នាយករដ្ឋមន្រ្តីកម្ពុជា-ចិន និយាយគ្នា និងចុះកិច្ចព្រមព្រៀងអ្វីខ្លះ?

2019-04-29 01:23:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន និងលោក លី ខឺឈាង បានជួបពិភាក្សាគ្នាកាលពីថ្ងៃទី២៧ ខែមេសា ឆ្នាំ២០១៩ នៅផ្ទះសំណាក់រដ្ឋទៀវថាយ ក្នុងក្រុងប៉េកាំង ប្រទេសចិន។

រូបថត៖ ផ្តល់សិទ្ធិដោយ Reuters

ក្នុងជំនួបនេះ លោក លី ខឺឈាង បានបង្ហាញក្តីរីករាយដែលសម្តេច ហ៊ុន សែន បានអញ្ជើញចូលរួមវេទិកាខ្សែក្រវាត់ និងផ្លូវ លើកទី២ សម្រាប់កិច្ចសសហប្រតិបត្តិការអន្តរជាតិ។ លោកថា ប្រទេសកម្ពុជាគឺជាមិត្តដ៏ល្អរបស់ប្រទេសចិន។ ប្រទេសចិនជាមិត្តរបស់កម្ពុជា ហើយចិនជឿជាក់ និងទុកចិត្តគ្នាទៅវិញទៅមក។

ជាការឆ្លើយតប សម្តេច ហ៊ុន សែន បានមានប្រសាសន៍ថា ក្នុងគំនិតផ្តួចផ្តើមខ្សែក្រវាត់ និងផ្លូវ បច្ចុប្បន្ននេះ កម្ពុជា ចិន កំពុងធ្វើយ៉ាងណាឲ្យគំនិតនេះ និងយុទ្ធសាស្រ្តចតុកោណរបស់កម្ពុជាមានការស៊ីសង្វាក់គ្នា និងមានការតភ្ជាប់គ្នា ពិសេសការតភ្ជាប់គ្នាទាំង ផ្នែកទុន និងផ្នែករឹង។ សម្តេចតេជោក៏បានលើកឡើង ពីយន្តការនៃការបន្តបង្កើនកិច្ចសហប្រតិបត្តិការជាមួយគ្នា ក្នុងក្របខណ្ឌនៃគំនិតតួចផ្តើមខ្សែក្រវាត់ និងផ្លូវ។

សម្តេច ក៏បានអរគុណ ជូនចំពោះរដ្ឋាភិបាលចិនដែលផ្តើមការពិភាក្សាជាមួយកម្ពុជា ដែលទាក់ទិនទៅនឹងសហភាពអឺរ៉ុប ដែលត្រៀមដក EBA ពីកម្ពុជា។ តាមរយៈអ្វីដែលភាគីចិនមានគម្រោងជួយដល់កម្ពុជានោះ សម្តេចបានស្នើនៅចំពោះមុខ លោកនាយករដ្ឋមន្រ្តីចិន ធ្វើយ៉ាងណាជួយជំរុញឲ្យក្រុមហ៊ុនចិន បន្តការបណ្តាក់ទុនវិនិយោគ និងធ្វើពាណិជ្ជកម្មក្នុងប្រទេសកម្ពុជាជាបន្តទៅទៀត។

សម្តេចបន្តថា កម្ពុជានឹងបន្តធ្វើកំណែទំរង់ផ្ទៃក្នុងខ្លួនឯង ឲ្យកាន់តែស៊ីជម្រៅថែមទៀត ដើម្បីធ្វើយ៉ាងណាជំរុញកំណើនសេដ្ឋកិច្ចកម្ពុជាឲ្យកាន់តែមានល្បឿនខ្ពស់ជាងមុន។

ក្នុងជំនួបពិភាក្សាគ្នានោះដែរ សម្តេចក៏បានស្នើដល់ភាគីចិន ជួយដល់ខេត្ត ព្រះសីហនុ លើការគ្រប់គ្រង ពិសេសជួយដល់បញ្ហាទឹកកខ្វក់ តាមរយៈការផ្តល់ហិរញ្ញប្បទានដល់ គម្រោងអភិវឌ្ឍន៍ទឹកស្អាត និងការអភិវឌ្ឍជនបទ ដើម្បីឲ្យខេត្តព្រះសីហនុក្លាយជាខេត្តគំរូ នៃការនុវត្តគំនិតផ្តួចផ្តើមខ្សែក្រវាត់ និងផ្លូវនេះ។

រូបថត៖ ផ្តល់សិទ្ធិដោយ Reuters

ជាការឆ្លើយតបទៅនឹងប្រសាសន៍លើកឡើងរបស់សម្តេចតេជោ លោកនាយករដ្ឋមន្រ្តីចិន មានប្រសាសន៍ថា អ្វីដែលលោកចង់ឃើញគឺការពង្រឹងកិច្ចសហប្រតិបត្តិការ នៃប្រទេសទាំងពីរឲ្យកាន់តែរឹងមាំ និងបោះជំហានទៅមុខ និងការបម្រើផលប្រយោជន៍រួមសម្រាប់ប្រទេស និងប្រជាជនទាំងពីរ ពិសេសចិននឹងបន្តគាំទ្រដល់យុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា។

