សម្តេច ហ៊ុន សែន នឹងជួបលោក ស៊ី ជិនពីង និងលោក លី ខឺឈាង ដើម្បីពិភាក្សាពង្រឹងកិច្ចសហប្រតិបត្តិការ

2019-01-18 08:29:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី នឹងជួបសម្តែងការគួរសមជាមួយ លោក ស៊ី ជិនពីង ប្រធានាធិបតីចិន, លោក លីចាន់ស៊ូ (LiZhanshu) ប្រធានគណៈកម្មាធិការអចិន្រ្តៃយ៍នៃសភាប្រជាជនចិន, លោក វ៉ាង យ៉ាង (Wang Yang) ប្រធានសភាប្រឹក្សានយោបាយចិន ព្រមទាំងជួបពិភាក្សាទ្វេភាគីជាមួយ លី ខឺឈាង (Li Keqiang) នាយករដ្ឋមន្រ្តីចិន ក្នុងអំឡុងទស្សនកិច្ចរបស់សម្តេចទៅកាន់ប្រទេសចិន ពីថ្ងៃទី ២០ ដល់ថ្ងៃទី ២៣ ខែមករា ឆ្នាំ២០១៩។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៨ ខែមករា ឆ្នាំ២០១៩។

សម្តេច ហ៊ុន សែន ក្នុងជំនួបជាមួយលោក ស៊ី ជិនពីង នៅរាជធានីភ្នំពេញ កាលពីឆ្នាំ២០១៦

ជំនួបពិភាក្សាខាងលើនេះ នឹងផ្តោតទៅលើការពង្រឹង និងពង្រីកបន្ថែមទៀតនូវកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយរវាងកម្ពុជា និងចិន ដើម្បីផលប្រយោជន៍នៃប្រជាជាតិទាំងពីរ។

ក្នុងអំឡុងពេលទស្សនកិច្ចរនេះ ត្រូវបានរំពឹងថា នឹងមានការចុះហត្ថលេខាលើឯកសារ និងកិច្ចព្រមព្រៀងកិច្ចសហប្រតិបត្តិការមួយចំនួនរវាងភាគីទាំង២ផងដែរ។

លោក លី ខឺឈាង ក្នុងអំឡុងមកធ្វើទស្សនកិច្ចនៅកម្ពុជា កាលពីខែមករា ឆ្នាំ២០១៨

ក្រៅពីជំនួបខាងលើ សម្តេចនាយករដ្ឋមន្រ្តី នឹងទទួលការចូលជួបសម្តែងការគួរសមដាច់ដោយឡែកពីគ្នាដោយ លោករដ្ឋមន្ត្រី សុង តាវ ប្រធានមន្ទីរទំនាក់ទំនងអន្តរជាតិរបស់គណៈកម្មាធិការមជ្ឈឹមបក្សកុម្មុយនិស្តចិន និងលោកស្រី គូ សៀវលៀន ប្រធានសមាគមមិត្តភាពចិន-កម្ពុជា និងថ្នាក់ដឹកនាំធុរកិច្ចចំនួន៤រូបទៀតពី ធនាគារចិន សាជីវកម្មស្ពានថ្នល់ចិន ក្រុមហ៊ុនវិស្វកម្ម និងដែកថែបចិន និងក្រុមហ៊ុនហួណេងគ្រុប។

ក្នុងអំឡុងពេលស្នាក់នៅប្រទេសចិន សម្តេច ហ៊ុន សែន នឹងអញ្ជើញទៅទស្សនាការតាំងពិព័រណ៍ខួបអនុស្សាវរីយ៍លើកទី៤០ នៃ «កំណែទម្រង់ និងការបើកទូលាយ» ប្រទេសចិន និងអញ្ជើញចូលរួមជាអធិបតីក្នុងពិធីបើកវេទិកាសេដ្ឋកិច្ច និងពាណិជ្ជកម្ម កម្ពុជា-ចិន ឆ្នាំ២០១៩។ សម្តេចក៏នឹងជួបសំណេះសំណាលជាមួយនិស្សិតកម្ពុជា ដែលកំពុងសិក្សានៅប្រទេសចិនផងដែរ៕

អត្ថបទ៖ សំភី