ផ្លូវបំបែកស្រែអំបិល-ទីរួមខេត្តកោះកុង ត្រូវបានបញ្ចប់ការជួសជុលហើយ

2018-12-11 03:02:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្លូវជាតិលេខ ៤៨ (ផ្លូវបំបែកស្រែអំបិល-ទីរួមខេត្តកោះកុង) ដែលមានចម្ងាយ ១៥០គីឡូម៉ែត្រ ត្រូវបានជួសជុលរួចរាល់ហើយ។ នេះបើតាមការបញ្ជាក់ពីទំព័រហ្វេសប៊ុកផ្លូវការរបស់ក្រសួងទេសចរណ៍ នៅថ្ងៃទី១១ ខែធ្នូ ឆ្នាំ២០១៨នេះ។

ការជួសជុលផ្លូវជាតិលេខ៤៨នេះ គឺបន្ទាប់ពីផ្លូវប្រវែង ៦៣គីឡូម៉ែត្រ ត្រូវទទួលរងការខូចខាតដោយជំនន់ទឹកភ្លៀង ការដឹកជញ្ជូនលើសទម្ងន់កម្រិតកំណត់ និងកត្តាធម្មជាតិផ្សេងៗទៀត។

បើយោងតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានគូសបញ្ជាក់ថា កំណាត់ផ្លូវដែលរងការខូចខាតប្រវែង ៦៣ គីឡូម៉ែត្រនេះ ត្រូវបានចែកចេញជា ៩១កំណាត់ដើម្បីជួសជុលដោយអង្គភាពធំៗចំនួន៣ រួមមាន៖ នាយកដ្ឋានគ្រឿងចក្រ និងស្ថាបនាផ្លូវ នាយកដ្ឋានជួសជុលនិងថែទាំផ្លូវថ្នល់ និងនាយកដ្ឋានវិស្វកម្មនៃក្រសួងការពារជាតិ។

លោកបន្តថា ការជួសជុល បានប្រើប្រាស់គ្រឿងចក្រសម្រាប់ជួសជុលប្រមាណ ៤០០គ្រឿង និងប្រើប្រាស់ថវិកាជាតិសរុបប្រមាណ ១២លានដុល្លារអាមេរិកសម្រាប់ធានាការជួសជុល និងថែទាំផ្លូវនេះ រហូតដល់ការចាប់ផ្ដើមអនុវត្តគម្រោង ស្តារ និងធ្វើឲ្យប្រសើរឡើង ក្រោមឥណទានប្រាក់កម្ចីរបស់សាធារណរដ្ឋកូរ៉េ (EDCF)។

ពិធីបុណ្យសមុទ្រលើកទី៧ (ជុំទី២) នៅខេត្តកោះកុងនឹងប្រព្រឹត្តទៅនាថ្ងៃទី១៤-១៥-១៦ ខែធ្នូខាងមុខ ក្រោមប្រធានបទ «ឆ្នេរស្អាត ពលរដ្ឋរមណីយ» ពោលគឺនៅសល់តែ៤ថ្ងៃទៀតប៉ុណ្ណោះ ពិធីបុណ្យនេះនឹងឈានចូលមកដល់ហើយ។ ពិធីបើកជាផ្លូវការ នឹងប្រព្រឹត្តទៅនៅល្ងាចថ្ងៃទី១៥ ធ្នូ ឆ្នាំ២០១៨ ក្រោមអធិបតីភាពសម្តេចនាយករដ្ឋមន្ត្រី ហ៊ុន សែន និងសម្តេច ប៊ុន រ៉ានី ហ៊ុនសែន៕

អត្ថបទទាក់ទង

អត្ថបទ៖ លាភ.