លោក ពូទីន និងលោក គីម ជុងអ៊ុន នឹងជួបគ្នាជាលើកដំបូងក្នុងប្រវត្តិសាស្រ្ត
- 2019-04-19 03:35:38
- ចំនួនមតិ 0 | ចំនួនចែករំលែក 0
លោក ពូទីន និងលោក គីម ជុងអ៊ុន នឹងជួបគ្នាជាលើកដំបូងក្នុងប្រវត្តិសាស្រ្ត
ចន្លោះមិនឃើញ
មេដឹកនាំកូរ៉េខាងជើង លោក គីម ជុងអ៊ុន នឹងធ្វើទស្សនកិច្ចនៅរុស្ស៊ី នាចុងខែមេសាខាងមុខ ក្នុងនោះលោកនឹងជួបប្រធានាធិបតី វ្លាឌីមៀ ពូទីន ជាលើកដំបូងក្នុងប្រវត្តិសាស្រ្ត។ នេះបើតាមការប្រកាសរបស់វិមានគ្រីមឡាំង កាលពីថ្ងៃទី១៨ ខែមេសា ឆ្នាំ២០១៩។
ទោះជាយ៉ាងណា វិមានគ្រីមឡាំង មិនបានបញ្ជាក់លម្អិតអំពីកាលបរិច្ឆេទ និងទីតាំងជាក់លាក់ នៃកិច្ចប្រជុំកំពូលនេះទេ។ ប៉ុន្តែបើតាមប្រព័ន្ធផ្សព្វផ្សាយរបស់កូរ៉េខាងត្បូង និងជប៉ុន បានអះអាងថា កិច្ចប្រជុំនេះ នឹងធ្វើឡើងនៅចុងបូព៌ារុស្ស៊ី។
លោក ពូទីន បានបញ្ជាក់ជាយូរមកហើយពីការត្រៀមខ្លួនជួបជាមួយលោក គីម ជុងអ៊ុន។
គួរកត់សម្គាល់ថា ការបញ្ចេញព័ត៌មានអំពីដំណើរទស្សនកិច្ចនេះ ធ្វើឡើងបន្ទាប់ពីកូរ៉េខាងជើង បានធ្វើតេស្តអាវុធថ្មី កាលពីថ្ងៃទី១៧ ខែមេសា ឆ្នាំ២០១៩ ក្រោមការត្រួតពិនិត្យផ្ទាល់របស់លោក គីម ជុងអ៊ុន។
សូមរំលឹកថា មេដឹកនាំកំពូលរុស្ស៊ី និងកូរ៉េខាងជើង បានជួបប្រជុំគ្នាចុងក្រោយបំផុតកាលពីឆ្នាំ២០១១ គឺនៅពេលលោក គីម ជុងអ៊ីល បានធ្វើដំណើរទៅកាន់តំបន់ស៊ីបេរីនៃប្រទេសរុស្ស៊ី ដើម្បីជួបលោក ឌីមីទ្រី ម៉េដវេដេវ ដែលពេលនោះលោកជាប្រធានាធិបតីរុស្ស៊ី៕