កម្ពុជា-មីយ៉ាន់ម៉ា គ្រោងបង្កើតជើងហោះហើរត្រង់
- 2019-02-03 03:47:37
- ចំនួនមតិ 0 | ចំនួនចែករំលែក 0
កម្ពុជា-មីយ៉ាន់ម៉ា គ្រោងបង្កើតជើងហោះហើរត្រង់
ចន្លោះមិនឃើញ
កម្ពុជា - មីយ៉ាន់ម៉ា បានពិភាក្សាអំពីលទ្ធភាពនៃការបង្កើតជើងហោះហើរត្រង់តភ្ជាប់ខេត្តសៀមរាប និងបាហ្កាន ដើម្បីបង្កើនចំនួនភ្ញៀវទេសចរមកទស្សនាប្រទេសទាំងពីរ ក៏ដូចជា ពង្រឹងការប្រាស្រ័យទាក់ទងគ្នារវាងប្រជាជន និងប្រជាជន។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី២ ខែកុម្ភៈ ឆ្នាំ២០១៩។
ក្រៅពីនេះ ភាគីទាំងពីរ ក៏បានឯកភាពពិភាក្សាអំពីលទ្ធភាពបង្កើតកិច្ចព្រមព្រៀងទ្វេភាគីថ្មី ស្តីពីកិច្ចសហប្រតិបត្តិការសេដ្ឋកិច្ច និងពន្លឿនការចរចា លើកិច្ចព្រមព្រៀង ស្តីពីការចៀសវាងការយកពន្ធត្រួតគ្នា និងការបង្ការការកេងបន្លំពន្ធ ពាក់ព័ន្ធនឹងពន្ធលើប្រាក់ចំណូល។
ចំពោះកិច្ចសហប្រតិបត្តិការលើវិស័យអប់រំ អង្គប្រជុំបានឯកភាពពន្លឿនការអនុវត្តកិច្ចព្រមព្រៀង ស្តីពីកិច្ចសហប្រតិបត្តិការ លើវិស័យអប់រំ ឆ្នាំ២០១៧-២០២១ ដើម្បីកសាងសមត្ថភាពយុវជន និងស្វ័យអភិវឌ្ឍន៍។ សម្រាប់កិច្ចសហប្រតិបត្តិការលើវិស័យសាសនា ភាគីទាំងពីរឯកភាពពិចារណាចុះហត្ថលេខាលើអនុស្សារណៈ នៃការយោគយល់គ្នា ស្តីពីកិច្ចសហប្រតិបត្តិការរវាងប្រទេសកាន់ព្រះពុទ្ធសាសនាទាំងពីរ។
កម្ពុជា-មីយ៉ាន់ម៉ា ក៏បានឯកភាពរៀបចំកិច្ចប្រជុំ គណៈកម្មការចម្រុះ ស្តីពីសហប្រតិបត្តិការទ្វេភាគី កម្ពុជា-មីយ៉ាន់ម៉ា (JCBC) លើកទី៣ នៅប្រទេសកម្ពុជា នាឆ្នាំ២០២១៕