ថ្ងៃអវសានរបស់ iPhone កំពុងខិតចូលមកដល់?

2019-01-08 09:04:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងរយៈពេល ៣ខែ ចុងឆ្នាំ២០១៨ តម្លៃរបស់ក្រុមហ៊ុន Apple បានធ្លាក់ចុះប្រមាណ ៤៤៦ ពាន់លានដុល្លារអាមេរិក។ តម្លៃដែលធ្លាក់ចុះនេះគឺច្រើនជាងតម្លៃទីផ្សាររបស់ក្រុមហ៊ុន Facebook ដែលមានត្រឹម ៣៨០ ពាន់លានដុល្លារអាមេរិកប៉ុណ្ណោះ។ ការធ្លាក់ចុះនេះ បានធ្វើឲ្យមានការលើកឡើងថា រជ្ជកាលរបស់ iPhone នៃក្រុមហ៊ុនផ្លែប៉ោម Apple បានឈានចូលដល់ដំណាក់កាលមួយ ដែលនឹងត្រូវអវសានក្នុងពេលដ៏ខ្លីខាងមុខ។

ជុំវិញការលើកឡើងនេះ អ្នកវិភាគមួយចំនួន បានអះអាងថា iPhone ដែលជាផលិតផលលក់ដាច់បំផុតរបស់ Apple មិនទាន់ឈានដល់ថ្ងៃអវសានក្នុងពេលដ៏ខ្លីខាងមុខនោះទេ។

iPhone XS និង XS Max

លោក Ben Wood ប្រធានផ្នែកស្រាវជ្រាវរបស់ក្រុមហ៊ុនផ្ដល់ព័ត៌មានទីផ្សារ និងវិភាគ CCS Insight បានឲ្យដឹងថា ការហៅថា ថ្ងៃអវសានរបស់ iPhone ជារឿងខុស ប៉ុន្តែនេះជាការឈានចូលដំណាក់កាលថ្មីមួយ។ លោកបន្តថា វិស័យស្មាតហ្វូនដែលដើរដល់ចំណុចមួយដែលមានការបត់បែនយ៉ាងខ្លាំងក្នុងរយៈពេល១ទសវត្សរ៍ចុងក្រោយនេះ បានឈានដល់ទីបញ្ចប់។ ដូច្នេះ វាប៉ះពាល់ដល់ក្រុមហ៊ុនទូរសព្ទទាំងអស់ មិនមែនតែ Apple នោះទេ។

លោក Wood បន្ថែមថា កត្តាទូរសព្ទដែលអាចប្រើប្រាស់បានយូរ និងកត្តាឡើងថ្លៃ បានផ្លាស់ប្ដូរឥរិយាបថរបស់អ្នកប្រើប្រាស់ មានន័យថា ពួកគេជ្រើសរើសយកការបន្តប្រើប្រាស់ iPhone ស៊េរីចាស់របស់ខ្លួន កាន់តែយូរបន្ថែមទៀត។

Apple បង្ហាញតម្លៃ iPhone ក្នុងព្រឹត្តិការណ៍មួយកាលពីខែកញ្ញា ឆ្នាំ២០១៨

លោក Julian Shovlin ស្ថាបនិកក្រុមហ៊ុនជួសជុលបច្ចេកវិទ្យា iSmash បានឲ្យដឹងដែរថា កត្តាយឺតយ៉ាវនៃការអភិវឌ្ឍឲ្យកាន់តែប្លែកទៅលើស៊េរីថ្មី ក៏បានរួមចំណែកធ្វើឲ្យ iPhone ស៊េរីថ្មី មិនសូវទទួលបានការគាំទ្រ ពីសំណាក់អតិថិជនផងដែរ។

លោកបន្តថា ក្រុមហ៊ុនផលិតទូរសព្ទធំៗ កំពុងប្រឈមមុខនឹងសម្ពាធ ពីដៃគូប្រកួតប្រជែងដែលផលិតទូរសព្ទដែលមានលក្ខណៈសម្បត្តិប្រហាក់ប្រហែលគ្នា តែមានតម្លៃថោកជាង។

ពាក់ព័ន្ធនឹងកត្តានេះ លោក Wood បានលើកយកឧទាហរណ៍ ដែល Apple ត្រូវបានក្រុមហ៊ុនចិន Huawei ដណ្ដើមយកដំណាត់ថ្នាក់លេខ២ ជាក្រុមហ៊ុនផលិតទូរសព្ទធំបំផុតនៅលើពិភពលោក បន្ទាប់ពី Apple មានរឿងក្ដីចម្លងប៉ាតង់របស់ក្រុមហ៊ុន Qualcomm ដែលអាចប៉ះពាល់ដល់ការលក់ iPhone ស៊េរីចាស់។

លោក Tim Cook នាយកប្រតិបត្តិ Apple បានថ្លែងកាលពីពេលថ្មីៗនេះថា Apple បានជួបវិបត្តិសេដ្ឋកិច្ចនៅក្នុងប្រទេសចិន និងបានបន្ទោសកត្តាសង្គ្រាមពាណិជ្ជកម្មរវាងចិន ជាមួយ សហរដ្ឋអាមេរិក ដែលធ្វើឲ្យការលក់ iPhone ធ្លាក់ចុះ៕

អត្ថបទទាក់ទង មេ Apple បន្ទោសកត្តា ២យ៉ាង ដែលធ្វើឲ្យការលក់ដាំក្បាលចុះ

ប្រភព៖ Businessinsider | irishexaminer ប្រែសម្រួល៖ លាភ.