ខេត្តសៀមរាប នឹងមានកន្លែងចិញ្ចឹមត្រីទឹកសាប-ទឹកប្រៃ និងជម្រកអភិរក្សសត្វលើផ្ទៃដី១០០ហិកតា

2019-04-30 09:52:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គម្រោងជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វលើទំហំផ្ទៃដី ១០០ហិកតា មានទំហំវិនិយោគសរុប ៧០លានដុល្លារ នឹងត្រូវកសាងនៅខេត្តសៀមរាប។ គម្រោងនេះ ជាការវិនិយោគរបស់ក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀម (Angkor Wildlife and Aquarium)ដែលត្រូវបានបង្កើតឡើងក្នុងទម្រង់ជាដៃគូរវាងវិនិយោគិនកម្ពុជា និងវិនិយោគិនជប៉ុនក្រោមកិច្ចសហការជាមួយ ICM Inc. (International Concept Management Inc.) ពី សហរដ្ឋអាមេរិកដែលរៀបចំរចនាប្លង់ គ្រប់គ្រងគម្រោង និងប្រតិបត្តិជលវប្បដ្ឋាន និងឧទ្យាន សមុទ្រនៅទូទាំងពិភពលោក។ នេះបើតាមការចុះផ្សាយរបស់ AKP។

រូបតំណាង

ចំពោះទំហំវិនិយោគសរុបរបស់សម្រាប់គម្រោងនេះមាន៣ដំណាក់កាល ដោយការចំណាយក្នុងដំណាក់កាលដំបូងស្មើនឹង ១៨លានដុល្លារ។ ការសាងសង់ក្នុងដំណាក់កាលទី១ នឹងប្រើពេល២ឆ្នាំ ដោយមានការបើកការដ្ឋាននៅក្នុងខែឧសភា ឆ្នាំ២០១៩ និងបញ្ចប់ត្រឹមខែឧសភា ឆ្នាំ២០២១។

គម្រោងជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វនេះ នឹងក្លាយជាគោលដៅលំដាប់ពិភពលោក។ សម្រាប់គោលដៅរបស់គម្រោងនេះ គឺធានាថា វានឹងក្លាយជាគោលដៅទាក់ទាញបំផុតទី២ បន្ទាប់ពីអង្គរវត្ត។ នេះបើតាមការលើកឡើងរបស់ លោក Roger R. Reynolds សមាជិកក្រុមប្រឹក្សាភិបាល និងប្រធានក្រុមហ៊ុន អង្គរ វ៉ាយដ៍ឡាយហ្វ៍ & អឹឃ្វារៀមក្នុងពិធីបើកសម្ពោធការចាប់ផ្ដើមការសាងសង់ ជលវប្បដ្ឋានត្រីទឹកសាប ទឹកប្រៃ និងជម្រកអភិរក្សសត្វកាលពីថ្ងៃទី ២៩ ខែមេសា ឆ្នាំ២០១៩។

រូបថត៖ ក្រសួងទេសចរណ៍

លោក Roger R. Reynolds បានបន្ថែមថា គម្រោងនេះ គឺមានច្រើនលើសពីត្រឹមជាជលវប្បដ្ឋាន ឬឧទ្យានសត្វទៅទៀត។ ជាមួយគ្នានេះ ក្រុមលោកនឹងកសាងជម្រកធម្មជាតិប្រកបដោយគុណភាពខ្ពស់សម្រាប់ថែរក្សាសត្វព្រៃរស់នៅលើគោក ក្នុងតំបន់អាស៊ី មិនថាពួកវាជាពូជសង្រ្គោះ ឬបង្ខាំងទុកនោះទេ។ គម្រោងនេះ នឹងមានសួនរុក្ខសាស្រ្ត សាលតាំងពិព័រណ៍ ជម្រកល្មូន និងគំរូភូមិនេសាទខ្មែរដែលភ្ញៀវអាចដើរកម្សាន្ដ ទិញទំនិញ ឬរីករាយទទួលទានម្ហូបអាហារ និងភេសជ្ជៈក្នុងស្រុកមួយចំនួន។

លោក ទិត ចន្ថា រដ្ឋមន្រ្តីស្តីទីក្រសួងទេសចរណ៍ បានលើកឡើងថា គម្រោងវិនិយោគនេះ គឺជាផលិតផលទេសចរណ៍ថ្មីមួយទៀតសម្រាប់ខេត្តសៀមរាប ដែលនឹងបង្កើតភាពទាក់ទាញថ្មី ជំរុញអ្នកទេសចរមកកាន់ខេត្តសៀមរាប បន្តការស្នាក់នៅជាមធ្យមពាក់កណ្តាលថ្ងៃទៀតផង៕

ប្រភព៖ AKP ប្រែសម្រួល៖ សំភី