អូស្រ្ដាលី នឹងធ្វើជាម្ចាស់ផ្ទះកិច្ចប្រជុំ APPF បន្តវេនពីកម្ពុជា
- 2019-01-17 02:57:39
- ចំនួនមតិ 0 | ចំនួនចែករំលែក 0
អូស្រ្ដាលី នឹងធ្វើជាម្ចាស់ផ្ទះកិច្ចប្រជុំ APPF បន្តវេនពីកម្ពុជា
ចន្លោះមិនឃើញ
ប្រទេសអូស្រ្ដាលី នឹងធ្វើជាម្ចាស់ផ្ទះកិច្ចប្រជុំប្រចាំឆ្នាំ APPF លើកទី២៨ ឆ្នាំ២០២០ បន្តវេនពីកម្ពុជា។ ចំណែកសាធារណរដ្ឋកូរ៉េ ទទួលធ្វើជាម្ចាស់ផ្ទះកិច្ចប្រជុំ APPF លើកទី២៩ នៅឆ្នាំ២០២១។ នេះបើយោងតាមការប្រកាស នៅក្នុងពិធីបិទកិច្ចប្រជុំ APPF លើកទី២៧ នៅខេត្តសៀមរាប កាលពីថ្ងៃទី១៦ មករាម្សិលមិញ ក្រោមអធិបតីភាព សម្ដេច ហេង សំរិន ប្រធានរដ្ឋសភាកម្ពុជា និងជាប្រធានវេទិកាសភាអាស៊ី-ប៉ាស៊ីហ្វិក លើកទី២៧ នៅសណ្ឋាគារសុខាអង្គរ ខេត្តសៀមរាប។
នៅក្នុងពិធីបិទកិច្ចប្រជុំលើកទី២៧នេះ សភាកម្ពុជាបានប្រគល់ទង់ APPF ដល់ប្រទេសអូស្រ្តាលី ដែលទទួលវេនធ្វើជាម្ចាស់ផ្ទះកិច្ចប្រជុំ APPF ផងដែរ។
កិច្ចប្រជុំលើកទី២៧ APPF បានប្រារព្ធធ្វើឡើងក្រោមប្រធានបទ “ពង្រឹងភាពជាដៃគូសភា ដើម្បីសន្តិភាព សន្តិសុខ និងការអភិវឌ្ឍប្រកបដោយ ចីរភាព”។ កិច្ចប្រជុំនេះ បានពិភាក្សាគ្នាលើវិស័យចំនួន៤ គឺ កិច្ចប្រជុំសមាជិកសភាស្ត្រី APPF វិស័យសហប្រតិបត្តិការតំបន់ វិស័យសេដ្ឋកិច្ច និងពាណិជ្ជកម្ម និងវិស័យនយោបាយ និងសន្តិសុខ ដែលសរុបមានសេចក្តីព្រាងសេចក្តីសម្រេចចំនួន ៤៣ ដែលប្រទេសសមាជិក APPF លើកឡើង ដែលជាចុងបញ្ចប់កិច្ចប្រជុំ APPF បានធ្វើសំយោគបញ្ចូលមកនៅត្រឹម១៥ សេចក្តីព្រាងសេចក្តីសម្រេច។ កិច្ចប្រជុំបានអនុម័តលើសេចក្តីព្រាង សេចក្តីសម្រេចចំនួន១៤ ដោយទុកសេចក្តីព្រាងសេចក្តីសម្រេចមួយ បន្តពិភាក្សានៅប្រទេសអាស្រ្តាលី នៅឆ្នាំ២០២០ទៀត។
ក្នុងសុន្ទរកថាបិទកិច្ចប្រជុំ សម្តេចប្រធាន APPF លើកទី២៧ បានគូសបញ្ជាក់ថា អ្វីដែលជាលទ្ធផលនៃសេចក្ដីសម្រេចនានា ដែលបានអនុម័ត នៅក្នុងកិច្ចប្រជុំរយៈពេល បីថ្ងៃមកនេះ បានសំដៅដល់ការដោះស្រាយបញ្ហារួមក្នុងតំបន់ ដែលមានដូចជាការកសាងទំនុកចិត្តគ្នាទៅវិញទៅមក ការប្រយុទ្ធប្រឆំាងអំពើភេរវកម្ម និងបទល្មើសតាមប្រព័ន្ធអ៊ិនធឺណេត ការទប់ស្កាត់ការប្រែប្រួលអាកាសធាតុ ការពង្រឹងកិច្ចសហប្រតិបត្តិការភាពជា ដៃគូលើវិស័យពាណិជ្ជកម្មនិងវិនិយោគ ជាដើម។
