អំបិលនាំចូលពីចិនមកកម្ពុជា ១ម៉ឺនតោន កំពុងជាប់គាំង ដោយខ្វះកន្លែងទុក
- 2019-01-04 02:50:55
- ចំនួនមតិ 0 | ចំនួនចែករំលែក 0
អំបិលនាំចូលពីចិនមកកម្ពុជា ១ម៉ឺនតោន កំពុងជាប់គាំង ដោយខ្វះកន្លែងទុក
ចន្លោះមិនឃើញ
ប្រធានសមាគមផលិតអំបិលខេត្តកំពត និងកែប លោក ប៊ុន បារាំង បានថ្លែងកាលពីថ្ងៃទី៣ ខែមករា ឆ្នាំ២០១៩ថា ដោយសារតែការកកស្ទះអំបិលដែលនាំចូលពីចិនប្រមាណជា ១ម៉ឺនតោន នៅលើកប៉ាល់ គ្មានកន្លែងទុកដាក់ បានក្លាយជាបញ្ហាប្រឈម ដល់អ្នកនាំអំបិលពីចិន មកផ្គត់ផ្គង់ក្នុងស្រុក។
លោកបានឱ្យដឹងថា អ្នកនាំចូលអំបិល បានរងការផាកពិន័យ ពីកំពង់ផែ និងក្រុមហ៊ុនដឹកជញ្ជូន ព្រោះតាមការកំណត់ត្រឹម១សប្តាហ៍ តែដោយគ្មានកន្លែងស្តុក ទើបបានហួសមកដល់ប្រមាណ ជាង១ខែហើយ ។
លោក ប៊ុន បារាំង លើកឡើងថា ការនាំចូលអំបិលពីចិន មានការលឿនរហ័សហួសពីការគិតទុក។ «តាមការគ្រោងទុកជាមុន គឺអាចមកម្តងមួយកប៉ាលៗ ប៉ុន្តែមិននឹកស្មានថា មកម្តង១៩កប៉ាល់ ខណៈមួយកប៉ាល់ទៀត កំពុងមកជិតដល់។ ចំណុចនេះហើយ ជាបញ្ហាចោទមិនអាច រកកន្លែងស្តុកទុកទាន់ ទើបបង្ខំចិត្តលក់ចេញ ក្នុងតម្លៃថោក ដើម្បីធ្វើយ៉ាងណាជៀសវាងកុំឲ្យរងការផាកពិន័យ ប៉ុន្តែនៅតែជៀសមិនផុត»។
ការមកជាគំហុកបែបនេះ លោកថា បានធ្វើឲ្យលោកខាតបង់ថវិកា ដោយសារតែការបង់ប្រាក់ពិន័យ ទៅខាងកំពង់ផែ និងក្រុមហ៊ុនដឹកជញ្ជូន ដែលមិនអាចយកមកស្កុកបាន ព្រោះគ្មានកន្លែងទុកដាក់ ដោយសារចំនួនមកច្រើន។ «អ៊ីចឹង វាឡើងមកច្រើនពេក ពូធ្វើម៉េចទាន់ ពូទៅលក់ឯណាទាន់ ព្រោះអំបិលច្រើនណាស់ ទាំង២០កប៉ាល់។ ឥឡូវមកដល់លើគោកផុតហ្នឹង ១ម៉ឺនតោន។ ២០កប៉ាល់ តើយកទៅទុកនៅណាអស់»។
បន្ថែមពីលើនេះ លោកប្រធានសមាគម អះអាងថា គ្រាន់តែ៦០កុងតឺន័រ លោកបានខាត់បង់ថវិកាដោយសារការផាកពិន័យ ១៣៤០០ដុល្លារ ប៉ុន្តែយ៉ាងណាលោកមិនទាន់ដឹងថា ខាតទាំង២០កប៉ាល់ប៉ុន្មាននៅឡើយទេ។
ទោះជាយ៉ាងណា លោកបានទទួលស្គាល់គុណភាពអំបិលនាំមកពីចិនថា មានគុណភាពល្អ ទាំងអំបិលគ្រួស និងម៉ត់។ លោកបង្ហាញពីក្តីបារម្ភថា ឆ្នាំ២០១៨ មិនបានប្រមូលផល អំបិលទាល់តែសោះ ហើយថានៅឆ្នាំបន្តទៀត ប្រសិនបើមានភ្លៀងធ្លាក់ជាបន្តបន្ទាប់ ការប្រមូលផលអំបិលក៏ពុំបានដែរ។
សូមបញ្ជាក់ថា ក្នុងឆ្នាំ២០១៨ កម្ពុជាបានជួបបញ្ហាខ្វះអំបិល ដោយសារការប្រែប្រួលអាកាសធាតុ ។ បើតាមគម្រោងរបស់សមាគមផលិតអំបិល នឹងនាំចូលអំបិល ពីក្រៅប្រទេស៣ម៉ឺនតោន ក្នុងនោះចិន២ម៉ឺនតោន និងថៃ១ម៉ឺនតោន៕