Rika៖ ខ្ញុំនឹងបំបាក់គូប្រកួតទាំងអស់ ដើម្បីឡើងទៅឲ្យកៀកតំណែងជើងឯកពិភពលោក

2019-02-01 08:08:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាការិនីវាយក្នុងទ្រុង Rika Ishige បានអះអាងថានឹងយកឈ្នះគ្រប់ការប្រកួតនៅក្នុងឆ្នាំ ២០១៩ នេះ ដើម្បីឆ្ពោះទៅរកការវាយយកខ្សែក្រវាត់ពិភពលោកនៅ ONE Championship។ ស្រីស្អាតថៃ វ័យ ២៩ឆ្នាំរូបនេះ បាននិយាយយ៉ាងដូច្នេះ អំឡុងពិធីបង្ហាញខ្លួន (Open Workout) នៅចំពោះមុខអ្នកកាសែតថៃ នាទីក្រុងបាងកក កាលពីចុងខែមករា ឆ្នាំ២០១៩ កន្លងទៅ។

Rika បញ្ចេញក្បាច់ក្លេនៅចំពោះមុខអ្នកកាសែតថៃ ក្នុង Open Workout នៅបាងកក កាលពីចុងខែមករាកន្លងទៅ (រូបភាពផ្ដល់ឲ្យដោយ ONE Championship)

គូប្រកួតរបស់កីឡាគុនខ្មែរ នៅ ស្រីពៅ រូបនេះ បាននិយាយក្នុងឱកាសនោះថា៖ "ខ្ញុំបានរៀនមេរៀនជាច្រើន ក្នុងប៉ុន្មានឆ្នាំចុងក្រោយនេះ។ ខ្ញុំអាចនិយាយបានថា ខ្ញុំខ្លាំងជាមុន មានការផ្ដោតអារម្មណ៍ខ្លាំងជាងមុន។ ខ្ញុំទន្ទឹងរង់ចាំយកជ័យជម្នះ នាប្រកួតបន្ទាប់ទៀត បន្តពីជ័យជម្នះដែលខ្ញុំធ្វើបានក្នុងប្រកួតចុងក្រោយកាលពីថ្មីៗកន្លងទៅ។ ខ្ញុំនឹងបង្ហាញឲ្យអ្នកគ្រប់គ្នាដឹង ពីភាពរីកចម្រើនរបស់ខ្ញុំ"។

Rika បានបន្តថា៖ "នៅក្នុងប្រភេទទម្ងន់ Atomweight (ក្រោម ៥២គីឡូក្រាម) នៅ ONE មានកីឡាការិនីក្មេងៗ និងខ្លាំងៗជាច្រើន រួមទាំងខ្ញុំផងដែរ។ ក្នុងឆ្នាំនេះ ខ្ញុំដាក់ផែនការ ឡើងឲ្យកាន់តែខ្ពស់ ហើយនឹងបំបាក់អ្នកដែលរារាំងនៅចំពោះមុខខ្ញុំទាំងអស់ (ចង់សំដៅលើគូប្រកួត) ដើម្បីឡើងទៅកាន់តែកៀកនឹងតំណែងជើងឯកពិភពលោក" ។

Rika Ishige (រូបភាពផ្ដល់ឲ្យដោយ ONE Championship)

Rika ដែលមានវ័យ ២៩ឆ្នាំ នឹងត្រូវជួបកីឡាការិនីគុនខ្មែរ "នៅ ស្រីពៅ" ក្នុងកម្មវិធី ONE: CLASH OF LEGENDS នាថ្ងៃទី១៦ ខែកុម្ភៈខាងមុខ នៅទីក្រុងបាងកក ប្រទេសថៃ។ កីឡាការិនីដែលហាត់នៅក្លឹប Tiger Muay Thai រូបនេះ ធ្លាប់ឆ្លងកាត់ការប្រកួតក្នុងទ្រុង ៦ប្រកួត ដោយទទួលលទ្ធផល ឈ្នះ ៤ដង និងចាញ់ ២ដង (នៅ ONE Championship ទាំង ៦ប្រកួត)។ ប្រកួតចុងក្រោយ Rika យកឈ្នះកីឡាការិនីមីយ៉ាន់ម៉ា Bozhena Antoniyar ក្នុងទឹកទី១ កាលពីខែតុលា ឆ្នាំ២០១៨៕

អត្ថបទទាក់ទង៖ ទិដ្ឋភាព កីឡាការិនីគុនខ្មែរ "នៅ ស្រីពៅ" ប្រឹងប្រែងហ្វឹកហាត់ ត្រៀមប៉ះថៃ នៅ ONE Championship