កំពង់ផែស្វយ័តខេត្តព្រះសីហនុ រកចំណូលបានជាង ៧០លានដុល្លារ ក្នុងឆ្នាំ២០១៨
- 2019-05-02 04:51:20
- ចំនួនមតិ 0 | ចំនួនចែករំលែក 0
កំពង់ផែស្វយ័តខេត្តព្រះសីហនុ រកចំណូលបានជាង ៧០លានដុល្លារ ក្នុងឆ្នាំ២០១៨
ចន្លោះមិនឃើញ
ក្នុងឆ្នាំ២០១៨ កំពង់ផែស្វយ័តក្រុងព្រះសីហនុ ទទួលបានកំណើនបរិមាណទំនិញឆ្លងកាត់ ២២,០៨% ធៀបនឹងឆ្នាំ២០១៧។ ឯប្រាក់ចំណូលអាជីវកម្មសរុបសម្រេចបាន ៧២លានដុល្លារ។ នេះបើតាមការថ្លែងរបស់លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ក្នុងពិធីសំណេះសំណាលជាមួយកម្មករ-កម្មការិនី និងបុគ្គលិកកំពង់ផែស្វយ័តក្រុងព្រះសីហនុ កាលពីថ្ងៃទី១ ខែឧសភា ឆ្នាំ២០១៩។
លោកបន្តថា ផ្អែកលើកំណើនសេដ្ឋកិច្ចដ៏រឹងមាំ និងកំណើនបរិមាណទំនិញឆ្លងកាត់កំពង់ផែនេះ នឹងរំពឹងថាបរិមាណកុងតឺន័រដែលឆ្លងកាត់កំពង់ផែនឹងកើនលើស ៧០០ ០០០ TEUs នៅឆ្នាំ ២០២០ និងលើស ១ ០០០ ០០០ TEUs នៅឆ្នាំ ២០២៣ ដែលនាំឱ្យតម្រូវការអភិវឌ្ឍ និងសាងសង់កំពង់ផែ ត្រូវសម្រេចឱ្យបានទាន់ពេលវេលា និងប្រើប្រាស់យុទ្ធសាស្ត្រគ្រប់ជ្រុងជ្រោយ ដោយបញ្ចុះតម្លៃលើកដាក់ទំនិញ បញ្ចុះតម្លៃសេវាឡូជិស្ទិក ពង្រឹងនូវប្រសិទ្ធភាពគ្រប់គ្រង និងប្រតិបត្តិការកំពង់ផែ និងកតា្តផ្សេងៗទៀត ដើម្បីពង្រឹងការប្រកួតប្រជែងក្នុងតំបន់ និងសកលលោក។
លោកទេសរដ្ឋមន្រ្តីក៏បានលើកឡើងដែរថា ថ្មីៗនេះ កំពង់ផែស្វយ័តក្រុងព្រះសីហនុ បានចូលរួមគាំទ្រដល់កិច្ចសម្រួលពាណិជ្ជកម្ម និងធុរកិច្ចនៅកម្ពុជា សំដៅជំរុញភាពប្រកួតប្រជែង និងបង្កើនល្បឿននៃការធ្វើពិពិធកម្មសេដ្ឋកិច្ចជាតិ ដើម្បីធានាឱ្យបាននូវចីរភាពកំណើនសេដ្ឋកិច្ចសម្រាប់រយៈពេលខាងមុខ តាមរយៈវិធានការបញ្ចុះថ្លៃលើកដាក់ Lo-Lo ចំនួន ១០% បញ្ចុះថ្លៃ Bonus ពី ៧,៥០ ដុល្លារ មក ៥ ដុល្លារអាមេរិក ក្នុងមួយ Box និងកែសម្រួលមិនគិតថ្លៃឈ្នួលបម្លាស់ទីនាវា (Shifting)៕
រូបថត៖ ក្រសួងសាធារណការ និងដឹកជញ្ជូន