លោក លី ខឺឈាង បន្តថា ចិនមានឆន្ទៈច្បាស់លាស់ក្នុងការជួយដល់ប្រទេសកម្ពុជា ពិសេសពាក់ព័ន្ធទៅនឹងក្រុមហ៊ុនចិនដែលកំពុងធ្វើពាណិជ្ជកម្ម និងវិនិយោគនៅកម្ពុជា។ រដ្ឋាភិបាលចិន នឹងជំរុញនិងលើកទឹកចិត្តដល់ក្រុមហ៊ុនទាំងនោះ បង្កើនខ្សែសង្វាក់ផលិតបន្ថែមទៀតនៅកម្ពុជា។ លោកសង្កត់ធ្ងន់ថា បើទោះបីជាមានបញ្ហាអ្វីក៏ដោយ គឺមិនអាចបំបែកចំណងមិត្តភាពដ៏រឹងមាំរវាងចិន និងកម្ពុជាបានឡើយ ហើយចិនបន្តជួយដល់កម្ពុជាលើគ្រប់ផ្នែកទាំងអស់។

ទាក់ទិនទៅនឹងសំណើរបស់ សម្តេចតេជោដែលបានស្នើឲ្យភាគីចិន បន្តបើកចំហរទីផ្សារក្នុងប្រទេសចិន ដើម្បីទទួលយកនូវផលិតផលពីប្រទេសកម្ពុជា លោកនាយករដ្ឋមន្រ្តីចិន បានមានប្រសាសន៍ថា ភាគីចិននឹងពិនិត្យលទ្ធភាពគ្រប់បែបយ៉ាង ក្នុងការទទួលនូវផលិតផលពីប្រទេសកម្ពុជា លើអ្វីដែលប្រទេសចិន មានតម្រូវការចាំបាច់នោះ។

បន្ទាប់ពីបញ្ចប់កិច្ចពិភាក្សា នាយករដ្ឋមន្រ្តីកម្ពុជា-ចិន បានអញ្ជើញធ្វើជាសាក្សី នៃពិធីចុះហត្ថលេខាលើឯកសារកិច្ចព្រមព្រៀងសំខាន់ៗចំនួន៦ ក្នុងនោះរួមមាន៖

រូបថត៖ ផ្តល់សិទ្ធិដោយ Reuters

១. អនុស្សារណៈនៃការយោគយល់គ្នា ស្តីពីបញ្ជីគម្រោងគន្លឹះវង់ទី២ សម្រាប់កិច្ចសហប្រតិបត្តិការសមត្ថភាពផលិត និងការវិនិយោគចុះហត្ថលេខារវាងលោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ជាមួយលោក ចាង យុង អនុប្រធានគណៈកម្មការកំណែទំរង់ និងអភិវឌ្ឍន៍ជាតិ។

២. អនុស្សារណៈនៃការយោគយល់គ្នា ស្តីពីកិច្ចសហប្រតិបត្តិការ នៃការជួយគ្នាទៅវិញទៅមកក្នុងកិច្ចការគយ ចុះហត្ថលេខារវាង លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី និងជារដ្ឋមន្រ្តី ក្រសួងសេដ្ឋកិច្ច និងហិរញ្ញវត្ថុ ជាមួយលោក វ៉ាង វិនធាន ឯកអគ្គរដ្ឋទូតវិសាមញ និងពេញសមត្ថភាពសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។

៣. អនុស្សារណៈ នៃការយោគយល់គ្នា ស្តីពីកិច្ចសហប្រតិបត្តិការ ស្តីពីការនាំអង្ករកម្ពុជាចំនួន ៤០ម៉ឺនតោន ចូលទីផ្សារចិន ចុះហត្ថលេខារវាង លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា ជាមួយ លោក លូ ជុន ប្រធានក្រុមហ៊ុនសាជីវកម្ម COFCO ។

៤. អនុស្សារណៈនៃការយោគយល់គ្នា ស្តីពីសហប្រតិបត្តិការក្រោមយុទ្ធសាស្រ្តចតុកោណ និងគំនិតផ្តួចផ្តើមខ្សែក្រវាត់ និងផ្លូវ ចុះហត្ថលេខាលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី និងជារដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ជាមួយលោក លីវ លានកី ប្រធានធនាគារចិន។

៥. ផែនការសកម្មភាព ស្តីពីការបង្កើតសហគមន៍វាសនារួម កម្ពុជាចិន ចុះហត្ថលេខារវាង លោកឧបនាយករដ្ឋមន្រ្តី ហោ ណាំហុង ជាមួយលោក វ៉ាង យី ទីប្រឹក្សារដ្ឋ និងជារដ្ឋមន្រ្តី ក្រសួងការបរទេសចិន។

៦. កិច្ចព្រមព្រៀង ស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេស ជាហិរញ្ញប្បទានឥតសំណង ចុះហត្ថលេខារវាងលោកអគ្គបណ្ឌិតសភាចារ្យ អូន ព័ន្ធមុនី រ័ត្ន ឧបនាយករដ្ឋមន្រ្តី និងជារដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ជាមួយតំណាងទីភ្នាក់ងារសហប្រតិបត្តិការអភិឌ្ឍអន្តរជាតិ របស់ប្រទេសចិន៕

អត្ថបទ៖ សំភី