សម្តេចប្រធាន APPF បានសង្កត់ធ្ងន់ថា ជាការពិតណាស់ សន្តិភាព និងស្ថេរភាព ជាបុរេលក្ខខ័ណ្ឌដ៏ចំាបាច់សម្រាប់ការកសាង និងអភិវឌ្ឍសង្គម ជាតិ។ បើប្រទេសមួយ កំពុងស្ថិតនៅក្នុងគ្រោះមហន្តរាយ មានសង្រ្គាម ឬអស្ថិរភាពនោះ គ្មានទេការអភិវឌ្ឍ និងភាពរុងរឿងរបស់ប្រទេសជាតិ។ សម្តេចបានមានប្រសាសន៍បន្តថា “សន្តិភាព និងការអភិវឌ្ឍ” ត្រូវដើរទន្ទឹមគ្នា។ បើប្រទេសមួយមានតែសន្តិភាព ប៉ុន្តែគ្មានការអភិវឌ្ឍរីកចម្រើន ប្រទេសនោះក៏មិនអាចមានសន្តិភាពនៅស្ថិតស្ថេរគង់វង្សយូរអង្វែងបានឡើយ។
“ដូច្នេះយើង ត្រូវបន្តលើកកម្ពស់កិច្ចសហប្រតិបត្តិការលើគ្រប់វិស័យ ក្នុងនោះវិស័យ នយោបាយការទូត សេដ្ឋកិច្ច ពាណិជ្ជកម្ម និងការវិនិយោគ។ ប្រទេសនីមួយៗត្រូវការពឹងផ្អែកសេដ្ឋកិច្ចគ្នាទៅវិញទៅមក ដើម្បីទទួលបាននូវកំណើនសេដ្ឋកិច្ចប្រកបដោយបរិយាប័ន្ន និងវិបុលភាព។ ក្នុងន័យនេះ ពាណិជ្ជកម្ម និងវិនិយោគ គឺជាចលករដ៏សំខាន់ក្នុងការជំរុញកំណើនសេដ្ឋកិច្ចជាតិរបស់យើង “នេះជាការគូសបញ្ជាក់របស់សម្តេចប្រធានAPPF លើកទី២៧។
នៅមុនសម្តេចអគ្គមហាពញាចក្រី ហេង សំរិន ប្រធានរដ្ឋសភា ប្រកាសបិទកិច្ចប្រជុំ APPF បានស្តាប់របាយការណ៍លទ្ធផលនៃកិច្ចប្រជុំសមាជិក សភាស្រ្តី APPF ដែលអានដោយលោកស្រី ឃួន សុដារី អនុប្រធានទី២ នៃរដ្ឋសភាកម្ពុជា និងជាប្រធានកិច្ចប្រជុំសមាជិកសភាស្រ្តី APPF និងសេចក្តីថ្លែងការណ៍របស់សម្តេចប្រធាន APPF-២៧ រួមទាំងរបាយការណ៍សង្ខេបនៃកិច្ចប្រជុំគណៈកម្មាធិការសេចក្តីព្រាង ដែលអានដោយ លោក ហ៊ុន ម៉ានី។ បន្ទាប់មកសមាជិកវេទិកាសភាអាស៊ី-ប៉ាស៊ីហ្វិក ដែលចូលរួមប្រជុំបានចុះហត្ថលេខាលើសេចក្តី ថ្លែងការណ៍រួម។
សូមជម្រាបថា វេទិកាសភាអាស៊ី-ប៉ាស៊ីហ្វិក ដែលហៅកាត់ថា APPF ជាបណ្តុំសភាធំមួយដែលមានសមាជិក២៧ប្រទេស។ APPF តែងតែរៀបចំ កិច្ចប្រជុំប្រចាំឆ្នាំរបស់ខ្លួន ដោយសភាប្រទេសជាសមាជិកប្តូរវេនគ្នាធ្វើជាម្ចាស់ផ្ទះកិច្ចជុំប្រចាំឆ្នាំជាទៀតទាត់ ក្នុងការប្រមូលផ្តុំសំឡេងតំណាងពលរដ្ឋ ដោះស្រាយបញ្ហារួម ពង្រឹងកិច្ចសហប្រតិបត្តិការនិងសាមគ្គីភាពក្នុងគ្រួសារ APPF ក្នុងគោលបំណងកសាងសុខសន្តិភាពនៅក្នុងតំបន់ និងពិភព- លោកប្រកបដោយចីរភាព៕