ផ្លូវល្បឿនលឿន៖ ក្រសួងស្នើឱ្យសិក្សាពីចំនួនស្ពានប្រអប់-អាកាស និងផ្លូវក្រោមដីឡើងវិញ

2019-01-15 01:52:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កិច្ចប្រជុំអន្តរក្រសួងដែលដឹកនាំដោយក្រសួងបរិស្ថាន បានគាំទ្រលើគម្រោងវិនិយោគផ្លូវល្បឿនលឿន ភ្នំពេញ-ព្រះសីហនុ របស់ក្រុមហ៊ុន China Road and Bridge Corporation ប៉ុន្តែបានស្នើឱ្យក្រុមហ៊ុននេះ សិក្សាឡើងវិញអំពីការបង្កើនចំនួនស្ពានប្រអប់ ស្ពានអាកាស និងផ្លូវក្រោមដី សម្រាប់ប្រជាពលរដ្ឋប្រើប្រាស់ឆ្លងកាត់។ កិច្ចប្រជុំនេះ ធ្វើឡើងកាលពីថ្ងៃទី១៤ ខែមករា ឆ្នាំ២០១៩ ក្រោមអធិបតីភាពលោក ផៃ ប៊ុនឈឿន រដ្ឋលេខាធិការក្រសួងបរិស្ថាន។

ជាមួយគ្នានេះ កិច្ចប្រជុំអន្តរក្រសួងនេះ ក៏បានស្នើនូវចំណុចមួយចំនួនទៀតដូចខាងក្រោម៖

-ស្នើក្រុមការងារនាយកដ្ឋានវាយតម្លៃហេតុប៉ះពាល់បរិស្ថាន និងក្រុមហ៊ុនម្ចាស់គម្រោង ធ្វើការជាមួយអគ្គនាយកដ្ឋានរដ្ឋបាលការពារ និងអភិរក្សធម្មជាតិ ពាក់ព័ន្ធនឹងការប៉ះពាល់តំបន់ការពារដោយគម្រោងនេះ

-ក្រុមហ៊ុនម្ចាស់គម្រោង ត្រូវគ្រប់គ្រងសំណល់រឹង-រាវឱ្យបានត្រឹមត្រូវតាមលក្ខណៈបច្ចេកទេសនៅ តាមចំណតទាំង៤ នៃផ្លូវល្បឿនលឿន

-ស្នើក្រុមហ៊ុនម្ចាស់គម្រោងដាំដើមឈើអមសងខាងផ្លូវល្បឿនលឿន

-ក្រុមហ៊ុនម្ចាស់គម្រោងត្រូវធ្វើការកែសម្រួលរបាយការណ៍នេះតាមរាល់មតិយោបល់ទាំងអស់របស់ ក្រុមការងារនាយកដ្ឋានជំនាញ តំណាងអគ្គនាយដ្ឋាននៃក្រសួងបរិស្ថាន និងតំណាងក្រសួង-ស្ថាប័ន ជំនាញពាក់ព័ន្ធ ដែលផ្តល់យោបល់ក្នុងអង្គប្រជុំ រួមបញ្ចូលទាំងមតិបូកសរុបរបស់ប្រធានអង្គប្រជុំ។

សូមបញ្ជាក់ថា ផ្លូវល្បឿនលឿនដែលមានប្រវែងជាង ១៩០គីឡូម៉ែត្រនេះ គឺនឹងត្រូវចាប់ផ្តើមសាងសង់ចេញពីភូមិសំរោង សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ និងបញ្ចប់នៅភូមិ១ សង្កាត់៣ ក្រុងព្រះសីហនុ ខេត្តព្រះសីហនុ។ ផ្លូវនេះ គ្រោងនឹងចំណាយថវិកាប្រមាណ ១៩០០លានដុល្លារ ដែលសាងសង់ដោយក្រុមហ៊ុនចិនខាងលើ ក្រោមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT)។

បើតាមការលើកឡើងរបស់លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ក្នុងកិច្ចប្រជុំមួយកាលពីសប្តាហ៍មុន បានឱ្យដឹងថា លូវល្បឿនលឿន ភ្នំពេញ-ព្រះសីហនុ នឹងអាចបើកការដ្ឋានសាងសង់នៅក្នុងអំឡុងខែកុម្ភៈ ឬដើមខែមីនា ខាងមុខនេះ ខណៈដែលគ្រឿងចក្រដែលមានតម្លៃប្រមាណ ១០០លានដុល្លារ នឹងត្រូវបញ្ជូនមកដល់កម្ពុជា នៅដំណាច់ខែមករាខាងមុខនេះ ឯអ្នកបច្ចេកទេស-វិស្វកម្មចិនប្រហែល២០០នាក់ បានមកដល់ហើយ។

គម្រោងផ្លូវល្បឿនលឿននេះ ឆ្លងកាត់ ៤រាជធានីខេត្ត រួមមាន រាជធានីភ្នំពេញ ខេត្តកណ្តាល ខេត្តកំពង់ស្ពី ខេត្តព្រះសីហនុ ក្នុងនោះគឺឆ្លងកាត់ ៦ស្រុក ១ខណ្ឌ ២ក្រុង ៣១ឃុំ/សង្កាត់ និង១១០ភូមិ។ ផ្លូវល្បៀនលឿននេះ ក្រាលបេតុងកៅស៊ូ AC មានប្រវែងសរុបជាង ១៩០គីឡូម៉ែត្រ (គិតរួមទាំងស្ពាន និងលូទាំងអស់) ហើយមានទទឹងសរុប ២៤,៥ម៉ែត្រ ក្នុងនោះមានគន្លងផ្លូវរថយន្ត (២x៣,៧៥ម៉ែត្រ) សងខាង ជាយផ្លូវកៅស៊ូ២ (២x២,៥ម៉ែត្រ) សម្រាប់ម៉ូតូ ជាយផ្លូវដីក្រហម ២(២x០,៧៥) សម្រាប់ថ្មើរជើង និងសួននៅអ័ក្សកណ្តាលទ្រូងផ្លូវ ៣ម៉ែត្រ ព្រមទាំងមានស្ពាន ៨៩កន្លែង។

ផ្លូវនេះមានកន្លែងសម្រាប់ឈប់សម្រាកចំនួន៤កន្លែង និងស្ថានីយប្រេងឥន្ធនៈ ៣កន្លែង។ ផ្លូវនេះក៏មានរបងអមតាមសងខាងផ្លូវនោះដើម្បីការពារសត្វពាហនៈឆ្លងកាត់ និងរបាំងការពារសំឡេងរំខាន សរុបប្រហែល៥៧,១៩គីឡូម៉ែត្រ ព្រមទាំងមានកន្លែងមនុស្ស និងសត្វព្រៃឆ្លងកាត់ចំនូន ៣៥២កន្លែងផងដែរ៕

ប្រភពរូបថត៖ ក្រសួងបរិស្ថាន

អត្ថបទ៖ សំភី