ដូណាល់ ត្រាំ-គីម ជុងអ៊ុន និយាយគ្នាអ្វីខ្លះកាលពីយប់មិញ?

2019-02-28 03:22:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធីបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន បានជួបគ្នាកាលពីយប់ថ្ងៃទី២៧ ខែកុម្ភៈ ឆ្នាំ២០១៩។ មេដឹកនាំទាំង២ បានចាប់ដៃគ្នា រួចអង្គុយជជែកគ្នាមួយសន្ទុះ មុនទទួលទានអាហារ នៅសណ្ឋាគារ Sofitel Legend Metropole ក្នុងក្រុងហាណូយ ប្រទេសវៀតណាម។

លោក គីម ជុងអ៊ុន បាននិយាយថា លោក និងលោក ដូណាល់ ត្រាំ បានជម្នះរាល់ឧបសគ្គទាំងអស់ ដែលនាំឱ្យពួកគេមកជួបគ្នានៅពេលនេះ។ ប៉ុន្តែលោក គីម ក៏បានសង្កត់ធ្ងន់ដែរពីសេចក្តីត្រូវការនៃភាពអត់ធ្មត់។

លោក ដូណាល់ ត្រាំ បាននិយាយថា នេះជាកិត្តិយសមួយដែលលោកបានជួបជាមួយលោកប្រធាន គីម នៅវៀតណាម ជាប្រទេសដែលស្វាគមន៍យ៉ាងស្មោះស្ម័គ្រដោយការក្រាលព្រំក្រហមទទួលមេដឹកនាំទាំង២។

«មនុស្សមួយចំនួន អាចនឹងមើលថា វាទៅកាន់តែលឿន។ ប៉ុន្តែខ្ញុំសប្បាយចិត្តជាមួយអ្វីដែលពួកយើងកំពុងធ្វើ។ យើងបានធ្វើរឿងជាច្រើន រឿងដែលធំបំផុតគឺទំនាក់ទំនងរបស់យើង គឺពិតជាល្អ»។ នេះបើតាមការបញ្ជាក់របស់ប្រធានាធិបតីអាមេរិក ទៅកាន់មេដឹកនាំកូរ៉េខាងជើង។

លោក ដូណាល់ ត្រាំ បន្ថែមថា លោក គីម ជុងអ៊ុន នឹងមានអនាគតដ៏អស្ចារ្យ និងជាមេដឹកនាំដ៏ល្អសម្រាប់កូរ៉េខាងជើង ដោយលោករំពឹងថា វាពិតជានឹងកើតឡើង ហើយលោកនឹងជួយឱ្យវាកើតឡើង។

សូមជម្រាបថា នៅថ្ងៃទី២៨ ខែកុម្ភៈនេះ មេដឹកនាំទាំង២ ក៏មានជំនួបកំពូលជាបន្តបន្ទាប់ទៀតផងដែរ ដោយផ្តោតទៅលើបញ្ហានុយក្លេអ៊ែរ។ ប៉ុន្តែលោក ត្រាំ ថា លោកមិនប្រញាប់ពេកនោះទេ នៅក្នុងបញ្ហានេះ៕

រូបថតផ្តល់សិទ្ធិដោយ Reuters

ប្រភព៖ Vietnam News ប្រែសម្រួល៖ សំភី