រូវបានធ្វើឡើងដោយមើលឃើញនូវទំនាក់ទំនងការទូត ផលប្រយោជន៍សេដ្ឋកិច្ច ពាណិជ្ជកម្ម វិនិយោគ និងទេសចរណ៍ ដែលកំពុងតែរីកចម្រើន និងដើម្បីស្វែងរកការគាំទ្រផ្នែកនយោបាយបន្ថែមទៀត នៅលើឆាកអន្តរជាតិសម្រាប់បុព្វហេតុយុត្តិធម៌ សុចរិតភាពជាតិ និងការគោរពអធិបតេយ្យភាពគ្នាទៅវិញទៅមក៕

អត្ថបទ៖ សំភី