ចិន គ្រោងបង្កើតប្រព័ន្ធធារាសាស្ត្របូមទឹកដោយថាមពលពន្លឺព្រះអាទិត្យ នៅកម្ពុជា

2018-12-12 03:12:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក Ma Chengxiang នាយកវិទ្យាស្ថានស្រាវជ្រាវប្រព័ន្ធធារាសាស្ត្រ Gansu នៃសាធារណរដ្ឋប្រជាមានិតចិន បានលើកឡើងពីគម្រោង ស្ដីពីប្រព័ន្ធធារាសាស្ត្របូមទឹកដោយថាមពលពន្លឺព្រះអាទិត្យបម្រើឲ្យវិស័យកសិកម្ម នៅកម្ពុជា។ ការលើកឡើងនេះ ត្រូវបានធ្វើឡើងក្នុងជំនួបជាមួយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅទីស្ដីការក្រសួង កាលពីថ្ងៃទី១១ ខែធ្នូ ឆ្នាំ២០១៨។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជួបជាមួយលោក Ma Chengxiang នាយកវិទ្យាស្ថានស្រាវជ្រាវប្រព័ន្ធធារាសាស្ត្រ Gansu នៃសាធារណរដ្ឋប្រជាមានិតចិន (រូបថត៖ ក្រសួងកសិកម្ម រុក្ខាប្រមាញ់ និងនេសាទ)

លោករដ្ឋមន្ត្រី បានឲ្យដឹងថា គម្រោងប្រព័ន្ធធារាសាស្ត្របូមទឹកដោយថាមពលពន្លឺព្រះអាទិត្យបម្រើឲ្យវិស័យកសិកម្មនេះ នឹងផ្តល់ប្រយោជន៍យ៉ាងច្រើនដល់អ្នកផលិត ជាពិសេសផលិតកម្មកសិកម្មខ្នាតតូច តាមរយ:ការកាត់បន្ថយថ្លៃដើម ប្រេង ពលកម្ម ពេលវេលា រក្សាបាននូវបរិស្ថានល្អ និងធានាបាននូវនិរន្តរភាពនៃការផលិតឆ្លើយតបតាមសេចក្តីត្រូវការទីផ្សារ។

លោកបានបញ្ជាក់បន្ថែមថា ប្រសិនបើគម្រោងនេះទទួលបានជោគជ័យ នោះវានឹងជួយយ៉ាងច្រើនដល់ផលិតកម្មដំណាំស្រូវ ផលិតកម្មបន្លែ និងដំណាំកសិ-ឧស្សាហកម្មមួយចំនួនធំទៀត។ វានឹងរួមចំណែកលើកកម្ពស់ផលិតភាពផលិតកម្មក្នុងស្រុក ការបង្កើនទិន្នផល បង្កើនប្រាក់ចំណូលគ្រួសារ និងចូលរួមអភិវឌ្ឍន៍សេដ្ឋកិច្ចជាតិ ដើម្បីចូលរួមចំណែកសម្រេចឲ្យបានតាមចក្ខុវិស័យរបស់រាជរដ្ឋាភិបាល គឺប្រែក្លាយកម្ពុជាឲ្យទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ២០៣០។

ដើម្បីឲ្យគម្រោងអនុវត្តទៅដោយរលូន និងទទួលបានជោគជ័យ លោករដ្ឋមន្ត្រីបានស្នើសុំឲ្យវិទ្យាស្ថាន សហការជាមួយអគ្គនាយកដ្ឋានកសិកម្ម រកទីតាំងសមស្របណាមួយធ្វើការស្រាវជ្រាវ និងបង្ហាញដល់អ្នកប្រើប្រាស់ ជាពិសេសសហការជាមួយសហគមន៍កសិកម្ម នៅតាមបណ្តាខេត្តនានាដែលមានសក្តានុពលលើការផលិតដំណាំបន្លែ ស្រូវ និងឈើហូបផ្លែ។

ក្រៅពីនេះ លោករដ្ឋមន្រ្តីបានស្នើឲ្យសាស្រ្តាចារ្យ Ma ជួយសិក្សាស្រាវជ្រាវ និងវាយតម្លៃលើគុណភាពដីដើម្បីបង្កលក្ខណងាយស្រួលដល់ការកំណត់តំបន់ដាំដុះដំណាំ៕

អត្ថបទ៖ លាភ.