កម្ពុជា ស្នើឱ្យ ADB បន្តជួយដល់គម្រោងផ្លូវថ្នល់ និងកម្មវិធីត្រួតពិនិត្យសុវត្ថិភាពចរាចរណ៍ផ្លូវគោក
- 2019-02-07 03:42:14
- ចំនួនមតិ 0 | ចំនួនចែករំលែក 0
កម្ពុជា ស្នើឱ្យ ADB បន្តជួយដល់គម្រោងផ្លូវថ្នល់ និងកម្មវិធីត្រួតពិនិត្យសុវត្ថិភាពចរាចរណ៍ផ្លូវគោក
ចន្លោះមិនឃើញ
លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានស្នើឱ្យធនាគារអភិវឌ្ឍន៍អាស៊ី (ADB) បន្តជួយគាំទ្រដល់គម្រោងផ្លូវថ្នល់នៅកម្ពុជា និងជួយដល់ក្រសួង ទាក់ទងនឹងកម្មវិធីត្រួតពិនិត្យសុវត្ថិភាពចរាចរណ៍ផ្លូវគោក និងការដឹកជញ្ជូនលើសទម្ងន់កម្រិតកំណត់។ សំណើនេះ ធ្វើឡើងក្នុងជំនួបរវាងលោក ស៊ុន ចាន់ថុល និងលោកស្រី Sunniya Durrani-Jamal នាយក ADB ប្រចាំកម្ពុជា កាលពីថ្ងៃទី៥ ខែកុម្ភៈ ឆ្នាំ២០១៩ នៅទីស្តីការក្រសួងសាធារណការ។
លោកទេសរដ្ឋមន្រ្តី បានគូសបញ្ជាក់អំពីគម្រោងផ្លូវថ្នល់ដែលកំពុងអនុវត្តបន្ត ដើម្បីពង្រីកបណ្តាញផ្លូវថ្នល់កម្ពុជា ដោយផ្តោតជាសំខាន់ លើការធ្វើឱ្យប្រសើរឡើងនូវច្រករបៀងសេដ្ឋកិច្ចរបស់មហាអនុតំបន់ទន្លេមេគង្គ និងការធ្វើសមាហរណកម្មថ្នាក់ជាតិ គម្រោងកាត់បន្ថយការកកស្ទះចរាចរណ៍នៅរាជធានីភ្នំពេញ (ដូចជា ការដាក់ឱ្យដំណើរការកាណូតដឹកអ្នកដំណើរតាមផ្លូវទឹក ការដាក់ឱ្យប្រើប្រាស់រថភ្លើងពីភ្នំពេញ ទៅព្រលានយន្តហោះ) និងគម្រោងសាងសង់ថ្មីរោងចក្រប្រព្រឹត្តិកម្មសំណល់ទឹកកខ្វក់។
លោក ស៊ុន ចាន់ថុល ក៏បានជម្រាបជូនគណៈប្រតិភូផងដែរ អំពីការធ្វើឱ្យប្រសើរឡើងនូវកំពង់ផែភ្នំពេញ និងកំពង់ផែក្រុងព្រះសីហនុ ការអភិវឌ្ឍហេដ្ឋារចនាសម្ព័ន្ធកំពង់ផែផ្លូវទឹក និងធាតុផ្សំសំខាន់ៗនៃផែនការជាតិភស្តុភារកម្ម។
ក្នុងជំនួបនេះ លោកស្រី Sunniya Durrani-Jamal បានកត់សម្គាល់ថា ក្រុមបេសកកម្មដែលមាននិវេសដ្ឋានប្រចាំកម្ពុជារបស់ធនាគារអភិវឌ្ឍន៍អាស៊ី(CARM) បាននឹងកំពុងដឹកនាំបេសកកម្មនៃកម្មវិធីឆ្នាំ២០១៩ ដើម្បីពិនិត្យឡើងវិញ និងបញ្ជាក់ជាមួយរាជរដ្ឋាភិបាលកម្ពុជា អំពីការផ្តល់ជំនួយ និងប្រាក់កម្ចីសម្រាប់ឆ្នាំ ២០១៩-២០២២៕