កម្ពុជា គ្រោងប្រើប្រាស់អគ្គិសនីចេញពីនាវាផ្ទុកម៉ាស៊ីនភ្លើងរបស់តួកគី ខណៈខ្វះខាតភ្លើងដល់ ៤០០មេហ្គាវាត់

2019-03-17 02:57:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រាជរដ្ឋាភិបាលកម្ពុជា កំពុងរង់ចាំការឆ្លើយតបពីសាធារណរដ្ឋតួកគី ដើម្បីបញ្ជូននាវាដែលផ្ទុកម៉ាស៊ីនភ្លើងដ៏ធំសម្រាប់ផ្តល់អគ្គិសនីប្រើប្រាស់ក្នុងរយៈពេលប៉ុន្មានខែនេះ។ នេះបើតាមការថ្លែងបញ្ជាក់របស់សម្តេចនាយករដ្ឋមន្រ្តី ហ៊ុន សែន ក្នុងពិធីបើកបុណ្យទន្លេ នៅខេត្តកំពង់ឆ្នាំង កាលពីយប់ថ្ងៃទី១៦ ខែមីនា ឆ្នាំ២០១៩។

រូបតំណាង

សម្តេចបានលើកឡើងថា កត្តាប្រែប្រួលអាកាសធាតុ បានធ្វើឱ្យកម្ពុជាជួបប្រឈមនឹងបញ្ហាគ្រោះរាំងស្ងួត ដែលមានរយៈពេលរហូតដល់ខែមិថុនា ឆ្នាំ២០១៩ ។ ទន្ទឹមនឹងនេះដែរ កម្ពុជាក៏កំពុងជួបបញ្ហាខ្វះខាតភ្លើងប្រើប្រាស់រហូតដល់ ៤០០មេហ្គាវាត់ ដែលទំហំនេះអាចនឹងកើនឡើងថែមទៀត។

សូមបញ្ជាក់ថា វារីអគ្គីសនីដែលកម្ពុជាមានសព្វថ្ងៃនេះ គឺដំណើរការបានដោយមានទឹកប្រើប្រាស់គ្រប់គ្រាន់។ ដូច្នេះប្រសិនបើមិនមានទឹកគ្រប់គ្រាន់ទេ គឺវារីអគ្គិសនីនឹងប្រឈមបញ្ហាផលិតថាមពលអគ្គីសនីមិនខាន។

សម្តេច ហ៊ុន សែន បន្តថា នៅពេលនេះ រាជរដ្ឋាភិបាលកម្ពុជាបាននឹងកំពុងខិតខំដោះស្រាយបញ្ហាដោយបន្ថែមម៉ាស៊ីនភ្លើងជាច្រើនគ្រឿងដើម្បីចែកចាយភ្លើង។ វិធានការជាបន្ទាន់នៅពេលនេះ គឺដើម្បីជំរុញឱ្យសង្វាក់ផលិតកម្មទាំងអស់ ពិសេសផលិតកម្មម៉ាស៊ីនកិនស្រូវ អាចបន្តដំណើរការកែច្នៃផលិតផលស្រូវអង្ករទៅបាន ជៀសវាងទទួលរងនូវផលប៉ះពាល់នានា។

សម្តេច ហ៊ុន សែន ថ្លែងនាពេលកន្លងមក

ជាមួយគ្នានេះ សម្តេចក៏បានអំពាវនាវឱ្យប្រជាពលរដ្ឋទូទាំងប្រទេស និងអាជីវករទាំងអស់ យោគយល់ អធ្យាស្រ័យក្នុងករណីដែលនៅទីកន្លែងខ្លះមានដាច់ភ្លើង និងការខ្វះភ្លើងប្រើ ព្រមទាំងស្នើឱ្យប្រើប្រាស់ភ្លើងដោយសន្សំសំចៃ។ «សូមបងប្អូនជួយបញ្ចេញម៉ាស៊ីនភ្លើង និងទិញម៉ាស៊ីនភ្លើងដាក់ប្រើប្រាស់បន្តសិន ដើម្បីឱ្យការងារដំណើរការទៅមុខទាន់ពេលវេលា»៕

អត្ថបទ៖ សំភី