រដ្ឋបាលខេត្តកំពត ចង់ឃើញការទាញយកអំបិលម្យ៉ាង ជំនួសឱ្យការផលិតដោយបូមទឹកសមុទ្រហាល

2019-02-01 02:14:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ជាវ តាយ អភិបាលខេត្តកំពត ចង់ឃើញការផលិតអំបិលដោយការទាញយកអំបិលរ៉ែ ជំនួសការបូមទឹកសមុទ្រយកមកហាលថ្ងៃ។ លោកបានមានប្រសាសន៍ថា ការទទួលផលអំបិលរបស់សហគមន៍អ្នកផលិតអំបិលកំពត-កែប នាពេលបច្ចុប្បន្ន ពឹងផ្អែកទាំងស្រុងលើកត្តាធម្មជាតិ។

លោកអភិបាលខេត្តកំពត បានឲ្យដឹងយ៉ាងដូច្នេះ នៅក្នុងពិធីស្វាគមន៍គណៈប្រតិភូរដ្ឋសភា ដឹកនាំដោយ លោកស្រី និន សាផុន ក្នុងបេសកកម្មតាមដានការអនុវត្ត និងតម្រូវការច្បាប់បន្ថែមក្រោមបន្ទុករបស់គណៈកម្មការទីប្រាំបួន កាលពីព្រឹកថ្ងៃទី៣១ ខែមករា ឆ្នាំ២០១៩ នៅសាលប្រជុំសាលាខេត្តកំពត។

លោក ជាវ តាយ ក្នុងពិធីស្វាគមន៍គណៈប្រតិភូរដ្ឋសភា ដឹកនាំដោយ លោកស្រី និន សាផុន

លោក ជាយ តាវ បានលើកឡើងថា ក្នុងករណីមានក្រុមអ្នកបច្ចេកទេសជំនាញផ្នែកខាងអំបិលរ៉ែ រដ្ឋបាលខេត្តកំពតស្វាគមន៍សម្រាប់កិច្ចសហការ ដើម្បីទាញយកអំបិលមកប្រើប្រាស់ ជំនួសឱ្យការបូមទឹកសមុទ្រហាលជាច្រើនថ្ងៃនោះ។ នៅឆ្នាំ២០១៧ និង២០១៨កន្លងមក អំបិលដែលផលិតបានមានបរិមាណតិចតួចបំផុត គឺប្រហែលបីពាន់ទៅបួនពាន់តោនប៉ុណ្ណោះ ព្រោះតែធាតុអាកាសមិនអំណោយផល។

លោកអភិបាលខេត្តបានបញ្ជាក់ថា អំបិលដែលនៅសេសសល់ពីឆ្នាំមុនៗប្រមាណមួយសែនតោននោះ គឺបានប្រើប្រាស់អស់ទាំងស្រុង រហូតមានការនាំចូលមកពីប្រទេសក្រៅ ព្រោះក្នុងមួយឆ្នាំៗត្រូវការប្រើប្រាស់មួយសែនតោនសម្រាប់ទូទាំងប្រទេស។ ប៉ុន្តែ ក្នុងករណីធាតុអាកាសល្អ នោះស្រែអំបិលដែលមាននៅខេត្តកំពត និងខេត្តកែបជាងបួនពាន់ហិកតា នឹងអាចផលិតបានពី ១សែន៥ម៉ឺនតោន ទៅ ១សែន៦ម៉ឺនតោន។

លោក ជាវ តាយ បានមានបន្តថា តាមការឱ្យដឹងពីសហគមន៍អ្នកផលិតអំបិល គឺរវាងបួនឆ្នាំ ទៅប្រាំឆ្នាំម្តង តែងមានពីរឆ្នាំដែលមិនអំណោយផលព្រោះភ្លៀងធ្លាក់ច្រើន ដូច្នេះលោកសង្ឃឹមថា ឆ្នាំ២០១៩ នេះ ការផលិតអំបិលនឹងទទួលបានជោគជ័យឡើងវិញ៕

ចុចអាន៖ បិលនាំចូលពីចិនមកកម្ពុជា ១ម៉ឺនតោន កំពុងជាប់គាំង ដោយខ្វះកន្លែងទុក

ប្រភព៖ រស្មីកម្ពុជា ប្រែសម្រួល៖ សុខ សុវត្ថិ