ស៊ី ជីនពីង សន្យាបន្តនាំចូលអង្ករកម្ពុជា ៤០ម៉ឺនតោន និងផ្ដល់ជំនួយជិត៦០០លានដុល្លារ
- 2019-01-22 01:48:17
- ចំនួនមតិ 0 | ចំនួនចែករំលែក 0
ស៊ី ជីនពីង សន្យាបន្តនាំចូលអង្ករកម្ពុជា ៤០ម៉ឺនតោន និងផ្ដល់ជំនួយជិត៦០០លានដុល្លារ
ចន្លោះមិនឃើញ
លោក ស៊ី ជីនពីង ប្រធានាធិបតីសាធារណរដ្ឋប្រជាមានិតចិន បានថ្លែងឲ្យដឹងថា នៅក្នុងឆ្នាំ២០១៩នេះ ចិននឹងបន្តនាំចូលអង្ករចំនួន ៤០ម៉ឺនតោន ពីប្រទេសកម្ពុជា និងផ្ដល់ជំនួយឥតសំណងចំនួន ៤ពាន់លានយ័ន (ប្រមាណ ៥៩០លានដុល្លារអាមេរិក) សម្រាប់រយៈពេល ៣ឆ្នាំ ពីឆ្នាំ២០១៩ ដល់ឆ្នាំ២០២១។
លោក ស៊ី ជីនពីង បានឲ្យដឹងថា នឹងជំរុញទំហំពាណិជ្ជកម្មនៃប្រទេសទាំងពីរកើនដល់ ១០ពាន់លានដុល្លារអាមេរិក ត្រឹមឆ្នាំ២០២៣ ក្នុងនោះចិននឹងបន្តលើកទឹកចិត្តដល់អ្នកវិនិយោគចិន ទៅវិនិយោគនៅកម្ពុជា។
សូមរំឭកថា ក្នុងជំនួបសំណេះសំណាលជាមួយនិស្សិតខ្មែរចំនួន ៤៦៨នាក់ ដែលកំពុងសិក្សាក្នុងប្រទេសចិន កាលពីថ្ងៃទី២០ ខែមករា ឆ្នាំ២០១៩ សម្តេចនាយករដ្ឋមន្រ្តី ហ៊ុន សែន បានថ្លែងថា កម្ពុជាត្រូវខិតខំបើក ពង្រីក និងពង្រឹងទីផ្សារ ឲ្យបានច្រើនថែមទៀតក្រៅពីទីផ្សារអាមេរិក និងអឺរ៉ុប ដើម្បីបញ្ចេញទំនិញ និងផលិតផលកសិកម្មកម្ពុជាចេញក្រៅ ដូចជានៅក្នុងប្រទេសចិន, អាហ្វ្រិក, មជ្ឈឹមបូព៌ា និងកូរ៉េជាដើម។ សព្វថ្ងៃនេះ ទំហំពាណិជ្ជកម្មកម្ពុជា និងចិនក៏បានកើនឡើងដល់ ៥៦០០លានដុល្លារហើយ។ សម្តេចលើកឡើងថា មិត្តចិនគឺវិនិយោគធំជាងគេនៅកម្ពុជា ជាពិសេសលើវិស័យហេដ្ឋារចនាសម្ព័ន្ធផ្លូវថ្នល់ ស្ពាន ស្ពានអាកាស និងវារីអគ្គីសនីជាដើម៕
រូប៖ ទំព័រហ្វេសប៊ុកសម្ដេច ហ៊ុន សែន
អត្ថបទទាក់ទង សម្តេច ហ៊ុន សែន៖ កម្ពុជា ត្រូវខិតខំពង្រីកទីផ្សារឱ្យបានច្រើន ក្រៅពីអាមេរិក និងអឺរ៉ុប