រូបសំណាកព្រះបរមរតនកោដ្ឋ នឹងត្រូវដាក់សម្ពោធនៅប្រទេសរ៉ូមានី ក្នុងឆ្នាំ២០២០
- 2018-12-17 02:36:44
- ចំនួនមតិ 0 | ចំនួនចែករំលែក 0
រូបសំណាកព្រះបរមរតនកោដ្ឋ នឹងត្រូវដាក់សម្ពោធនៅប្រទេសរ៉ូមានី ក្នុងឆ្នាំ២០២០
ចន្លោះមិនឃើញ
ការធ្វើពិធីសម្ពោធរូបសំណាកចំនួន៤ ជាកិត្តិយសរំលឹកដល់ស្ថាបនិកអង្គការក្រុមប្រទេសនិយាយភាសាបារាំងហ្វ្រង់កូហ្វូនី (IOF) ដែលក្នុងចំណោមនោះក៏មានរូបសំណាកព្រះបរមរតនកោដ្ឋរបស់កម្ពុជា នៅក្នុងទីក្រុងប៊ុយការ៉េស ប្រទេសរ៉ូម៉ានី នឹងត្រូវធ្វើឡើងនៅឆ្នាំ២០២០ ដើម្បីអបអរសាទរខួបលើកទី៥០ឆ្នាំ នៃការបង្កើតអង្គការ IOF។ នេះបើតាមការថ្លែងរបស់រដ្ឋមន្រ្តីការបរទេសរ៉ូម៉ានី លោក តេអូឌ័រ ម៉េឡិស្កាណូ ទៅកាន់លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ក្នុងជំនួបពិភាក្សាគ្នាមួយ ក្នុងអំឡុងដំណើរទស្សនកិច្ចរបស់លោក នៅប្រទេសរ៉ូមានី ពីថ្ងៃទី១២ ដល់ ១៣ ខែធ្នូ ឆ្នាំ២០១៨។
យោងតាមឯកសាររបស់ក្រសួងវប្បធម៌ និងវិចិត្រសិល្បៈ ឱ្យដឹងថា រូបសំណាកព្រះបាទសម្តេច ព្រះនរោត្តម សីហនុ មានទំហំទទឹងកន្លះម៉ែត្រ កម្ពស់កន្លះម៉ែត្រ និងទម្ងន់២០គីឡូក្រាម ដោយចំណាយការរចនាសរុបប្រមាណជាង ២ពាន់ដុល្លារ។
រដ្ឋាភិបាលរ៉ូម៉ានី បានស្នើសុំកម្ពុជា នាំយករូបសំណាកនេះ ទៅដាក់តាំងបង្ហាញនៅទីលានហ្វ្រង់កូហ្វូនី ក្នុងទីក្រុងប៊ុយការ៉េស។ ក្រៅពីការតាំងរូបសំណាកព្រះបរមរតនកោដ្ឋ ក៏នឹងមានការដាក់តាំងរូបសំណាកស្ថាបនិកអង្គការហ្វ្រង់កូហ្វូនី អន្តរជាតិចំនួន ២រូបផ្សេងទៀតផងដែររួមមាន៖ រូបសំណាកលោក Leopold Sedar Senghor អតីតប្រធានាធិបតីសេណេហ្គាល់ និងលោក Habib bourguiba អតីតប្រធានាធិបតីទុយណេស៊ី។ បច្ចុប្បន្ននេះរូបសំណាកអតីតប្រធានាធិបតីសេណេហ្គាល់ ត្រូវបានដាក់តាំងរួចរាល់ហើយ។
សូមជម្រាបថា អង្គការហ្វ្រង់កូហ្វូនី គឺជាក្រុមប្រទេសប្រើប្រាស់ភាសាបារាំងបានក្លាយជាអង្គការដ៏ធំមួយ ថ្នាក់ពិភពលោក ត្រូវបានបង្កើតឡើងនៅឆ្នាំ១៩៧០ និងមានលក្ខន្តិកៈទទួលស្គាល់ជាលក្ខណៈអន្តរជាតិ។ ក្នុងនោះព្រះបាទសម្ដេច ព្រះនរោត្តម សីហនុ ក៏ជាស្ថាបនិកមួយអង្គនៃអង្គការនេះផងដែរ៕