រុស្ស៊ី ឆ្លើយតបនឹងអាមេរិក ជុំវិញបញ្ហាប្រព័ន្ធមីស៊ីលរបស់ខ្លួន
- 2019-01-24 02:18:43
- ចំនួនមតិ 0 | ចំនួនចែករំលែក 0
រុស្ស៊ី ឆ្លើយតបនឹងអាមេរិក ជុំវិញបញ្ហាប្រព័ន្ធមីស៊ីលរបស់ខ្លួន
ចន្លោះមិនឃើញ
ប្រទេសរុស្ស៊ី កាលពីថ្ងៃទី២៣ ខែមករា ឆ្នាំ២០១៩ បានអះអាងថា ប្រព័ន្ធមីស៊ីលរបស់ខ្លួន មិនបានរំលោភលើសន្ធិសញ្ញាស្ដីពីអាវុធនុយក្លេអ៊ែរចម្ងាយមធ្យម ដូចការចោទប្រកាន់របស់សហរដ្ឋអាមេរិកនោះទេ។
លោក Mikhail Matveevsky មន្ត្រីយោធាជាន់ខ្ពស់ផ្នែកកាំភ្លើងធំ បានបញ្ជាក់ថា មីស៊ីលប្រភេទ 9M729 របស់រុស្ស៊ី មានសមត្ថភាពបាញ់ត្រឹមចម្ងាយ ៤៨០គីឡូម៉ែត្រតែប៉ុណ្ណោះ។
សន្ធិសញ្ញាស្ដីពីអាវុធនុយក្លេអ៊ែរនេះ ត្រូវបានចុះហត្ថលេខាកាលពីឆ្នាំ១៩៨៧ ដោយអតីតប្រធានាធិបតីអាមេរិកលោក Ronald Reagan និងអតីតមេដឹកនាំសូវៀត Mikhail Gorbachev ក្នុងគោលបំណងដាក់បម្រាមលើមីស៊ីល ដែលមានចម្ងាយចន្លោះពី ៥០០ ទៅដល់ ៥៥០០ គីឡូម៉ែត្រ។
ការបញ្ជាក់ពីមន្ត្រីជាន់ខ្ពស់រុស្ស៊ី ដើម្បីបដិសេធការរំលោភសន្ធិសញ្ញានេះ គឺជាការផ្ដល់សេចក្ដីលម្អិតពីមីស៊ីលរុស្ស៊ី 9M729 ជាលើកដំបូង។ លោក Matveevsky បានបន្តថា សមត្ថភាពរបស់មីស៊ីល 9M729 ត្រូវបានបង្ហាញយ៉ាងច្បាស់ ក្នុងសមយុទ្ធ កាលពីឆ្នាំ២០១៧។
សហរដ្ឋអាមេរិក បានព្រមានដកខ្លួនចេញពីសន្ធិសញ្ញាអាវុធនុយក្លេអ៊ែរចម្ងាយមធ្យម នៅដើមខែកុម្ភៈខាងមុខ បន្ទាប់ពីខ្លួនចាត់ទុកប្រព័ន្ធមីស៊ីលថ្មីរបស់រុស្ស៊ី ជាការរំលោភសន្ធិសញ្ញាអាវុធនុយក្លេអ៊ែរចម្ងាយមធ្យម និងប៉ះពាល់ដល់សន្តិសុខពិភពលោក។ អាមេរិក ក៏បានទាមទារឲ្យរុស្ស៊ី កម្ទេចចោលប្រព័ន្ធមីស៊ីលនេះផងដែរ៕
អត្ថបទទាក់ទង អាមេរិក ចង់ឲ្យរុស្ស៊ី កម្ទេចចោលប្រព័ន្ធមីស៊ីលថ្មីរបស់ខ្លួន