កម្ពុជា ទទួលបាន ៨លានដុល្លារពីមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង

2018-12-18 01:34:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កិច្ចប្រជុំរដ្ឋមន្រ្តីការបរទេសនៃកិច្ចសហប្រតិបត្តិការមេគង្គ-ឡានឆាងលើកទី៤ បានឯកភាពលើបញ្ជីគម្រោងថ្មី ដែលផ្តល់ថវិកាគាំទ្រដោយមូលនិធិពិសេសនៃកិច្ចសហប្រតិបត្តិការមេគង្គ-ឡានឆាងឆ្នាំ២០១៨ មានចំនួនសរុប ១៣៨គម្រោង។ ក្នុងនោះកម្ពុជា មានចំនួន ១៩គម្រោង ដែលមានទឹកប្រាក់សរុបចំនួនប្រហែល ៨លានដុល្លារ។ នេះបើតាមសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំរដ្ឋមន្រ្តីការបរទេសមេគង្គ-ឡានឆាងលើកទី៤ នៅទីក្រុងហ្លួងប្រាបាង្គ ប្រទេសឡាវ ពីថ្ងៃទី១៦ ដល់ ១៧ ខែធ្នូ ឆ្នាំ២០១៨ ដែលគណៈប្រតិភូកម្ពុជា គឺដឹកនាំដោយលោកឧបនាយករដ្ឋមន្រ្តី ហោ ណាំហុង។

គម្រោងទាំងនេះភាគច្រើនគ្របដណ្តប់លើសកម្មភាពនានា ដែលទាក់ទងនឹងការពង្រឹងសមត្ថភាព ការសិក្សាស្រាវជ្រាវ ការអប់រំ និងកម្មវិធីផ្លាស់ប្តូរ។ កាលពីឆ្នាំ២០១៧ កម្ពុជាបានទទួលគម្រោងចំនួន ១៦ សរុបជាទឹកប្រាក់ជាង ៧លានដុល្លារ ដែលមកទល់ពេលនេះ មាន ២គម្រោងត្រូវបានបញ្ចប់ហើយនិងគម្រោង ១៤ផ្សេងទៀត កំពុងត្រូវបានអនុវត្ត។

ប្រជាពលរដ្ឋខ្មែរ កំពុងនេសាទត្រីក្នុងទឹកទន្លេមេគង្គ កាលពីពេលកន្លងមក

សូមបញ្ជាក់ថា កិច្ចប្រជុំនេះបានអនុម័ត "សេចក្តីប្រកាសរួមនៃកិច្ចប្រជុំរដ្ឋមន្រ្តីការបរទេសនៃកិច្ចសហប្រតិបត្តិការ មេគង្គ-ឡានឆាងលើកទី៤" និងកត់សម្គាល់លើ "របាយការណ៍វឌ្ឍនភាពឆ្នាំ២០១៨ ស្តីពីការអនុវត្ត ផែនការសកម្មភាព៥ឆ្នាំនៃកិច្ចសហប្រតិបត្តិការមេគង្គ-ឡានឆាង (២០១៨-២០២២)" ដែលបានលើកឡើងពីការអភិវឌ្ឍចុងក្រោយបំផុត និងសមិទ្ធផលដែលលេចចេញពីការអនុវត្តសេចក្តីសម្រេចនៃកិច្ចប្រជុំកំពូលលើកទី២ នៃកិច្ចសហប្រតិបត្តិការមេគង្គ-ឡានឆាង និងកិច្ចប្រជុំរដ្ឋមន្រ្តីការបរទេសមេគង្គ- ឡានឆាង លើកទី៣៕

អត្ថបទ៖ សំភី