ព្រិលធ្លាក់នៅក្នុងស្ថានទូតអាមេរិក នារាជធានីភ្នំពេញ កាលយប់មិញនេះ

2018-12-14 03:53:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ព្រិលបានធ្លាក់ចុះមក នៅក្នុងបរិវេណស្ថានទូតអាមេរិក ប្រចាំកម្ពុជា នាម៉ោងប្រមាណ ៦ល្ងាច ថ្ងៃទី១៣ ខែធ្នូម្សិលមិញនេះ។ វាគឺជាព្រិលសិប្បនិមិត្ត ដែលស្ថានទូតអាមេរិកបានបង្កើតឡើង ដើម្បីអបអរពិធីបុណ្យណូអែល ដែលឈានចូលមកដល់ នាពេលឆាប់ៗខាងមុខ។

កម្មវិធីអបអរពិធីបុណ្យណូអែលនេះ ត្រូវបានស្ថានទូតអាមេរិក រៀបចំឡើងជារៀងរាល់ឆ្នាំ ដើម្បីឲ្យបុគ្គលិកស្ថានទូត រួមទាំងក្រុមគ្រួសាររបស់ពួកគេ បានជួបជុំគ្នាសប្បាយរីករាយ មុនរដូវឈប់សម្រាករបស់អាមេរិកមកដល់។ មិនខុសពីឆ្នាំមុនៗនោះទេ ស្ថានទូត បានរៀបចំជាភ្លើងពណ៌ លោតតាមចង្វាក់ភ្លេងណូអែល និងមានការបាញ់ព្រិលសិប្បនិមិត្ត ប្រៀបដូចព្រិលមែនទែនដែលកំពុងធ្លាក់នារដូវបុណ្យណូអែលនៅសហរដ្ឋអាមេរិកដែរ។ អ្នកចូលរួមដែលមានប្រមាណ ៥០០នាក់ បានថតយកទិដ្ឋភាពដ៏ស្រស់ស្អាតនេះ រីឯកុមារាកុមារី ដែលបានថតលេងជាមួយតាណូអែលរួចហើយនោះ ក៏បាននាំគ្នាលេងកម្សាន្តយ៉ាងសប្បាយក្រោមពពុះព្រិលដែលធ្លាក់ចុះមក។

អ្នកចូលរួម ជាពិសេសក្មេងៗ កំពុងសប្បាយរីករាយក្រោមពពុះព្រិលសិប្បនិមិត្ត

លោក Chris Grawburg អ្នកគ្រប់គ្រងសម្ភារៈឧបករណ៍ផ្សេងៗនៅស្ថានទូតអាមេរិកប្រចាំកម្ពុជា ដែលជាអ្នករៀបចំភ្លើងពណ៌ និងព្រិលសិប្បនិមិត្ត បានថ្លែងឲ្យដឹងថា លោក និងក្រុមការងារ បានរៀបចំទុកមុនប្រមាណពីរបីសប្ដាហ៍មកហើយ។ លោកបញ្ជាក់ថា ព្រិលដែលប្រៀបដូចពពុះដ៏ស្រស់ស្អាត ត្រូវបានបាញ់ចេញមកប្រមាណ ៣០នាទី នាម៉ោង ៦ល្ងាច។ ចំណែកភ្លើងពណ៌ គឺបើកចាប់ពីម៉ោង ៦ល្ងាច ដល់ម៉ោង ១០យប់ ប៉ុន្តែមិនមែនបើកតែថ្ងៃទី១៣ ខែធ្នូនេះទេ គឺបើកជារៀងរាល់ថ្ងៃ នាវេលាម៉ោងដដែលនេះ រហូតដល់ថ្ងៃឆ្លងឆ្នាំតែម្ដង។

គួររំលឹកថា ស្ថានទូតអាមេរិកប្រចាំកម្ពុជា បានរៀបចំកម្មវិធីភ្លើងពណ៌អបអរបុណ្យណូអែល តាំងពីឆ្នាំ ២០០៦ មក ចំណែកឯការធ្វើព្រិលសិប្បនិមិត្ត គឺចាប់តាំងពីឆ្នាំ ២០១១ មក។

ប្រិយមិត្តចង់ដឹងថាកម្មវិធីនេះ មានទិដ្ឋភាពបែបណា សូមទស្សនាបណ្ដុំរូបភាពជាច្រើនទៀត ដូចខាងក្រោម៖