លោក ស៊ី ជីនពីង៖ ទំនាក់ទំនងចិន-កម្ពុជា មានលក្ខណៈពិសេសខ្លាំង បើប្រៀបធៀបនឹងប្រទេសដទៃ
- 2019-01-22 02:17:18
- ចំនួនមតិ 0 | ចំនួនចែករំលែក 0
លោក ស៊ី ជីនពីង៖ ទំនាក់ទំនងចិន-កម្ពុជា មានលក្ខណៈពិសេសខ្លាំង បើប្រៀបធៀបនឹងប្រទេសដទៃ
ចន្លោះមិនឃើញ
លោក ស៊ី ជីនពីង ប្រធានាធិបតីចិន បានថ្លែងទៅកាន់សម្តេចនាយករដ្ឋមន្រ្តី ហ៊ុន សែន ថា ទំនាក់ទំនងរវាងចិន និងកម្ពុជា គឺពិតជាមានលក្ខណៈពិសេសខ្លាំងណាស់ បើប្រៀបធៀបទៅនឹងប្រទេសផ្សេងៗទៀត ពោលគឺទំនាក់ទំនងនៃប្រទេសទាំងពីរ មានលក្ខណៈសំខាន់បំផុត។ ជំនួបពិភាក្សានេះ ធ្វើឡើងកាលពីថ្ងៃទី២១ ខែមករា ឆ្នាំ២០១៩ នៅក្រុងប៉េកាំង ប្រទេសចិន។
លោកបញ្ជាក់ថា លក្ខណៈពិសេសនោះគឺទំនាក់ទំនងរវាង សម្តេច ហ៊ុន សែន និងគណបក្សប្រជាជនកម្ពុជា ជាមួយថ្នាក់ដឹកនាំចិន ដោយចាត់ទុកថា បានឡើងដល់កម្រិតមួយដែលខ្ពស់បំផុត បើប្រៀបធៀបទៅនឹងប្រទេសផ្សេងៗទៀត។
លោក ស៊ី ជីនពីង បន្តថា ចិននិងកម្ពុជា នឹងបន្តកសាងសហគមន៍រួមគ្នា ដើម្បីរៀបចំផែនការធ្វើកិច្វសហការលើគ្រប់វិស័យ ទាំងវិស័យនយោបាយ សន្តិសុខ សេដ្ឋកិច្ច និងរវាងប្រជាជន និងប្រជាជន។
បច្ចុប្បន្ននេះ បើទោះបីជាទំនាក់ទំនងអន្តរជាតិ មានការប្រែប្រួលក៏ពិតមែន ប៉ុន្តែទំនាក់ទំនងរវាងចិន និងកម្ពុជា គឺពិតជាបានផ្តល់នូវអត្ថប្រយោជន៍ជាច្រើនពីគ្នាទៅវិញទៅមក។ តាមរយៈនេះ ចិននឹងបន្តបង្កើនកិច្ចសហប្រតិបត្តិការជាមួយកម្ពុជា ពិសេសការចូលរួមចំណែកដល់ការអភិវឌ្ឍប្រទេសកម្ពុជា កាន់តែរឹងមាំទ្វេឡើងថែមទៀត។ នេះជាការបញ្ជាក់បន្ថែមរបស់លោក ស៊ី ជីនពីង។
បើតាមការថ្លែងរបស់សម្តេច ហ៊ុន សែន ក្នុងជំនួបពិភាក្សានេះ អ្វីដែលសម្តេចចង់ឃើញនោះគឺ ក្នុងភាពជាដៃគូយុទ្ធសាស្រ្តគ្រប់ជ្រុងជ្រោយនោះ បន្តថែទាំ និងរក្សាឲ្យកាន់តែរឹងមាំថែមទៀត។ សម្តេចបានស្នើឲ្យបន្តយន្តការទ្វេភាគីកាន់តែរឹងមាំ។
សម្តេចនាយករដ្ឋមន្រ្តី ក៏បានស្នើថា ឆ្នាំ២០១៩ គឺជាឆ្នាំនៃការផ្លាស់ប្តូរវប្បធម៌ និងជាឆ្នាំនៃការផ្លាស់ប្តូរទេសចរណ៍នៃប្រទេសទាំងពីរ។ ទន្ទឹមនឹងនេះ សម្តេច ហ៊ុន សែន ក៏បានស្នើដល់ប្រធានាធិបតីចិន គឺធ្វើយ៉ាងណាឲ្យប្រទេសទាំងពីរ អាចមាននូវកិច្ចព្រមព្រៀងសេដ្ឋកិច្ចសេរី ព្រោះដោយសារប្រទេសទាំងពីរមានភាពជាដៃគូយុទ្ធសាស្រ្តគ្រប់ជ្រុងជ្រោយ រួចមកហើយតាំងពីឆ្នាំ២០១០មក៕
អត្ថបទទាក់ទង៖ ស៊ី ជីនពីង សន្យាបន្តនាំចូលអង្ករកម្ពុជា ៤០ម៉ឺនតោន និងផ្ដល់ជំនួយជិត៦០០លានដុល្លារ