Liverpool បំបាក់ Bayern ក្លាយជាក្រុមអង់គ្លេសទី ៤ ឡើងទៅវគ្គ ៨ក្រុម UCL

2019-03-14 01:07:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហង្សក្រហម Liverpool បានយកឈ្នះក្រុមម្ចាស់ផ្ទះ Bayern Munich ៣-១ ក្នុងការប្រកួតជើងទី២ វគ្គ ១៦ក្រុមចុងក្រោយ UEFA Champions League យប់មិញនេះ ក្រោយស្មើគ្នា ០-០ កាលពីជើងទី១។

៣គ្រាប់របស់ក្រុមភ្ញៀវមកពីអង់គ្លេស រកបានដោយខ្សែប្រយុទ្ធសេណេហ្គាល់ Sadio Mané ២គ្រាប់ (នាទី ២៦, ៨៤) និងខ្សែការពារហូឡង់ Virgil van Dijk ១គ្រាប់ (នាទី ៦៩) ខណៈ១គ្រាប់របស់ក្រុមម្ចាស់ផ្ទះអាល្លឺម៉ង់ កើតឡើងដោយសារការធ្វើឲ្យចូលទីខ្លួនឯងរបស់ Joel Matip នៅនាទី ៣៩។

ជ័យជម្នះនេះ មានន័យថាក្រុមទាំង ៤ របស់អង់គ្លេស បានបន្តឡើងទៅកាន់វគ្គ ៨ក្រុមចុងក្រោយទាំងអស់តែម្ដង ពោលគឺមាន Tottenham Hotspur, Manchester United, Manchester City និង Liverpool។ ចំណែកក្រុម ៤ផ្សេងទៀត គឺមកពីប្រទេស ៤ ផ្សេងគ្នា ដែលរួមមាន Porto (ព័រទុយហ្គាល់) Ajax (ហូឡង់) Juventus (អ៊ីតាលី) និង Barcelona (អេស្ប៉ាញ)។

សូមបញ្ជាក់ថា ការចាប់ឆ្នោតជ្រើសរើសគូប្រកួតវគ្គ ៨ក្រុម នឹងធ្វើឡើងនៅទីក្រុង Nyon ប្រទេសស្វីស នាថ្ងៃទីសុក្រ ទី១៥ ខែមីនា ស្អែកនេះ។ តើប្រិយមិត្ត ចង់ឲ្យក្រុមណា ប៉ះក្រុមណាដែរ?

សូមទស្សនាវីដេអូហាយឡាយ ខាងក្រោមនេះ៖