ឧត្តមសេនីយ៍ឯក ហ៊ុន ម៉ាណែត៖ ការជ្រើសរើសនាយទាហាន គឺគ្មានការអន្តរាគមន៍នោះទេ
- 2019-01-04 03:22:33
- ចំនួនមតិ 0 | ចំនួនចែករំលែក 0
ឧត្តមសេនីយ៍ឯក ហ៊ុន ម៉ាណែត៖ ការជ្រើសរើសនាយទាហាន គឺគ្មានការអន្តរាគមន៍នោះទេ
ចន្លោះមិនឃើញ
លោកឧត្តមសេនីយ៍ឯកហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានអនុគណៈកម្មការប្រឡងជ្រើសរើសនាយទាហាន កងយោធពលខេមរភូមិន្ទ ឆ្នាំ២០១៩ បានលើកឡើងថា ការប្រឡងជ្រើសរើសនាយទាហាន ត្រូវធ្វើឱ្យត្រឹមត្រូវ និងគ្មានការអន្តរាគមន៍នោះទេ។
លោកបានលើកឡើងយ៉ាងដូច្នេះ នៅក្នុងពិធីបើកកិច្ចប្រជុំផ្សព្វផ្សាយ និងត្រួតពិនិត្យការងារប្រឡងជ្រើសរើសនាយទាហាន កងយោធពលខេមរភូមិន្ទឆ្នាំ២០១៩ កាលពីព្រឹកថ្ងៃទី៣ ខែមករា ឆ្នាំ២០១៩ នៅអគ្គបញ្ជាការដ្ឋាន កងយោធពលខេមរភូមិន្ទ។
លោក ហ៊ុន ម៉ាណែត បានថ្លែងថា៖ “ភារកិច្ចចម្បងរបស់យើងនៅក្នុងការជ្រើសរើសនាយទាហាននេះ គឺយើងជ្រើសរើសនាយទាហានដែលមានសមត្ថភាពពិតប្រាកដ ទៅតាមវិធានការ វិធីសាស្ត្រតម្លាភាព ប្រសិទ្ធភាពយុត្តិធម៌។ គឺជាគោលដៅធំដែលថ្នាក់ដឹកនាំប្រគល់ឱ្យសង្ឃឹមថាគណៈកម្មការនឹងទទួលបានជោគជ័យបន្ថែមទៀតដោយសិក្សាអំពីចំណុចខ្វះខាតពីឆ្នាំកន្លងទៅ។ យើងត្រូវធ្វើផែនការឱ្យច្បាស់លាស់ទាំងនីតិវិធីសម្ភារៈពេលវេលាសំដៅយកសុក្រិតភាព និងប្រសិទ្ធភាព"។
ជាមួយគ្នានេះលោកឧត្តមសេនីយ៍ឯក ហ៊ុន ម៉ាណែត ក៏បានណែនាំ និងបានដាក់បទបញ្ជាយ៉ាងម៉ឺងម៉ាត់ទៅដល់ក្រុមការងារថ្នាក់កណ្តាល នៃអនុគណៈកម្មការប្រឡងជ្រើសរើស ក៏ដូចជាគណៈមេប្រយោគ អគានុរក្ស និងអនុរក្ស មិនឱ្យមានការអន្តរាគមន៍ និងមិនត្រូវមានមនោសញ្ចេតនាចំពោះបុគ្គលទេ។
លោក ហ៊ុន ម៉ាណែត បានឲ្យដឹងដែរថា ការជ្រើសរើសនាយទាហាននៃកងយោធពលខេមរភូមិន្ទឆ្នាំ២០១៩ នេះ មានការកើនឡើង បើប្រៀបធៀបឆ្នាំ២០១៨ កន្លងមក។ លោកថា ការកើនឡើងនេះ គឺដោយសារការមើលឃើញនៃការជ្រើសរើសនាយទាហាននៃកងយោពលខេមរភូមិន្ទបណ្ដាឆ្នាំមុនៗកន្លងមក មានភាពសុក្រឹត យុត្តិធម៌ ត្រឹមត្រូវ និងតម្លាភាព។
គួរបញ្ជាក់ថា ការប្រឡងជ្រើសរើសនាយទាហាននៃកងយោពលខេមរភូមិន្ទ វគ្គនាយទាហានសកម្មជំនាន់ទី២៣ វគ្គនាយទាហានទ័ពជើងគោកជំនាន់ទី១១ វគ្គនាយទាហានបន្តវេនជំនាន់ទី១២ និងវគ្គនាយទាហានជំនាញបច្ចេកទេសយោធាឆ្នាំ២០១៩ នេះ នឹងប្រព្រឹត្តទៅនៅថ្ងៃទី១៣ ដល់ទី ១៥ ខែមករា ឆ្នាំ២០១៩។ ការប្រឡងធ្វើឡើងនៅ ៦មណ្ឌល គឺមណ្ឌលរាជធានីភ្នំពេញ យោធភូមិភាគ ទី១ ទី២ ទី៣ ទី៤ និងទី៥ ដោយផ្ដោតទៅលើវិញ្ញាសា ចំណេះដឹងទូទៅ ភាសាបរទេស និងវិញ្ញាសាកីឡាកាយសម្បទា៕